約伯記 4章1節 到 4章21節   背景資料  上一筆  下一筆
Tùi chit章開始直到十四章止,lóng是約伯ê朋友kah伊ê第一回合對話。Á其中第四章到七章是提幔人以利法kah約伯ê對話。開始ê第四到五章,是提幔人以利法對約伯表示哀傷ê心境表達看法,然後第六到七章是約伯回答以利法ê講法。

Teh傳統上,以色列人真清楚絕對bē-tàng對上帝發怨言。In認為做一個人對上帝發出強烈抗議之言論ê時,會為性命帶來災難(參考民數記十四:26—38)。Tī in ê觀念中,災難kah人ê罪惡有密切關係,因為he是上帝對人犯罪ê懲罰。因為án-ne,約伯ê chiah-ê朋友認為約伯必定是犯嚴重ê罪,chiah會遭遇án-ne重大ê災難。如果是án-ne,約伯就應該tio̍h認罪悔改,bē-tàng對上帝發怨言。因為án-ne,chit位siōng年長ê朋友決定提出伊ê看法,阻止約伯發怨言,免得惹起上帝ê忿怒遇tio̍h上帝koh-khah嚴厲ê懲罰。

第1到2節:提幔人以利法事(tāi)先發言,伊可能是chit三位朋友中年齡siōng長ê一位,因為án-ne,每pái lóng是由伊開始發言(參考十五:1、廿二:1)。以利法mā表示伊之所以beh搶tio̍h發言,是因為受不了「久長ê沉默」,因為in chit三個朋友有長到「七工七夜」靜默不語,teh陪伴約伯。

第3到4節,chit兩節看起來kah-ná teh鼓勵約伯,肯定伊過去所做ê。M̄-koh其實,mā teh暗中諷刺約伯過去行善,是因為「有利可圖」,若無應該是親像箴言所強調會「善有善報」chiah-tio̍h,怎樣taⁿ卻是災難連連?

第5到6節,chit兩節tú好kah第3到4節成相對內容;tī第3到4節o-ló約伯teh教導別人方面有好ê成果,第5到6 chit兩節soah講當災難臨身ê時,約伯顯露出來ê,卻kah伊過去teh教導別人ê相違背。換句話講,以利法認為約伯kan-taⁿ會教導別人,真ê家己身處患難ê時,卻做bē到。Tī以利法ê觀點裡,一個知影「敬畏」上帝ê人,就是對上帝有信心、有ǹg望ê人。Taⁿ約伯卻對上帝連續發出哀怨之言,顯然伊並m̄是真正「敬虔」ê人。換句話講,tùi以利法ê話中,已經對約伯tī信心上ê純潔度kah真實情況提出疑問。

第7到9節,chit段經文是非常典型ê「箴言」論調:善有善報、惡有惡報(參考箴言十:27—30)。以利法提出一個普世原則,he就是箴言所強調ê:善有善報、惡有惡報。以利法用當時社會種作ê經驗,說明一個性命哲理:好心得好報,pháiⁿ人自食惡果。以利法ê講法已經是teh懷疑約伯可能bat做真chē pháiⁿ事,卻隱藏得非常好,hō͘大家lóng認為伊是一個好人。因為如果約伯真正是「正直ê人」,上帝必定會拯救伊脫離災難(參考箴言十一:21)。顯然地,約伯並m̄是真正好人,而必定是犯bē-tàng原諒ê重罪,chiah會有今á日chit種苦難,甚至是ài面對死亡ê威脅。以利法ê觀點tú好說明一般人久長以來ê觀念:種ê是甚麼因,收ê mā必定是甚麼果。所謂「種瓜得瓜」,chit種金科玉律ê講法(參考箴言廿二:8,何西阿書八:7、十:12a、13)。

其實,以利法所提出ê並m̄是甚麼深奧ê道理,卻是一般生活中所經驗到ê道德規律。

第10到11節,以利法用「獅」來說明邪惡力量真大,無人ē-tàng阻止hit種ná親像猛獅咆哮般ê邪惡,m̄-koh上帝卻thang輕易kā chit種力量消滅。

第12到15節,以利法用夢來解釋上帝ê懲罰,就是所講ê做惡夢。Chit種惡夢甚至會hō͘伊感覺「全身pi̍h-pi̍h-chhoah」、「毛髮khiā立」,hō͘伊心生驚惶之態。

第16到17節,以利法講伊tī眠夢中看見某種形像出現,m̄-koh伊無法度辨認出來。不過伊卻聽tio̍h「聲音」。Chit-ê聲音表示無任何人thang khiā tī上帝面前而自認是「純潔」、「義人」ê人。

    以利法ê chiah-ê講法顯然並無真正明白約伯所tú-tio̍h ê處境,因為並m̄是伊有甚麼錯,卻是上帝允准伊受tio̍h撒旦ê折磨。Koh講,tùi開始到chit-má,約伯並無直接抱怨上帝tī伊身上所發生ê事,伊只是抱怨性命ê苦難,若beh生存tī苦難中,不如bē出世來得好。

第18到19節,chit段是繼續前段經文第17節所提起ê,甚麼人chiah是真正無罪ê人?甚麼人chiah是所謂「義人」?其實,除了上帝以外,世間無所謂「好人」(參考詩篇十四:1—3),包括天頂ê天使mā是仝款。以利法提出ê一個基本ê論調:如果連天使lóng無法度被列入純潔、無瑕疵ê族群,koh khah何況是人?會朽爛敗壞ê人,怎樣ē-tàng kah天使相比?Chit兩節lóng提起人性命ê目nih-á,無法度想親像上帝ê無限kah永恆(參考詩篇三十九:5、九十:3—6)。人可能連家己犯罪lóng m̄知,結果瞬間ê性命,一下á就無了,連tio̍h悔改ê時間mā無,án-ne就真可惜。以利法就是beh約伯趕緊悔改,m̄-thang一直停留tī自怨自哀。

第20到21節,以利法繼續用以色列人民生活ê經驗來說明性命ê脆弱kah有限。照以利法ê看法,人ê性命是án-ne脆弱,而且渺小到「無人chhap」。Á siōng悲哀ê事,to̍h是當人死去,猶原是hiah-ni̍h-á「愚昧無知」,伊驚約伯會án-ne。

Thang án-ne瞭解:約伯並m̄是m̄知人ê渺小,伊只是想beh知影一件事:如果好人lóng會tú-tio̍h災難,án-ne,上帝beh用甚麼款ê人來替祂管理祂親手所創造ê世界,而且ē-tàng hō͘ chit-ê世界有秩序thang循?如果好人kah pháiⁿ人無區分,mā會受tio̍h án-ne大ê苦難,ná chit種世界koh tio̍h án怎符合上帝創造ê旨意?
重新查詢 專卷研經 約伯記系列
錯誤回報,請聯繫