約伯記 8章1節 到 8章22節   背景資料  上一筆  下一筆
Chit章是約伯ê第二個朋友書亞人比勒達tī約伯和提幔人以利法ê論述結束後,對約伯ê回應。Tùi比勒達講話ê內容來看,伊顯然比以利法對約伯苦難事件ê認知koh-khah少,伊一再強調約伯ê遭遇必定是因為得罪上帝ê緣故,包括伊ê kiáⁿ lóng得罪上帝。

比勒達所講ê內容kah以利法所講ê大部分是仝款ê,lóng是根據非常傳統ê宗教信仰之認知,in認為人性命出現苦難,必定是因為人犯罪、得罪上帝。比勒達認為約伯ê kiáⁿ一定是得罪上帝chiah會遇tio̍h án-ne重大ê災難來死亡。伊勸約伯tio̍h趁家己iáu活teh ê時chūn,趕緊悔改、認罪,án-ne chiah ē-tàng得tio̍h上帝赦免,並且可能iáu會得tio̍h加倍ê獎賞,補足伊過去所有ê損失。M̄-koh比勒達chit種講法,約伯根本聽不入去,反tńg hō͘約伯koh khah受氣、不平。約伯回答比勒達ê話,比起比勒達講ê話加真chē,包含第九章kah第十章。

第1到3節,比勒達認為約伯回答以利法ê話「空洞」無內容。伊對約伯表示非常不滿,因為án-ne,伊用真無客氣ê語氣回應約伯ê話。伊講約伯ê話明明是就是烏白講,甚至是「顛顛倒是非」。Chia ê「顛倒」一詞,指ê是「扭曲」、「變形」ê意思。伊認為公義ê上帝,絕對bē扭曲事實,mā bē冤屈好人。而且公義ê上帝絕對bē做出錯誤ê事。比勒達想beh講ê是:約伯和伊ê家族會án-ne連連tú-tio̍h重大災難,一定是家己犯罪,因為公義ê上帝絕對bē無緣無故ê懲罰人。伊ê看法是:如果約伯無認為上帝是公義ê神,伊根本就bē轉向上帝求救。

第4到7節,比勒達確實是真努力試beh幫助約伯瞭解tú-tio̍h災難ê原因,這mā是伊提出ê第一個「可能性」,就是約伯kiáⁿ得罪上帝。M̄-koh因為比勒達有chit種講法,hō͘約伯非常艱苦心。因為比勒達án-ne講,等於是teh kā約伯講講:伊ê kiáⁿ會tú-tio̍h災難來死,是罪有應得。Chit種講法對正teh受難中ê人來講,是非常「殘酷」ê。真正ê問題,是出tī比勒達並無指出約伯ê kiáⁿ到底tó位犯罪。

續落來比勒達提出ê第二個解決ê可能性,就是幫助約伯知影怎樣「重新得力」。伊ê觀點就是「轉向上帝」,向祂悔改、認罪,只有án-ne,chiah ē-tàng得tio̍h上帝ê幫助。比勒達提出一個基本信仰認知:走chhōe上帝ê人,必定會得tio̍h豐富ê獎賞。伊建議約伯應該tio̍h懇切向上帝求助,tio̍h趁 iáu活teh ê時chūn,趕緊走chhōe上帝,chiah有恢復以往光彩歲月ê希望。伊講上帝一定會tī約伯承認錯誤而且悔改了後,賞賜hō͘約伯比以前koh-khah chē。Chia用「恢復」一詞,原本是teh指「重新建立」、「填滿」ê意思。後來,根據約伯記第四十二章10到17節記載,約伯後來確實得tio̍h比以前上帝賞賜hō͘伊ê koh-khah chē。(m̄-koh該段經文,一再被聖經學者存疑,in認為該段並m̄是本來約伯記ê作品,卻是後來編輯者附加上去ê。有關此點teh紹介chit本經冊ê時已經提起過。)m̄-koh比勒達所提出ê chit種看法,tú好是撒旦向上帝挑戰ê時所提起ê「有利可圖」ê意思,chit點卻是約伯記作者所不認同ê信仰內涵。約伯記ê作者siōng想beh kā所有讀者講ê是:真正信仰應該建立tī「無利thang圖」ê基礎上chiah正確。

    第8到10節,比勒達勸約伯tùi古聖先賢ê「祖先」之經歷來學習,比勒達用「咱ê性命目nih-á」、「像掠過大地ê影兒」等chit種句話,主要目的是beh kā約伯講,tī hiah-ni̍h有限ê性命中,人真oh瞭解性命ê奧秘,無論jōa-ni̍h-á努力,結果iáu是「一無所知」。伊koh一pái強調古代賢者ê智慧、經驗,應該是siōng好ê幫助,注意聽in講過ê話,注視in行過ê腳跡,而in性命所經歷ê,thang成做真好ê「教導」。

    第11到12節,比勒達用「蒲草」kah「蘆葦」來譬喻性命ê目nih-á kah脆弱,說明一個人如果想beh óa靠家己ê能力,就會親像chit兩種植物仝款ê脆弱、無力。因為「蒲草」kah「蘆葦」,chit兩種水生植物,如果tú-tio̍h乾旱季節,馬上就會lian去,失去性命力。比勒達mā用chit種話teh暗示:得來ê快,失去ê mā快。

    第13到15節,ē-tàng看出比勒達思想ê重點,mā是以色列人民久長以來共同ê性命經驗,in認為上帝就是性命ê源頭,會失去上帝,等於會失去一切。比勒達用以色列人民所熟悉ê信仰認知提醒約伯:m̄-thang「bē記得上帝」,因為祂chiah是性命ê源頭。「bē記得上帝」,等於是切斷kah上帝之間ê關係。伊tī chia一再用「蜘蛛網」來譬喻,這是掛tī草叢á是樹葉中ê昆蟲之絲,對目nih-á性命ê飛蛾、昆蟲等有非常ê刣傷力。M̄-koh對人來講,蜘蛛網是脆弱無比,只要人ê手輕輕一碰,就ē-tàng hō͘蜘蛛網破裂、損pháiⁿ,因為án-ne,若有人想beh用chit種網來做性命ê óa靠,he明明是愚戇至極ê想法。比勒達用「蜘蛛網」來譬喻,除了性命ê主上帝以外,人無論chhōe甚麼外在物件á是力量當做óa靠,lóng kā ná親像走chhōe「蜘蛛網」保護性命仝款,是真糊塗koh thang悲ê事。

第16到19節,比勒達tī chia ê「雜草」說明表面上看起來,生長kah非常緊,而且非常茂盛,甚至iáu會蔓延到牆籬外面,m̄-koh因為chiah-ê都無深厚根基,ná親像「雜草」仝款,隨時可能會hō͘拔除。生做真緊,lian去得mā真緊。伊講「邪惡ê人」,ná親像「雜草」仝款,所有ê榮華富貴只不過lóng是表面ê景象,只要小khóa用力,就thang kā它連根拔起,kah chiah-ê「雜草」仝款隨時死亡。然後「無人知影它bat tī hia扎過根」。比勒達ê話隱約中kah-ná是beh警告約伯,過去伊所óa靠ê財富、雄厚家勢等,lóng像chiah-ê雜草無根基ê植物仝款脆弱,tú-tio̍h考驗隨時會lian去、被拔除而失去性命。然後tùi第19節thang總結比勒達ê觀點:愚戇ê人chiah會喜愛chit種目nih-á、易逝ê性命,m̄-koh這無應該是人ê性命目標。Mā只有愚戇ê人chiah會kā性命託付tī hiah-ê如蒲草、蘆葦、蜘蛛網、蔓藤草等等chiah-ê bē穩固ê事物上。

    第20到22節,chit段經文thang看tio̍h以利法觀點ê重現(參考約伯記四:7—9、五:17—27),就是上帝對待義人kah惡人之間ê差別,而這mā是智慧文學典型ê筆法,強調義人(好人)必定會得tio̍h上帝ê祝福,相對ê,惡人一定結出無好ê果子。Teh比勒達ê認知裡,約伯ná親像一個「邪惡ê人」(mā thang當做「罪人」)。因為如果約伯是一個「無thang指責ê人」好人(á是講「義人」),上帝一定會幫助伊,koh khah「bē棄sak」伊。M̄-nā án-ne,上帝會koh一pái hō͘伊「喜笑」、「歡呼」,表示重新得tio̍h榮耀。伊強調上帝m̄-nā會賜福hō͘ óa靠祂ê人,對tī hiah-ê「無thang指責ê人」,上帝mā一定會庇護,絕對bē棄sak。Á相對ê,對tī hiah-ê恨惡上帝所kah意ê子民者,上帝一定會hō͘ chit種人「蒙羞受辱」,因為chit種人無意愛上帝ê公義。最後,必定hō͘ 上帝所消滅。

重新查詢 專卷研經 約伯記系列
錯誤回報,請聯繫