約拿書 3章1節 到 3章10節   背景資料  上一筆  下一筆
Tùi約拿書看tio̍h一個真重要ê信息,就是上帝所行ê神跡。這mā是約拿書chit本小先知文獻真特別ê所在,tùi開始到結束,雖然只有短短四章ê篇幅,卻是每一章lóng有神跡出現,tùi第一章ê上帝掀起大風大湧,kah用一條大魚kā約拿吞入腹肚內;第二章描述約拿tī大魚腹肚內無死去,卻是知影悔改求上帝憐憫,然後上帝命令大魚kā約拿吐tī沙灘頂面;第三章則講tio̍h尼尼微城ê人民因為聽tio̍h上帝對in受氣ê信息,就趕緊悔改,而且是tùi國王到家畜lóng總認罪悔改;然後是第四章提起有一叢蓖麻樹忽然長大,後來koh被蟲咬而枯焦死等等,chiah-ê神跡連續不斷出現,而且是每一章lóng有神跡ê記載,這mā是約拿書chit本經冊siōng特別ê所在。因為án-ne,有人講約拿書就是一本描寫上帝行神跡ê經冊。

Chit章就是記載先知約拿經歷過tī大魚腹肚中ê苦難後,伊決定接受上帝ê呼召,去尼尼微城傳出上帝beh伊傳講ê信息。

第1到2節,會有「koh一pái」,是因為第一pái上帝呼召先知約拿ê時,伊抗拒而且逃離。現tī先知約拿知影無法度抗拒上帝ê命令,因為án-ne,當上帝koh一pái ài先知約拿去尼尼微城傳祂ê信息,伊只有ē-tàng順服。雖然chit-ê城是伊所無歡喜去ê城市。

上帝ài先知約拿去講頂pái「吩咐」伊ê話。頂pái就是第一章2節所記載ê,ài伊公開責備尼尼微城ê人民,hō͘ in知影上帝已經注意tio̍h in是「jōa-ni̍h-á邪惡」。

第3到4節,chit pái先知約拿是「服從」了上帝ê「命令」去尼尼微城。這是一個「大城,需要三工ê時間chiah行得完」。對照一下第四章11節,就thang看tio̍h當時hit-ê城ê人口已經高達十二萬ê chē,這tī早期社會來講確實是一個真大ê城。因為án-ne,當上帝一開始呼召約拿去尼尼微城傳信息ê時,上帝就提醒約拿知影hit-ê城是一個「大城」。現在上帝koh一pái呼召先知約拿去尼尼微城ê時,koh提醒伊一pái,作者重複兩pái án-ne描寫,主要目的就是beh hō͘約拿知影上帝jōa-ni̍h-á關心chit種大城,而in ê邪惡已經hō͘上帝無法度忍受。如果上帝真正beh毀滅chit-ê城市,必定會有真chē人死去,所有聽tio̍h ê人一定會驚kah gāng去到無法度想像。

原本chit-ê城之大,需要行三工ê時間,ē-sái講是先知約拿只行一工ê路程就無koh行à。這teh暗示約拿並無盡責kā上帝ê信息傳到尼尼微城ê每一個角落。

Chia mā提供了先知約拿傳講ê信息內容,kah本來上帝beh伊去傳講ê信息有差別;tī第一章2節上帝是beh伊去「公開責備hia ê人」,hō͘ in知影上帝已經「注意tio̍h in是jōa-ni̍h-á邪惡」à。Ē-sái講是chia卻講約拿去傳講ê是:「koh過四十工,尼尼微城會受毀滅!」這到底是怎樣一回事?約拿為甚麼不按照上帝beh伊傳講ê信息去講?伊為甚麼修改信息ê內容?而且是非常清楚訂出毀滅來臨ê時間「四十工」,這是先知信息中絕無kan-taⁿ有ê例。Chia並無記落來伊傳講ê信息內容,卻是只講一句話就無了,確實真chē疑問。M̄-koh故事ê精彩mā tú好就tī chia,lóng tī說明一點:先知約拿實在是心m̄甘、情無願意地去做chit件事。

聖經中有kóa數字並m̄是真確ê數字,卻是象徵性ê意義遠比數字ê chē少會khah重要。「四十」chit-ê數字mā是其中之一,聖經中談起kah「四十」有關ê例真chē(參考出埃及記十六:35、廿四:18,馬可福音一:13,使徒行傳七:23、30、36),lóng tī說明「四十」chit-ê數字有時是teh代表確實ê數字,m̄-koh往往是象徵性ê意義比較khah大。

第5節,「尼尼微城ê人相信上帝ê話」,句話ē-sái講是kui本約拿書siōng中心ê一句,mā是作者想beh hō͘讀者明白ê一節經文。作者beh kā讀者講:只要有人傳福音,就會有人聽,而且是完全接受。因為尼尼微城ê居民一聽tio̍h先知尼尼微傳出來ê信息後,隨時用行動表現出悔改ê態度,in以「禁食」、「moa麻衣」來表示in真正悔改心意。

「禁食」,Tī聖經中這是真嚴肅ê信仰功課。「moa麻衣」,這mā是表達哀傷、艱苦心ê方式(參考列王記上廿一:27,尼希米記九:1)。

當先知約拿kā上帝ê信息傳出來了後,尼尼微城ê居民一聽tio̍h,馬上就以真嚴肅、真誠懺悔ê方式認罪悔改。作者用chit種方式beh凸顯出一個事實:m̄-bat上帝ê人,會歡喜聽上帝ê話語,而且會認真思考tiâu帝ê話,並且會想辦法去實踐上帝ê話。顛倒ê,自認敬拜上帝為性命之主ê以色列人民,卻聽不進上帝ê話,對先知ê信息反應冷漠(參考以賽亞書六:9—13,耶利米書五:1—3,何西阿書十二:10—11)。

Koh講,koh khah重要ê是悔改ê行動不限tī只有大人,卻是連gín-á lóng包括在內,是「城裡所有ê人」lóng同齊悔改。

第6節,尼尼微王一聽tio̍h他國婦人人民lóng驚惶上帝ê懲罰而認真懺悔,伊「一聽見chit-ê消息,就離開寶座,脫掉王袍,moa麻布,坐tī灰中」,這是一種表示真心懺悔ê態度。

第7到9節,chit三節ē-sái講是chit本經冊中siōng精彩ê段落。如果tio̍h講神跡,真正神跡應該就是尼尼微城中連所有ê家畜lóng聽國王ê命令,同齊禁食、moa麻衣悔改。咱無法度想像連家畜lóng禁食m̄食物件,會是怎樣ê情景,m̄-koh這並m̄是作者想beh討論ê問題,kui個故事ê中心是teh說明外族人聽tio̍h上帝ê信息了後,就願意隨時悔改,連cheng-seⁿ、家禽mā同齊採取行動。Thang參考創世記第三章18節所記載ê,人犯罪了後,上帝連土地lóng同齊懲罰,有可能有時人mā會利用chiah-ê家畜動物做出犯罪ê工具。Taⁿ in知影上帝ê受氣,真心悔改ê人m̄-nā家己悔改,mā趕緊帶chiah-ê家禽動物同齊悔改。

尼尼微王隨時「離開寶座,脫掉王袍」,chiah-ê動作lóng是teh指謙卑ê態度。

「坐tī灰中」,這mā是古代以色列人民一種表示痛心、悔改ê方式。
一個國王真心懺悔ê態度到像án-ne kā家己當做ná親像「灰」一般,kah-ná無用ê物件,這是tī以色列人民歷代君王中怎樣chhōe mā chhōe bē-tio̍h ê例,作者就是用chit種方式teh說明:以色列人民看bē起ê外邦人,卻是上帝siōng疼惜ê對象,因為in知影聽從上帝ê話,會kā上帝ê話當真,而且照上帝ê話去遵行,koh khah珍貴ê是懺悔ê心意非常明顯,án-ne chiah是得tio̍h上帝喜愛ê主要原因。

第7到8節,chit位「尼尼微王」m̄-nā家己tāi先án-ne認真ê態度懺悔,而且iáu向尼尼微城ê人民發出通告,ài in lóng kah伊仝款用禁食表示懺悔。而且對象包括cheng-seⁿ家禽在內。Chit兩節所強調ê包括cheng-seⁿ家禽,是teh回應第5節尼尼微城人民「無論大細」lóng總以痛悔ê心進行悔改ê動作。「無論大細」就是teh指包含chiah-ê Tī一般人看起來無甚麼性命價值ê動物在內。

國王chhōa人民進行具體悔改ê動作,除了禁食、moa麻衣之外,iáu包括:
一、「每一個人lóng一定tio̍h懇切向上帝祈禱」。Ài beh特別注意ê是尼尼微城ê人並m̄是敬拜上帝ê族群,m̄-koh in卻tī聽tio̍h先知約拿傳出簡單ê上帝之信息後,反tńg馬上知影向上帝懇切祈禱。Á以色列人民則聽koh再聽上帝ê奴僕先知無停傳出信息,in á是m̄信,koh khah惡質ê態度就是kā上帝奴僕先知一個一個刣死(參考耶利米書四十四:4—5)。所講「懇切地」,是teh指用siōng真誠ê態度,m̄是虛情假意、應付ê方式。

二、「停止邪惡ê行為」。先知文獻中,通常用「邪惡行為」來形容以色列人民棄sak上帝,去拜偶像神明。M̄-koh tī chia是teh指有關倫理道德ê社會行為講ê。

三、「m̄做強暴ê事」。這是teh指搶奪別人ê財產,像先知阿摩司就bat指責以色列人民kā搶奪tio̍h來ê物件kah財富堆積tī家己ê宮殿中,只為tio̍h beh圖謀家己安逸享受,這是非常惡質ê行為(參考阿摩司書三:10)。
第9節,當尼尼微王向伊ê人民做頂面所講ê宣告了後,並m̄是講上帝一定會赦免、赦免in,卻是講「mā可能」,是用一種「懇切地祈禱」ê心,期待ē-tàng得tio̍h上帝ê憐憫。

第10節,chit節ē-sái講是約拿書中所beh傳達ê信息中心:上帝是會改變ê;祂會因為人悔改向善,而改變祂原本beh毀滅、懲罰ê計劃。

Koh講,上帝「看tio̍h」chit-ê動詞,thang對照第一章2節ê「注意tio̍h」,表示上帝一直teh期待尼尼微城ê人民會有改變,因為上帝teh等待in改變,好改變祂原本ê計劃。

「改變心意」,chit句話thang kah第9節ê「mā可能上帝會改變伊ê心意」對照來看,上帝果真正改變了祂本來ê計劃,原因就是看tio̍h尼尼微城ê人民,上自國王,下到所有ê家畜動物全lóng懺悔,而且是moa麻衣、禁食、坐tī灰上等chiah-ni̍h真誠ê悔改動作,就án-ne感動上帝。

重新查詢 專卷研經 約拿書系列
錯誤回報,請聯繫