約伯記 6章1節 到 6章30節   背景資料  上一筆  下一筆
Chit章kah第七章lóng是約伯針對以利法所講ê話ê回答,mā是約伯對家己所tú-tio̍h ê處境ê第二pái發言。M̄-koh tī chit兩章中,thang看出約伯tńg來話ê對象,並m̄是只針對以利法,伊是用「Lín」chit-ê複數代名詞(參考六:21、26—30),因為án-ne應該是teh對chit三位朋友回答。M̄-koh這「Lín」mā thang看做是一個人ê性命經歷苦難ê時,kah kui個大環境有關係。因為án-ne,當人teh回應生活環境帶來性命苦難ê時,並m̄是個人對個人,而是一個人對整體ê控訴。

Tī第六章中,約伯用食物kah水來表達性命ê飢渴,伊渴望得tio̍h「性命ê糧食」,以此方式來說明人生存siōng實際ê需要,m̄是空口白話,卻是真正食物(務實)。換句話講,信仰,是非常實際ê,並m̄是天馬行空ê想像,á是thang畫餅充飢。

第1到3節,約伯提出一個觀念:災難、愁煩,並m̄是ē-tàng用數字呈現ê,因為這是性命ê感受,mā m̄是「chē少」、「輕重」ê問題。因為án-ne,無法度用仝一個種方式來「比較」,而是beh「設身處地」去瞭解對方ê想法kah感受,以kā心比心ê態度去評斷。伊án-ne講是對以利法一再勸伊ê講詞有意見。伊認為以利法根本就無瞭解伊心內ê苦悶。約伯用「海沙」來譬喻家己ê苦難是án-ne ê沉重,意思是teh指無法度計算,á是去衡量秤重。Koh講約伯並無認為家己ê話愚戇、無知,只不過是講話比較「粗魯」而已。

    第4節,約伯真清楚表達伊ê中心思想:若是賜福是tùi上帝來,án-ne,懲罰mā必定是出tī上帝ê手。因為án-ne,發生tī伊身上ê chiah-ê災難lóng是tùi上帝來,而且上帝是用真殘酷ê方式對待伊。伊形容家己如同在戰場上被對方(指上帝)ê「箭」射中仝款ê痛苦,並且性命已經陷入了面臨死亡ê狀態。因為tùi上帝手中射出來ê hiah-ê箭ê箭頭,lóng有含劇毒。

    第5到7節,「野驢á」,這是曠野中一種四界māi食ê動物,tó位有草thang食,就gōa chē,並無受約束。「牛」則一種家畜,只要有人飼養,就滿足。約伯用chit種方式teh譬喻:伊無親像chit兩種動物,只要有得食就滿足。因為伊認為性命並m̄-nā在tī有得食、lim,就滿足,而是beh活得有意義。約伯用chit種方式來為家己辯解,伊認為人bē-tàng kā性命價值khǹg tī chiah-ni̍h低階ê層次。其實約伯是用chit種言詞反駁提幔人以利法所講ê話,伊認為以利法ê觀念,ná親像無氣味ê食物仝款,hō͘人oh得下嚥。

    第8到11節,chit段經文koh一pái看tio̍h約伯求死ê意念真強。伊認為如果ē-tàng死去就是極大ê恩典。約伯認為上帝若真正愛伊,siōng好ê方式就是hō͘伊隨時死去。Ē-sái講是伊發見上帝根本就m̄聽伊chit種祈禱。Tī第9節ê「願」一字,原本是一個「祈願」句型,tī約伯記一再出現(參考十一:5、十四:13、十九:23)。表明約伯心中燒熱切ê ǹg望。Thang講約伯真正期待早早死去,m̄-koh mā同時講出約伯teh質疑上帝用chit種方式逼死伊,koh有甚麼好處?這tú好講出約伯心內ê矛盾。

約伯心中一再認為家己「從來m̄敢違背」上帝ê旨意。伊後來tī第24節就真直接ài以利法指出,到底伊犯甚麼錯,hō͘伊一定tio̍h承受án-ne大ê苦難。約伯相信所有ê痛苦,必定kah上帝有關係,mā因為án-ne,伊真ǹg望上帝會hō͘ in明白,伊到底犯甚麼罪chiah致使性命án-ne痛苦。因為性命是tùi上帝來,若是無犯甚麼bē-tàng原諒之罪,卻遇tio̍h án-ne重大ê痛苦,伊teh問chit種性命究竟beh表明甚麼意義?這講出一個基本性命概念就是:即使性命是án-ne痛苦,卻是tùi上帝來ê賞賜,而性命ê主權又koh是屬tī上帝,m̄是人家己ê。因為án-ne,就算是beh「自我了結」,mā要求問上帝ê意思。

第12到13節,tùi chit兩節ē-tàng看出約伯真清楚家己ê有限kah軟弱。Tī chia伊用「石頭」kah「鐵」來形容家己並無親像chit兩項hit種堅硬,卻是非常軟弱,無法度忍受重大ê撞擊。伊自認連一點「自救ê氣力」mā無,chit-ê意思真清楚,指出如果苦難是tùi上帝來,想用人ê氣力來解決,he是愚戇ê想法。

    第14到17節,約伯用chit種方式來形容伊ê「朋友」,chia ê「朋友」(á是兄弟)一詞,lóng是用複數代名詞,表示伊m̄-nā是對以利法一個人講,是對所有來探望伊ê親朋好友講ê。約伯對以利法chit種朋友表示失望,是因為伊發見以利法等等chiah-ê朋友並無提供伊實際有效ê減少痛苦之道,顛倒,卻hō͘伊感覺koh khah痛苦。約伯講伊「需要忠心朋友」,chia ê「忠心」一詞,原本是用tī以色列人民kah上帝之間所立ê約,意思是堅決bē改變ê態度,會信守所立之約。伊認為像以利法等等chiah-ê眾朋友,ná親像tī巴勒斯坦地區ê真chē河川,淺底蓄水量少。只要雨季一過,河床就會露現,日頭一曝河川就會出現乾涸現象。伊用chit種方式來講chiah-ê朋友ná親像「像溪水仝款靠不住」。Á類似chit種句話,mā出現tī先知耶利米ê話語中(參考耶利米書十五:18)。另外一方面,約伯mā用溪流結冰來形容伊ê chiah-ê朋友,真正需要in像河水來止渴ê時,in卻凍結成冰,m̄-koh chiah-ê冰tú-tio̍h豔陽高照ê時,真緊koh融化消失,對苦難中ê朋友一點幫助mā無。伊用chit種方式teh說明伊ê chiah-ê朋友對苦難中ê伊,真正是幫不上忙。

    第18到20節,約伯用商隊來形容受害ê嚴重性。Chit種商隊乃是當時不時出現tī曠野旅途中,每pái經過曠野ê時,非常迫切需要水源,當in chhōe bē-tio̍h水源ê時,m̄是渴死,就是失迷方一向死亡。第19節chia提起兩個重要ê城市:一是「示巴」,這tī第一章15節bat提起示巴人搶奪了約伯家ê牲口。照以賽亞書第六十章6節提起,「示巴」以出產黃金kah乳香豐富而出名tī古代ê中東地區。另外一個是「提瑪」,這是設tī阿拉伯北部ê一個城市,hit-ê城ê人民大部分是用實瑪利ê kiáⁿ孫(參考創世記廿五:15)。Chit-ê城有「沙漠綠洲」ê暱稱。因為chit-ê緣故,來往「提瑪」ê seng-lí人旅客非常chē,貿易無閒,mā因為án-ne,tòa tīhi̍t 所在區ê人生活比較富裕(參考以賽亞書廿一:14)。Chit兩個城市原本非常鬧熱,而且是商隊siōng歡喜停留ê城市,taⁿ卻mā因為chhōe bē-tio̍h水thang lim,而開始荒廢。這表示水源枯竭ê嚴重性,已經到à遍地饑荒ê景況à。約伯用chit種方式teh隱喻:伊ê朋友以利法等人所講ê話,並無hō͘伊tī苦難中乾渴ê心靈,得tio̍h性命中所需要,á是hō͘伊迫切ǹg望得tio̍h安慰ê心靈得tio̍h滋潤、滿足。

第21到24節,約伯用「驚惶kiu-kiu」chit-ê詞來形容伊chiah-ê朋友ê醜態。原因是當in看tio̍h伊hō͘ 上帝懲罰ê時,非m̄-koh m̄敢替伊辯護,iáu眼睜睜地看tio̍h伊受難;m̄-nā無hō͘伊感受tio̍h安慰,iáu加添了真chē苛責ê話語來責難約伯,chit對約伯來講,就ná親像tī傷口掖鹽巴仝款,hō͘伊原本已經真痛苦ê性命,加倍疼痛。Tī約伯ê看法中,伊對朋友ê態度,ná親像對上帝ê態度仝款,無任何想beh tùi中謀得利益ê意思。換句話講:伊對朋友是非常忠心ê,是用真實ê心對待in,並m̄是因為in hō͘伊甚麼好處,á是thang tùi in身上得tio̍h甚麼利益,chiah結交in chiah-ê朋友。Tī chia,約伯ài以利法明確指出伊ê罪狀。其實,約伯記ê重點mā是tī chia,伊希望上帝hō͘伊知影家己會tú-tio̍h chiah-ni̍h大ê苦難ê原因。

第25到27節,約伯強調家己ê無辜受難,因為án-ne,伊希望指責伊得罪上帝ê chiah-ê朋友,ē-tàng提出證據來說明,伊明確要求所有指控。伊要求以利法,如果beh回答就tio̍h講出個thang hō͘人信服ê話來。伊用真嚴厲ê話指控chiah-ê朋友,指控伊犯罪ê事,只是一種chhōe測chit種行為kah出賣朋友致富仝款。伊會án-ne嚴厲指責chiah-ê朋友,是beh hō͘ in知影,tī無真確明白朋友受難原因chìn前,亂下斷言,就是tī傷害朋友。

    第28到30節,雖然約伯用真重ê語氣,駁斥伊chiah-ê朋友對伊ê指責,m̄-koh伊iáu是懇求chiah-ê朋友koh再「詳細想一想」,到底伊犯甚麼錯而需要承受án-ne大ê苦難。約伯hō͘伊ê chiah-ê眾朋友知影,家己雖然tú-tio̍h苦難,m̄-koh「是非」iáu是真清楚,並m̄是無ê放矢。伊用chit種方式teh表明家己ê誠實,無講白賊。

重新查詢 專卷研經 約伯記系列
錯誤回報,請聯繫