約伯記 36章1節 到 36章21節   背景資料  上一筆  下一筆
Tī以利戶ê言論中thang看tio̍h伊ê中心思想裡有一非常重要ê觀念:性命tī苦難中,有上帝美好ê旨意(參考三十三:15—19)。Tī這章經文中,伊重申chit種觀念ê重要性。以利戶想beh kā約伯講ê是:約伯是無法度看見上帝ê,而上帝mā bē直接回答約伯ê話。不過,tùi約伯記第三十八到四十一章,就thang看見以利戶chit種獨斷ê論調並無正確。這tú好顯露出人ê錯誤:想替上帝做決定。

以利戶一直感覺約伯ê三個朋友並m̄是真有智慧ê人,伊認為in ê言論只有hō͘約伯koh khah艱苦心,因為in並無講出智慧ê言論,thang hō͘約伯心服口服。當伊tī批評以利法等三個人ê問題ê時,伊同時進一步闡述家己ê觀點,而且認為家己之觀點足thang代表上帝ê看法(參考三十三:3—7)。然後以利戶進一步宣告伊所認bat ê上帝,伊勸勉約伯,用正確ê態度面對苦難。

    第1到2節,以利戶認為伊「tio̍h替上帝講一kóa話」,意思是teh指伊所beh講ê,lóng是公正ê,伊希望約伯會「耐心聽」伊繼續講落去。

第3到4節,以利戶自認「所知影ê範圍真廣」,伊beh kā約伯講「創造主」是「公正」ê,而且強調家己所講ê話是「真實無偽」,並且會hō͘約伯認bat伊就是「一個真有智慧ê人」。以利戶chit種講詞容易陷入一種危險,就是自認為是上帝ê代言人。

第5到7節,chit三節ē-sái講是以利戶tī最後chit段談話中siōng重要ê一句話。Tī chia伊講出上帝幾個特別ê屬性:
一是偉大ê上帝,絕對bē「輕視」任何一個性命,這ná親像詩篇第一一六篇15節,詩人所講ê,tī上帝ê心目中,任何一個子民往生,lóng是非常痛惜ê事。

二是上帝是一個無所不知ê上帝(參考三十四:21、25)。Tī上帝,無祂「bē明白ê事」。

三是會替「窮苦人伸張正義」,mā會「保護正直人」。

    Tī chia,以利戶特別強調上帝絕對「無容允罪人活teh」,祂一定會嚴厲懲罰罪人。

Tùi第8到12節,thang看出以利戶並無回答約伯之所以受苦難ê問題,伊kā問題帶tńg來到一個基本觀念:苦難、困境,lóng是kah上帝ê美好旨意有關,為tio̍h是beh教導人改邪歸正。以利戶強調人會有「受鎖鍊捆縛」,是「因為in ê行為tú-tio̍h苦難」,chit種講法是非常傳統ê「善有善報、惡有惡報」,而這tú好是約伯beh質疑ê觀念。續落來伊講上帝就是用chit種方式ài chit種人知影家己ê罪過,就是kah「狂妄自大」有關,而這是上帝siōng無歡喜ê人。因為chit種人ná親像詩人所講ê,in心中無上帝。以利戶ài約伯清楚,只要伊會「順從」上帝ê帶領,就會得tio̍h上帝ê祝福,並且ē-tàng「安享世間ê日子」。若無,會因為án-ne而無法度得tio̍h上帝ê祝福,反tńg會帶來詛咒、審判,而被落去到「陰間」,這mā是以利戶第二pái提出ê警告(參考三十三:17—18)。

Chia所謂「無知無識地死去」是teh指一個人進入到無知識ê領域去,甚麼mā無學tio̍h就死去。Án-ne看起來,Tī以利戶ê性命觀中,一個人活teh ê日子siōng重要ê就是學習認bat上帝。因為認bat上帝,就會明白家己是人,m̄是神。

第13到15節,以利戶講「m̄敬畏上帝ê人」,就算已經受tio̍h嚴厲懲罰,mā bē想tio̍h悔改歸向上帝。以利戶ê chit句話已經teh表示約伯就是一個m̄敬畏上帝ê人,因為約伯已經痛苦到chit種程度了,iáu m̄承認家己犯罪,祈求上帝赦免、赦免。莫怪in-tau裡ê gín-á會「命短夭折」,上帝就是用chit種禍患來教示約伯,好「開啟」伊ê「目睭」看清事實。

以利戶ê kui個思想基礎是:上帝「以苦難教示人」認bat祂。Án-ne,以利戶khah強調ê是:苦難,並無盡然lóng是pháiⁿ ê,有時mā是上帝hō͘人ê一種功課,hō͘人thang學習認bat家己ê軟弱kah錯誤(參考三十三:19),好藉這來「開啟人ê目睭」。

第16節,tùi chit節開始,以後ê經文kah-ná遺落了一kóa資料,因為有kóa經文ê頂下節內容無法度連貫。

以利戶tī-chia勸勉約伯一定會走chhōe上帝ê幫助,án-ne上帝會tùi「患難中救拔」伊,並且恢復約伯本來ê榮耀。

第17節,「chit-má你受了應得ê懲罰」,以利戶koh一pái強調約伯受tio̍h ê懲罰kah伊所犯ê罪有關,因為上帝ê審判是公義ê(參考三十四:10—12),上帝絕對bē冤屈好人,á是做出無正確ê審判。

第18到19節,chit兩節是相對句。以利戶提醒約伯,千萬m̄-thang被「財富」所影響,因為「財富」真容易hō͘人受tio̍h誘惑而棄sak上帝ê法則。以利戶特別提起m̄-thang被「o͘-se」hō͘騙去,chia ê「o͘-se」原本指ê是「贖價」,意思是teh指有kóa人認為無甚麼事是用「o͘-se」無法度「贖價」tńg來ê。Chit種觀念ná親像俗語所講ê「有錢thang hō͘鬼推磨」。以利戶特別強調「財富」kah「大權力」對人無一定有幫助獲利益。

第20到21節,「烏夜」kah「列國覆滅」,這二詞lóng是teh代表亡。人m̄-thang認為ē-tàng用死亡來掩蓋所犯ê錯誤,因為連陰間mā是上帝所管轄ê所在(參考詩篇一三九:8、11—12)。為非作pháiⁿ ê人時常會期待「烏夜」來臨ê時刻(參考廿四:13—17),特別是當國家面臨滅亡ê時刻ê時,對貪婪ê人來講,to̍h是in發國難財ê好ê時機。M̄-koh別認為上帝m̄知chit種人心中phah ê主意,祂看kah非常清楚。因為上帝是無所不知、無所不在ê上帝,祂一定會報應。以利戶特別提醒約伯,若伊是一個聰明、有智慧ê人,就應該清楚知影伊所tú-tio̍h ê苦難,就是teh「警告」伊tio̍h遠離邪惡。

重新查詢 專卷研經 約伯記系列
錯誤回報,請聯繫