約伯記 7章1節 到 7章21節   背景資料  上一筆  下一筆
Chit章是約伯繼續第六章,m̄-koh chit章已經無koh是對以利法講話,卻是約伯向上帝講出伊心靈苦悶ê話語,伊teh向上帝表達對家己性命所tú-tio̍h ê苦難感覺無力kah無奈,伊確定家己ê苦難,是tùi上帝來ê懲罰,因為án-ne,若beh án-ne痛苦活teh,伊倒希望不如hō͘家己死去,來得有khah好。伊描述家己目前ê苦難,包括伊身上ê疾病纏身,心力交瘁,身心俱疲外,伊深深體會tio̍h án-ne痛苦ê性命,活teh並無甚麼特別ê意義thang講。

第1到3節,約伯一開始就用「做兵」,來形容性命苦難ê現象。Chia ê「做兵」一詞,mā thang翻譯成「苦役」,意思是teh指像奴隸一般ê工作,是人tī體力上極大ê負擔。伊講家己像「奴隸」,渴慕歇睏一下,á是mā像「雇工」,期待一點點á工資好餬口,伊用chit種方式teh形容家己ê卑賤身分,只有ē-tàng tī困苦ê歲月中過日子。約伯是用chit種方式teh反駁以利法tī頭前所提起ê,認為性命有苦難,是因為人犯罪ê緣故(參考五:6),m̄-koh約伯認為m̄是án-ne,卻是因為國家phah敗仗,受掠成做奴隸;若無,就是因為非常sàn-chhiah,致使需要賣身為奴。伊khah強調ê是ná親像第1節所提起ê,chit種運命m̄是出tī本身ê意願,卻是「被迫」ê,chit種「被迫」有環境ê因素。Á環境應該是kah上帝有密切關係。

第4到6節,約伯講家己tī暗時睏ê時chūn,一躺落來想beh歇睏,希望用此方式來減輕痛苦。M̄-koh就算只是án-ne ê期待,mā lóng是一種奢求。約伯期待暗時來到ê時,就ē-tàng好好á歇睏一下,喘口氣。Ē-sái講是日時頭勞碌工作hō͘筋骨酸痛到暗時無法度成眠。因為án-ne,只好反tńg來期待日時頭趕緊來臨。Ē-sái講是,當想tio̍h日時頭來臨ê時,koh得koh再去面臨艱苦ê奴工生活ê時,就koh khah感嘆性命ê苦難。結果是人躺tī床頂,mā chhia-péng睏bē去,面臨chit種性命ê苦難,真是苦不堪言。性命siōng大ê痛苦,就是身處矛盾ê中間。第5節,thang參考第二章7到8節,描述約伯身上長滿瘡,而且坐tī糞埽堆中用瓦片刮身上ê毒瘡。伊講家己ê性命ná親像古代織布機上ê「梭」,表示家己ê性命過ê非常緊,快到連人想beh看一下「梭」如何在織布機中穿梭tio̍h mā真oh。

    第7到11節,約伯講家己ê「性命只是做一睏息」,類似chit種感嘆性命短促ê句話,tī約伯記中一再出現,mā是約伯記中一再提起ê觀念(參考四:20、八:9、九:25—26、十四:1—2)。這「做一睏息」mā有含另外一個意思,就是teh指「一陣風」,teh表示另外一個意義是「飄渺」、「虛無」。約伯用chit種方式teh提醒上帝,希望上帝注意tio̍h伊tú-teh受苦,若無,若koh再慢一點ê話,就別想beh「看會tio̍h」伊,因為伊可能已經「無tī」,表示往生。伊講「人死去無koh tńg去」,真緊to̍h會hō͘親朋好友,甚至是家己厝裡ê親人hō͘ bē記得。即使tī chit種苦難中,約伯iáu是beh kā心靈深處ê苦悶講出來hō͘上帝知影,伊希望上帝tī伊iáu未死chìn前,會重視伊、知影伊所受ê苦oh得有jōa大。約伯自認對上帝忠心耿耿,從來無違背上帝ê旨意,卻因身邊ê chiah-ê朋友指責kah閒言閒語,hō͘伊koh khah心痛。

第12到16節,約伯懷疑上帝kā伊當做是一個pháiⁿ人、怪獸(海怪)一般teh看待伊。伊用「防守」(mā thang當做「警衛」解釋)、「恐嚇」、「每ê時每刻lóng看tio̍h伊」等字句,形容上帝對伊ê m̄信任kah懷疑。伊自認m̄是「海怪」,m̄-koh上帝卻像看待「海怪」仝款對伊,hō͘伊感覺真冤枉。第13到14節,thang參考第4節;tī第4節約伯講暗時根本無法度入眠睏,而tī chia則講上帝用「惡夢恐嚇」伊,hō͘伊無法度得tio̍h歇睏。人siōng痛苦ê事,就是無法度睡得安適,因為án-ne,約伯講若beh án-ne痛苦,不如「窒息」來死總比hō͘伊活teh受苦iáu會khah受好。Taⁿ伊已經對性命無koh寄hō͘任何希望ê態度,因為活teh是án-ne痛苦,ná有甚麼意義thang講?伊希望上帝「chhut-chāi」伊去,m̄-thang koh再管伊。

第17到21節,tī詩篇第八章4到6節有類似第17節chit種句話,當詩人強調人ê渺小時,相對ê,就是teh歌頌上帝ê偉大。約伯引用詩人ê話語,是因為伊肯定雖然家己真渺小,m̄-koh上帝並無因為án-ne就kā伊bē記得,祂iáu是仝款「看重」、「重視」tio̍h伊。就是因為án-ne,hō͘伊連想要求死ê機會都無,因為上帝kā伊看kah ân-ân ê,連hō͘伊想beh「嚥下一嘴唾沫」ê機會mā無。其實chit種講法mā teh表示:上帝對約伯保護得非常好,祂絕對bē hō͘約伯死去。

另外一方面,約伯mā teh向上帝控訴,為甚麼ài kā伊看緊到如仝一個罪犯,就算是,一個罪人有甚麼所在值得上帝kā伊看kah chiah-ni̍h ân,伊認為家己身陷苦難中,已經不值得上帝án-ne保護伊。約伯mā對上帝ê慈悲提出質疑地,伊認為如果伊有錯,憐憫ê上帝應該會赦免伊chiah-tio̍h。M̄-koh為甚麼慈悲、憐憫ê上帝無án-ne?伊koh一pái希望上帝「正視」、「注意」伊,而伊mā相信上帝一定會án-ne,只是伊希望chit-ê時間bēkhah受太慢。

重新查詢 專卷研經 約伯記系列
錯誤回報,請聯繫