約伯記 33章23節 到 33章33節   背景資料  上一筆  下一筆
Tī前段講述上帝ê啟示,為tio̍h是beh hō͘人明白祂ê旨意,希望透過chit種方式,hō͘人知影chhōe-tio̍h上帝拯救ê道路。Tī chit段經文中以利戶進一步提起,天使mā會幫人tī上帝面前講好話,為tio̍h是beh hō͘人免受刑罰。M̄-koh先決條件是人一定tio̍h知影認罪、悔改,若無,天使mā oh得開嘴。

第23到24節,以利戶講tī上帝ê身邊有數算不盡ê天使,m̄-koh有一位「中介者」,thang幫助人行正確ê道路,做「所該盡ê本份」。以利戶會án-ne講,是因為約伯一再期待有一個中介者,thang hō͘伊kah上帝之間,有一個媒介(參考九:32—35、十六:19、21、十九:25)。以利戶講,chit位人kah上帝之間ê媒介天使,會向上帝陳情,請求上帝赦免「憐憫」,hō͘人m̄免被判刑而下「深坑」。

第25到26節,以利戶認為,只要向上帝祈禱,約伯身上ê疾病一定會得tio̍h醫,hō͘伊thang像以前hit種,以「愉快ê心敬拜上帝」。

第27到28節,m̄-koh祈求上帝醫,siōng基本ê要件,就是承認家己「有罪」。以利戶其實是teh指責約伯一直m̄承認家己有罪,而且一再否認家己犯罪,是上帝「故意」kā苦難加tī伊身上。因為án-ne,即使天使想beh替伊向上帝參詳拜託mā難。Taⁿ,siōng重要ê,就是beh約伯真心祈禱,悔改認罪,上帝一定會赦免伊所犯ê罪。chiah ē-tàng免tī「墜入死亡ê深坑」。以利戶是teh警告約伯,伊若m̄知真心悔改,向上帝祈求,一定無法度tùi死亡中被救贖。

第29到30節,chit兩節mā是chit段經文ê結語。以利戶講上帝「接二連三」地做拯救ê工作,因為祂是慈疼上帝,祂只希望ē-tàng救人脫離「死亡ê深坑」,thang hō͘人ē-tàng「享受性命ê亮光」。因為án-ne,上帝施行拯救工作ê方式,就是差遣「天使」當「中介者」來幫助人。

第31到33節,以利戶希望約伯ē-tàng kā伊所講ê話聽入去。以利戶ài約伯「安靜」落來,意思是ài約伯mài搶beh做答,tio̍h慢慢思考所聽tio̍h ê話。因為約伯chìn前lóng會搶話提出辯解,chit-má以利戶mā希望約伯稍安勿躁,先「安靜」一下。伊並且對約伯表示只要伊講得有道理,伊一定會「承認」約伯所講ê「理直」。相對ê,若是約伯「m̄講」,án-ne,伊就beh繼續講落去。伊表示beh kā「智慧」教授hō͘約伯。

重新查詢 專卷研經 約伯記系列
錯誤回報,請聯繫