約伯記 38章1節 到 38章41節   背景資料  上一筆  下一筆
Tùi chit章開始直到第四十一章止,是上帝回答約伯連續提出ê問題。然續後落來tī第四十二章1到6節是約伯簡略回答上帝所提出來ê真chē問題。Kui本約伯記siōng重要ê部分,mā是Tī chit段上帝回答約伯提出詢問苦難ê原因。M̄-koh tio̍h注意ê是上帝並無直接hō͘約伯答案,反tńg向約伯提出連串ê問題。這說明一件事:約伯所期待ê,是上帝針對伊ê問題作答,m̄-koh上帝ê回答卻是beh約伯tùi kui個宇宙萬物存在ê奧秘來思考,而chiah-ê lóng是上帝創造ê。就tī chit中間,約伯chiah發見家己根本就是kui個宇宙萬物中ê小丁點,原本約伯自認為真偉大,會曉非常chē,其實並m̄是án-ne。

Tī chit段經文中,作者用「上主tùi旋風中向約伯講話」做踏話頭,表示上帝ê偉大,ná親像人看見旋風會懍neh驚惶仝款,因為只要旋風一轉向到人ê身上,人kā失去影跡。這bat幫助約伯明白家己ê問題所在:上帝無回答人類提出ê任何問題。因為所有ê答案lóng tī祂ê創造中,只要人小khóa細膩去觀察、注意看,就會知影。約伯siōng大ê收成,就是tī chit種走chhōe解答ê過程中,tī信仰上有明顯ê成長,而最後chiah發見家己ê問題所在。

Tī上帝chit段回答約伯ê問題中,thang分做兩個大段落,一是tùi第三十八章1節到第四十章2節,然後約伯有簡短ê回答(四十:3—5),二是第四十章6節到第四十一章34節,然後約伯第二pái回答(四十二:1—6)。約伯每pái回答,lóng對家己過去ê無知表示懊悔。顯然地,當約伯聽上帝所提出ê問題了後,chiah發見家己chìn前理直氣壯想beh kah上帝辯論ê想法,lóng已經改變à。這mā說明約伯看tio̍h家己kah上帝之間帶有極大ê落差,這mā tú親像先知以賽亞所講ê::「上主講:我ê 念頭m̄ 是lín ê 念頭,lín ê 路m̄ 是我ê 路。因為天án 怎khah koân 地,我ê 路mā án-ne khah koân lín ê 路,我ê 念頭khah koân lín ê 念頭。(全民版)」(以賽亞書五十五:8—9)

Chit章tùi第4節開始,上帝連續用真chē無仝ê受造物,向約伯發問,chiah-ê受造物包括天kah地(第4到7節)、海洋(第8到11節、16節)、日頭(第12到15節)、陰間(第17節)、光kah暗(第19到20節)、氣候(第22到30節、34到38節)、星辰(第31到33節)等,宇宙萬物lóng是上帝所創造,上帝用chiah-ê屬tī祂創造ê一切,mā是人看做「自然」,á是認為浩瀚偉大ê景象,甚至是無法度理解ê kui個寰宇現象來向約伯提出質問。主要lóng繞tī一個基本問題上:人對上帝所造ê宇宙萬物認bat jōa-chē?其實,上帝就是tī問約伯:你bat jōa-chē?

第1節,這是第一pái「tùi旋風中向約伯講話」,第二pái是tī第四十章6節。這mā是約伯所期待得tio̍h ê,tī頭前有kúi-nā pái約伯一再向上帝提出問題,希望上帝kah伊對話,伊tio̍h kah上帝理論、答辯(參考九:32—33、十三:3、22、廿三:3—7、三十一:35、37)。Chia ê「旋風」,mā thang當做「暴風」解釋,通常是用來形容上帝臨在ê方式之一(參考詩篇五十:3,撒迦利亞書九:14)。這是一種hō͘人看見、聽tio̍h就會懍neh心驚ê一種方式。

第2節,「你是甚麼人」,這是上帝直接向約伯提出質疑地。上帝問約伯ná會對上帝ê智慧「表示懷疑」。Tī chia「智慧」一詞,mā表示上帝創造ê奧秘kah祂ê計畫kah旨意(參考詩篇三十三:11,箴言十九:21)。
第3到7節,chit-má上帝beh約伯「像一個有勇氣ê人」,原本意思是teh指「像一個人」á是「像一個cha-po͘人」。本來是約伯teh向上帝質問伊苦難ê由來,chit-má是上帝beh伊khiā起來回答上帝所提出ê問題。上帝m̄-nā無回答,卻是提出問題ài約伯回答。上帝開始tùi祂創造開始來問約伯,hit時伊tī tó位?換句話講,人根本m̄知上帝是怎樣創造世界ê。因為連人mā是上帝所創造ê。既然約伯家己認為真無辜,甚至懷疑上帝,祂顛倒tio̍h問問約伯kui個受造ê宇宙,是甚麼人kā它規劃出來,以及怎樣hō͘大地親像一個有「支柱」支撐tio̍h。

    Chit段經文是kā上帝譬喻為一個建築師,對tī祂所創造ê一切,無論是設計á是製造ê過程,lóng是經過祂細密ê計劃了後chiah進行ê。當上帝創造完成ê時,天頂ê天使lóng「歡呼」歌頌,m̄-koh上帝問約伯,hit時chūn伊tī tó位?

第8到11節,chit段經文上帝是用海洋來做問題ê主軸。Tī以色列文化中,海洋á是大海通常表示烏暗á是惡勢力ê所在地。M̄-koh上帝kā它譬喻ná親像老母生gín-á仝款,大海是tùi大地生出來。然後上帝用奇特ê方法kā大海「關閉」、「擋止」,hō͘ chit種代表惡勢力ê大海控制tòa ê,而這並m̄是人ê氣力,卻是上帝。上帝mā用雲彩當做裹布,thang kā大海「包裹」起來,就ná親像老母用布包 tú出世ê嬰á仝款。並且對大海下一個命令,hō͘「海水」有「界限」,然後右設「門閂」,hō͘海水bē致使氾濫造成災害。

第12到15節,chia上帝用「光」來表示伊奇妙ê創造能力。Á「日光」是上帝創造中siōng奇特ê,因為有「曙光照臨大地」,chiah ē-tàng kā人siōng驚惶ê烏夜,mā就是hit-ê「隱藏」tī看bē-tio̍h ê所在ê邪惡勢力hō͘「趕出來」。Mā因為有「日光」ê照耀,大地ná親像「土上ê印記」。Chia ê「印戳」一詞,表示「紅色」,ná親像炎熱ê陽光照tī大地,hō͘一切看起來ná親像被熨斗燙過ê衫褲仝款,筆直ê山嶺kah山谷間ê鴻溝,有非常清楚ê分界。Mā因為「日時頭ê亮光強烈」,án-ne就ē-tàng「hō͘邪惡ê人」退卻,m̄敢koh再「為非作pháiⁿ」。這表示:只有邪惡ê人chiah會利用烏夜隱藏家己,免得惡質ê行為被發見。M̄-koh卻無法度逃離上帝鑒察之眼。因為祂是創造日光ê主,bē受tio̍h限制。

第16到18節,chit段是用「陰間」來形容上帝ê能力kah到深遠ê陰間、深淵中。Chia提起「海ê深處」,指ê意思就是烏暗。Thang用「深淵」來代表。「深淵」mā teh代表魔鬼、撒旦藏身ê所在。上帝懲罰人siōng嚴厲ê方式,就是kā人關tī「深淵」中。被關tī「深淵」ê人,beh經過一千年chiah ē-tàng被暫時釋放出來(參考啟示錄二十:1—4)。Á chia ê「陰間」,這是teh指死人去ê所在。M̄-koh上帝mā是「陰間」ê主宰。如果人無法度超越「陰間」,án-ne,koh怎樣ē-tàng kah上帝比能力?怎樣ē-tàng要求上帝kah伊對換位置,由約伯當控告者,上帝當被告neh(參考約伯記十三:22)?而第18節是一句諷刺ê句話,其實,無人知影chit-ê世界有jōa大。因為chia所講ê「世界」,是包括地下腳ê「陰間」在內,而這是一種宗教性ê用語,表示人無法度用尺á是任何量器去衡量ê另外一個世界。

第19到21節,chit三節經文是用「光kah暗」來問約伯對chit兩項知影jōa-chē?上帝問約伯「光tùi何處來」、「烏暗ê源頭tī tó位」chit種問題,mā等於提出創造之初ê問題,kah第4節所提ê問題仝款。如果是發生tī創造之初,人iáu未出現ê時chūn,人就無法度解答chit種問題。若是無法度解答第19節ê問題,就koh khah無法度解釋chit節所提ê「送tńg去原處」,因為m̄知光kah暗tùi tó位來,koh怎樣ē-tàng kā它送tńg去?續落來上帝用真諷刺ê話講約伯就親像上帝ê年齡仝款久,看tio̍h上帝ê創造。當然這是無可能ê事。因為人ê性命ná親像吐一口氣而已,真緊to̍h會消失(參考詩篇九十:4、9)。

第22到30節,chit段經文主要以氣候ê變化來說明上帝奇妙ê作為,這氣候ê變換,包括雪、雹、陽光、東風、大雨、雷電、露珠、冰、霜等,chiah-ê即使tī科技chiah-nṳ̍h發達ê今á日,人iáu無法度事先掌握氣象,只有ē-tàng跟tòe大氣ê變化,等待氣候恢復平靜,人chiah ē-tàng繼續行動。上帝問約伯有無看過收容雪ê「雪庫」á是冰雹ê「雹倉」,而上帝用chiah-ê當做工具使用,用來懲罰悖逆ê子民。然後上帝提起「日頭」kah「東風」,上帝問約伯是m̄是知影chit兩項khǹg tī tó位?而「雷電」kah「大雨」二者有密切關係。河川是因為落雨切割地面而形成。上帝用「大雨挖掘水道」,chit種巧奪天工ê氣力,已經大大超過人所ē-tàng想像會tio̍h ê範圍。上帝mā tio̍h「落雨」tī無人khiā起ê所在,mā tī hit種地方thang看tio̍h真chē花草樹木,滋養tio̍h野獸、爬蟲,kah飛鳥。Chiah-ê lóng teh表示上帝ê仁慈,hō͘大地、萬物kah人,一切受造物lóng ē-tàng享受祂ê恩澤。 
Tī chit段經文中ê最後,上帝用雨水、露珠、冰、霜等來說明祂創造ê奧秘,而chiah-ê lóng m̄是人ê手,á是能力所ē-tàng造出來ê。第28到29節,是對稱ê兩句詩歌,主要teh說明上帝創造ê奇妙。Chia用老父kah老母,以及生產,來表示上帝看chiah-ê ná親像親生ê仝款。因為有chiah-ê,人ê性命chiah ē-tàng保存,大地ê萬物mā因為án-ne得tio̍h滋養性命ê糧食。連hō͘水結成冰,堅硬ná親像石頭,mā是上帝奇妙ê創造chiah成。
第31到33節,「昴星」,這是teh指南方ê星宿,表示溫暖ê意思。Á「參星」,是teh指北方ê星宿,teh代表寒冷。「群星」,mā teh表示當「季節」替換ê時,就有無仝ê星辰teh引chhōa tio̍h氣候變化,而chiah-ê lóng一定tio̍h聽從上帝ê旨意,m̄是人teh控制。星辰ê運轉有一定ê「定律」,所謂「定律」,指ê就是一定ê秩序,是上帝teh管理。

第34到38節,chia上帝詰問約伯,伊ē-tàng向「雲彩」、「大雨」、「sìh-nà」下命令否?其實,人若m̄是創造者,受造物就bē聽從。因為受造物只聽從造物主ê命令,而萬物ê創造主就是上帝。

續落來上帝提起空中ê飛鳥,祂特別提起「朱鷺鳥」,chit種鳥koh稱做「鸛鳥」,一種tī尼羅河流域不時出現ê鳥類,喜愛食蛇、爬蟲類,因為án-ne被看做是「益鳥」。因為傳說中,chit種鳥會發生哀鳴ê聲音,向hiah-ê人預告尼羅河會氾濫。因為án-ne,埃及有人kā它當做神明敬拜。M̄-koh mā因為埃及人膜拜chit種鳥,tī摩西律法中禁止食用chit種鳥,mā m̄准用tī獻祭,beh kā它當做無清氣ê鳥類看待(參考利未記十一:19)。Á「雄雞」,這是一種會報ê時ê雞,古早人飼養chit種「雄雞」當做ê時辰ê計ê時器,mā因為án-ne被稱做有「智慧ê動物」。上帝問約伯,甚麼人教chiah-ê鳥類有chiah-ê奇妙ê知識?伊是m̄是知影雲彩有jōa-chē朵?á是甚麼時chūn beh kā雲彩裝tio̍h ê雨水降落來,hō͘土成做淤泥「ân-ân黏結」做伙?而chiah-ê lóng只有上帝所掌管,m̄是人ê能力ē-tàng造成。

    第39到41節,tùi三十八章39節開始,一直到第三十九章30節止,lóng是用動物為例,表明連地上ê動物,kah空中ê飛鳥mā lóng thang做上帝ê見證者。Chiah-ê動物包括有:獅、烏鴉、野山羊、野鹿、野驢á、野牛、鴕鳥、馬、la̍h-hio̍h、兀鷹等。

「獅」,這是聖經中描述siōng強壯、凶猛ê動物,無任何動物比得上牠(參考箴言三十:30),甚至會用獅咆哮ê聲音來比並上帝講話ê聲勢,令聽tio̍h ê人膽戰心驚(參考阿摩司書三:8)。既然人驚惶獅,koh怎樣ē-tàng養飼獅?m̄-koh上帝卻真自然tek養飼所有野地上所有ê獅,包括小獅在內,上帝lóng hō͘ in lóng無欠缺(參考詩篇一○四:21—22)。約伯記ê作者想beh表達一個中心思想:上帝m̄是只照顧人類而已,祂創造ê其他萬物mā需要看顧、養飼。Á上帝賞賜hō͘人類ê siōng chē,hō͘人類ê手thang做真chē事,因為án-ne上帝kā祂所創造ê世界交hō͘人類管理,m̄-koh人類顯然並無盡責。Á「烏鴉」,屬tī空中ê飛鳥之一。Ná親像耶穌所講「in不種m̄收,無倉無庫,上帝尚且飼養in」(參考路加福音十二:24)。

以上chiah-ê lóng teh表明一個基本觀念:人ê能力實在是真微薄、弱小。這只有koh再謙卑ê人ê身上chiah會明白。約伯若是知影謙卑,態度就bē親像頭前hit種à。

重新查詢 專卷研經 約伯記系列
錯誤回報,請聯繫