約伯記 40章1節 到 40章24節   背景資料  上一筆  下一筆
Tùi第三十八到四十二章6節,是上帝回應約伯ê話,以及約伯對上帝所講ê話ê回應。

Tī chit四章篇幅中thang kā它分做兩個段落:

第一個段落是tùi第三十八章到第四十章5節,Tī chit段落中,約伯記ê作者lóng kā重點鎖定tī chiah-ê m̄是人ê手所ē-tàng馴服、管理ê野獸kah大自然,上帝kah約伯ê chit段談話重點就是提醒約伯:上帝其實並m̄是bih起來,mā m̄是無對約伯ê問題作回應。上帝一直就tī約伯ê身邊對伊講話,只是約伯m̄知mā無聽tio̍h上帝對伊講話。

第二個段落是tùi第四十章6節到第四十二章6節。Tī chiah-ê段落中,上帝主要用兩種動物來kah約伯談話,一是河馬,二是海怪。

無論是第一段落á是第二段落,上帝lóng是beh提醒約伯,上帝一直teh管理chit-ê受造ê宇宙世界。因為有上帝teh管理,就bē有任何事物hō͘ 上帝遺棄,á是忽略。想看看,上帝對tī人所m̄敢看、m̄敢摸tio̍h ê對象,lóng照顧得lóng無失落,ná親像耶穌所講ê,上帝連一隻雀鳥á lóng會看顧,而人比雀鳥á iáu koh khah貴重,人ê每一條頭毛上帝lóng數算過(參考路加福音十二:6—7),上帝怎樣會bē記得正tī受苦中ê人?尤其人tī被造之初,上帝就已經賦予人管理世界萬物ê責任,上帝絕對會看顧祂所創造每一個人,特別是óa靠上帝帶領ê人。

第1到2節,chit兩節ē-sái講是上帝回答約伯問題第一個段落ê結束。上帝講完了chit段話後,就ài約伯針對祂所講ê chiah-ê奧秘表示意見,ē-sái講是約伯一直靜默不語。就án-ne,上帝就「繼續對約伯講」下列ê話。

第3到4節,這是約伯teh聽完上帝ê話後,第一pái回覆上帝ê話。約伯ê回答m̄-nā真簡短,而且真明確,kah chìn前伊kah朋友之間ê問kah答差別真大。伊承認家己「講了無知ê話」,而且表示已經無法度koh再「講甚麼」了,後來講伊「m̄敢chiah koh講了」等,這是約伯第一pái表示,tī上帝面前家己確實是一個「無知」ê人。Kah頭前伊對hiah-ê來關心伊苦難ê朋友答辯ê時ê尖銳用詞kah傲慢態度完全無仝。

第5節,chit節有兩種看法,其一是:約伯承認家己ê無知,所以表示伊m̄敢koh再隨便發言。其二是:約伯已經提出伊ê問題,chit-má伊無想beh koh重複提出,無論上帝是m̄是beh koh再回答,對伊來講,lóng已經無koh是重要ê事loh。因為伊已經聽tio̍h上帝ê聲音à。

其實約伯並m̄是真正beh kah上帝辯論,因為伊深知上帝是公義ê上帝,伊mā知影上帝賞賜ê恩典非常豐富。伊真正用意,只是希望上帝親自對伊講話,伊就滿足à。因為án-ne,chit-má上帝回覆伊ê話,雖然上帝所講ê話,並m̄是beh回答約伯本來所提出ê問題,m̄-koh只要聽tio̍h上帝ê聲音,chìn前約伯所提出ê問題,對伊來講已經m̄是siōng重要ê à。Á上帝舉chiah-ê動物做對象為題材,主要lóng teh表示:chiah-ê動物、自然界ê環境現象,比起人類lóng強,mā lóng oh得控制,m̄-koh上帝尚且kāin管理得真好,真有秩序。人只要chē tùi chit方面思考,就會知影上帝mā teh管理tio̍h kui個人類社會,只是人無法度理解上帝ê管理方式罷à。

第6到7節,chit兩節thang對照第三十八章1、3節。表示這是新段落ê開始,由「上主tùi旋風中向約伯講話」講起,上帝koh一pái要求約伯tio̍h「像一個有勇氣ê人」來回答問題。

第8節,chit節是kui本約伯記ê中心論點之一,約伯一直認為上帝對伊並「不公道」,而且自認受tio̍h委屈(參考十:8)。因為án-ne,約伯一直想beh kā家己受tio̍h委屈ê案情呈到上帝面前,並且一再強調伊想beh直接kah上帝辯論(參考九:32、十三:15b—18)。chit-má上帝問約伯,為甚麼指責祂「m̄-tio̍h」?

第9到10節,上帝問約伯「你像我仝款強大mah?」chit種回答真特別,祂用實例來質疑地約伯ê能力,伊問約伯是m̄是ē-tàng發出「隆隆雷聲」?這是hō͘人一聽tio̍h就驚惶ê聲音,因為chit種聲音teh代表上帝出現(參考出埃及記十九:16、二十:18)。上帝beh約伯用「尊貴莊嚴」作裝飾,看kám-ē-tàng kā家己裝扮得親像一個君王仝款,有榮耀、莊嚴,hō͘人一看就肅然起敬。Á聖經卻講上帝用天頂ê日月星辰作裝飾,hō͘人感覺宇宙非常浩瀚súi,而sìh-nà hō͘人看tio̍h就會有肅敬之心。Mā thang án-ne講,kui個受造ê宇宙萬物lóng thang做為上帝榮耀ê記號(參考詩篇九十三:1、九十六:4—6)。 

第11到13節,chit段經文thang參考以賽亞書第十三章11到13節。

上帝beh hō͘約伯知影,真正公平,就是hō͘ hiah-ê「狂傲ê人」,知影家己ê卑微;hō͘ hiah-ê「驕傲ê人」,tùi高貴ê地位傾倒(參考路加福音一:51—52),koh khah重要ê,甚麼人有權kā in下放到「陰間」(參考路加福音十二:4—6)?只有上帝而已。Chit三節mā有意思beh表明,連邪惡ê氣力,lóng tī上帝ê管理中。雖然上帝並無消滅chiah-ê邪惡力量,m̄-koh上帝ē-tàng掌控chiah-ê邪惡ê氣力。

第14節,這是回應第9節所提起ê問題,上帝teh問約伯是m̄是ē-tàng親像祂仝款?若是,就是伊贏了,上帝輸à。其實約伯根本無可能贏過上帝,這是一句諷刺ê問話。

第15到18節,chia舉「巨獸河馬」為例。河馬,這是陸地動物中第三大型ê,siōng大ê應該是大象,然後是犀牛。河馬mā是古代埃及尼羅河ê特產,河馬不時被埃及形容是「天下ê巨獸」á是「怪獸」。上帝講祂造河馬mā造約伯表示人kah河馬lóng是上帝所創造ê,chit種講法是teh表示:比起河馬,人確實是軟弱真chē。因為牠氣力真大,連鱷魚mā m̄敢侵犯牠,因為只要牠ê腳一踏落去,鱷魚mā難逃死亡。牠有「結實」ê「肌肉」。河馬ê「尾溜像香柏樹khiā立」,意思是真粗壯、結實。作者用河馬來kah人相比,其實是teh幫助約伯去思考一件事:仝款lóng是上帝所造ê物,比起河馬,人是hit種ê渺小,koh有甚麼好誇耀ê?

第19到24節,上帝用河馬說明一件事,像河馬chit種龐大巨獸,人對牠lóng無駕馭ê能力,m̄-koh tī上帝手中,卻ē-tàng真容易地就「擊敗牠」。表示chit種怪獸,mā是真順服上帝。上帝問約伯是甚麼人餵食河馬?飼河馬?河馬m̄是肉食動物,卻是草食動物,m̄-koh牠m̄驚其牠動物ê侵害。M̄-nā án-ne,上帝iáu特別「為牠長了thang食ê草料」,hō͘河馬可來安然生活,bē餓死。牠bē因為「倒tī刺phè ê叢林下」而受傷,反tńg thang kā刺phè當做爽快ê床鋪,可見牠ê皮膚真厚。牠thang tī「溪邊ê柳樹」、「刺phè ê叢林」,來去自如。Koh khah特別ê是牠並無因為氾濫季節來臨而擔憂,因為牠強壯碩大ê身軀,夠額抵擋氾濫河水ê沖擊。無任何人有能力thang「蒙tòa牠ê目睭」,雖然講牠ê視覺真差,m̄-koh嗅覺真敏銳。當人接近牠ê時chūn,牠一聞到無仝ê氣味,就會趕關ân氣潛入水中,逃避危險。Koh加上牠有強大ê氣力,想beh捕掠牠,確實難上加難。

重新查詢 專卷研經 約伯記系列
錯誤回報,請聯繫