約拿書 2章1節 到 2章10節   背景資料  上一筆  下一筆
Chit章是描寫先知約拿tī魚ê腹肚內向上帝祈禱ê內容,是用詩體ê方式寫出來。Tī結束ê時chūn,以上帝hō͘大魚kā約拿吐出來tī沙灘頂面做結束。無論是大魚kā約拿吞入魚肚內,á是kā伊吐出tī沙灘頂面,作者lóng強調一點:連大魚mā聽從上帝ê呼召,約拿怎樣ē-tàng逃走抗拒上帝ê呼召?

現tī先知約拿被大魚吞入腹肚內,無死。可能tī魚ê腹肚內真痛苦,因為án-ne,伊向上帝祈禱,而chit篇詩歌就是約拿ê祈禱文,mā是一首祈禱ê詩歌。

真oh想像會tio̍h一個人ài怎樣tī魚肚內生存?mā無法度想像會tio̍h人tī魚肚內ē-tàng活落去ê鏡頭?m̄-koh thang理解一件事:講故事ê時,就m̄是teh論細節ê問題,卻是kā重點khǹg-tī故事ê內涵到底是甚麼。作者m̄是beh kah讀者講先知約拿怎樣tī魚肚內ê情景,伊是beh描寫一件事:這是神跡,當先知約拿被hiah-ê水手kā伊hiat入大海中ê時,伊原本是用chit種方式來表明tio̍h用死來抗議上帝對伊ê呼召。因為án-ne,如果被hiat入大海中,伊就ē-tàng安然死去。

另外一方面,tī以色列文化中,大海是屬tī邪惡力量ê世界,先知約拿mā有可能想beh利用chit-ê邪惡世界ê氣力來抵擋上帝ê呼召。M̄-koh伊ê計劃顯然是失敗了,因為當伊被hiat入大海ê同時,上帝已經差遣一隻大魚阻擋伊ê計謀,大魚kā約拿吞入腹肚內。

第1節,chia講先知約拿tī「魚ê腹肚裡向上主—伊ê上帝祈禱」,這真清楚teh表示:既然是上帝命令大魚kā先知約拿吞入腹肚內,所以先知約拿tī魚肚內chiah ē-tàng活teh,這就是神跡。

第2節,先知約拿講伊「tī遭難ê時chūn呼求」上帝,希望上帝ē-tàng拯救伊。因為會發生chit pái ê災難,是伊拒絕接受上帝ê呼召惹上帝ê大怒。

Koh講,先知約拿講伊現在是tī「陰間ê深ê所在」向上帝求助。因為án-ne thang了解伊所講ê「遭難」指ê就是現在已經陷入「陰間」中受苦。路加福音描述「陰間」是一個痛苦ê所在(參考路加福音十六:24)。

第3節,chia先知約拿特別提起是上帝kā伊「hiat進深海」中,卻無提起上帝差遣大魚kā伊吞入腹肚內。

Chit節可能是引用詩篇第四十二篇7節ê詩歌,詩人講上帝用憂傷ê水湧淹滅伊,mā用如大水般ê騷亂向伊怒吼。先知約拿引用詩人ê詩歌,beh描述ê是伊tú-teh tī「海ê siōng深ê所在」,hō͘「大水」、「洪濤」包圍teh,chiah-ê詞句lóng表示性命面臨垂危ê時。

「海ê siōng深ê所在」,表示真大ê苦難,kah-ná性命已經陷入siōng谷底。Á「大水」、「洪濤」lóng是teh象徵先知約拿已經無法度呼吸了,死亡已經來到身邊,就快奪行伊ê性命。

第4節,tī chia先知約拿提起伊hō͘上帝趕走,因為án-ne伊「koh khah án怎都看bē-tio̍h上帝聖殿」。「聖殿」,這是以色列人民看做敬拜上帝siōng重要ê所在,因為上帝tòa tī聖殿裡,是上帝降臨ê所在。以色列人民有一個觀念:一個人若是kah上帝隔絕,就是無法度koh再看tio̍h上帝ê面,性命就會陷入孤獨無助ê狀態,mā是表明性命已經有危機。

第5節,chia提起「海草」,chit種草真強韌,無容易at斷。詩人用來形容約拿tī海底被海草纏tiâu伊ê「頭」,表示約拿差不多是死定à。

第6節,thang講kah第5節相對應。Chia thang看tio̍h一個真特別ê語句—「落去到群山ê根基」。Tī以色列人民ê觀念中,山ê根基是teh指地siōng深ê所在,它ê根部直落去到海底ê深ê所在。無比chit-ê地方koh khah深之地。因為koh再落去就是「地獄」à。因為án-ne,tī chit地ê根基ê所在有「門閂」,這是區隔地獄之內外ê門。這「門閂」ná親像第5節提起ê「海草」仝款,chia ê「門閂」kah-ná beh kā先知約拿鎖tiâu,m̄ hō͘伊出來仝款,ná親像第5節提起海草kā約拿纏tiâu m̄ hō͘伊浮上水面仝款,lóng是teh形容性命tī siōng危急ê狀況。

上帝憐憫先知約拿,kā伊tùi chit種會置伊tī死海底、地ê siōng深ê所在kā伊拯救出來。換句話講,如果無上帝伸手,先知約拿必死無疑,因為除了上帝以外,無任何人有能力thang kā一個人tùi絕境中拯救出來。

第7節,chit節提起先知約拿原本想beh盡一切辦法beh逃離上帝ê命令,taⁿ tú-tio̍h了性命「快溜行ê時chūn」,伊猶原想beh走chhōe上帝ê幫助。伊講上帝「tī聖殿垂聽」伊ê「祈禱」。以色列人民ê觀念是上帝會tùi天頂落來到聖殿ê「至聖所」中,tī hia聽人ê祈禱並回應人ê祈求。

第8節,chit節真清楚講tio̍h:真正神chiah是性命ê庇護者、拯救者,如果敬拜虛無ê神,chit種人必定無法度得tio̍h真神ê救助。先知約拿用chit種話teh形容家己ē-tàng得tio̍h拯救,就證明伊所敬拜ê上帝乃是真神。相對ê,hiah-ê tī死亡邊緣無法度chhōe-tio̍h拯救力量ê人,是因為in所敬拜ê神是假神。

第9節,chit節所用ê動詞lóng是未來式,而tùi第2到8節所用ê動詞lóng是過去式。會有chit種cheng差主要原因是先知約拿現在已經得tio̍h拯救,伊回想過去差一點á就死去,是因為有上帝ê憐憫救助,chiah hō͘伊tùi死亡ê邊緣中得tio̍h拯救。現在,伊準備ài o-ló上帝、歌頌上帝,並且beh向上帝「獻上牲祭」。

「還一切所下ê願」,這chit句詩tī詩篇中非常普遍,通常lóng是用tī感恩ê時chūn所講ê,親像:詩篇第五十篇14節、第五十六篇12節、第六十一篇8節、第六十五篇1節、第六十六篇13到14節、第一一六篇14節、18節。

「救恩只有tùi上主而來」,chit句話ē-sái講是約拿ê第二pái信仰告白。第一pái ê信仰告白是tī第一章9節,伊講家己敬畏ê上帝,而chit位上帝就是「天頂ê上帝,是海洋kah陸地ê創造主」,現在伊soah講只有chit位上帝chiah是人性命ê拯救者。意思是除了chit位宇宙萬物ê創造主以外,人別位無所在thang chhōe-tio̍h拯救ê門道。

第10節,chit節kah第1節相對應;tī第1節提起約拿tī魚腹肚裡向上帝祈求,經過一段祈禱了後,上帝垂聽伊ê祈禱,後來「上主命令hit條大魚」kā約拿「吐tī沙灘頂面」。Án-ne簡單ê句話卻講出極大ê信息,作者用chit種話teh kā咱講:連魚lóng聽從上帝ê旨意、命令做tāi-chì,上帝ê奴僕卻不如一隻大魚。當大風、大湧lóng聽從了上帝ê話語ê時,人卻無願聽從上帝ê話。

重新查詢 專卷研經 約拿書系列
錯誤回報,請聯繫