約伯記 32章1節 到 32章22節   背景資料  上一筆  下一筆
有bē少學者認為約伯記第三十二到三十七章,並m̄是chit本經冊本來ê資料,卻是後來加添入去ê。理由如下:

一、除了結語之外,其他部分並無提起約伯回應chit位少年人以利戶所講ê話。

二、Tī chit段長到六章ê經文中,作者ê筆法、思路、內容之結構,kah頭前三十一章ê內容大無相仝。

三、以利戶chit-ê名,無tī約伯記chit本經冊ê起頭就出現,mā無tī chit本經冊ê結尾看tio̍h。

M̄-koh mā有一種看法:認為這幾章經文mā是約伯記本來ê資料,因為tī起頭紹介以利戶ê時,就真清楚註明講伊是一個「旁觀者」,原本無想beh加入chit場辯論,m̄-koh聽tio̍h最後,伊認為是應該表達意見ê時chūn,因為án-ne講了這幾章經文記載ê內容。Mā可能是約伯和三位朋友共同請伊發表意見,伊chiah講出家己ê看法。M̄-koh無想tio̍h以利戶講出chiah-ni̍h chē話來。

    Chit章經文是以利戶開始回應約伯和chit三位朋友所講ê話。以利戶表示伊尊敬chiah-ê人是伊ê長輩,因為án-ne伊是等到大家lóng無koh講話ê時chūn chiah開始講,這mā表示以利戶是一個bat禮貌、有教養而且謙卑ê人。M̄-koh,tùi以利戶所講ê話ê內容來看,mā thang看出伊是一個真驕傲ê人,伊指出chit三位前輩講ê話,是無智慧ê話,mā因為án-ne chiah反駁約伯提出ê問題,iáu會hō͘約伯誤認上帝是一個無公義者。伊自認是hō͘逼kah一定tio̍h開嘴表達想法。

第1到5節,chit段經文先紹介在場有一位「旁觀者名叫以利戶」,chit-ê名ê意思是:祂是我ê上帝。然後說明為何伊會開嘴回應約伯和其他三位朋友。一開始tī chia就講「因為約伯堅持家己ê無辜」,這mā表示約伯和以利法、比勒達,kah瑣法等三人經過三個回合辯論落來,結果是各講各話,lóng無交集,因為án-ne,chit三個朋友發見講koh-khah chē mā是白費唇舌,而無koh講話。原本站tī邊á觀看ê以利戶對約伯「自認為義koh埋怨上帝」,而且聽tio̍h這以利法等三個朋友「既然m̄知怎樣回答約伯,無異默認上帝無理」,因為án-ne,伊受氣à,伊認為家己應該ài有所回應chiah thang。Chia mā特別講伊是所有朋友中「siōng少年」ê,chit句話mā說明東方ê傳統,少年人bē-tàng隨便tī序大講話ê時插嘴。

    第6到10節,chit段經文是以利戶teh解釋伊講話ê原因,而且伊尊敬chiah-ê人lóng是伊ê長輩,因為án-ne等到大家lóng無koh講ê時chūn,伊chiah開嘴,這mā是當時東方社會ê觀點,認為年長ê人,性命經歷豐富,tùi in ê「滿頭白髮」就thang顯示出in ê「智慧」(參考十五:10,箴言二十:29)。其實,當伊án-ne講ê時chūn,mā同時是teh暗喻tio̍h chit三位長輩並無甚麼智慧。以利戶tī chia強調「上帝ê靈,ē-tàng kā智慧賞賜hō͘世人」,然後tī第三十三章4節soah講「上帝ê靈」造伊,以利戶清楚指出家己有上帝賞賜ê智慧,因為伊是「上帝ê靈」造ê。伊mā講「年紀大無一定會增加人ê智慧」,chit句話原來ê意思是teh指「有智慧ê並無chē」,表示真正有智慧ê人少,即使年紀大了,mā無一定就會比較有智慧。這聽tī以利法等chit三位年長ê人耳裡,一定真oh過,這mā講出以利戶心中對三位前輩ê不滿。因為án-ne,伊表示beh講kóa「心內想講ê話」,希望chit三位長輩ē-tàng聽伊講看māi。

第11到14節,這四節經文thang分做第11到12節,以及第13到14節,m̄-koh這兩部分講ê lóng是仝一件事,就是以利戶對三位前輩無法度辯贏約伯而感覺失望。伊認為就是因為chit三位前輩並無注意聽約伯所講ê話,所以chiah「無人ē-tàng駁倒約伯ê話」。Chia所講ê「駁倒」,意思是hō͘對方佩服、順從ê意思。Tī以利戶ê看法,如果無法度說服約伯,駁倒伊ê觀點,就是無chhōe-tio̍h真實ê智慧,這mā表示in三人並m̄是真正認bat上帝。M̄-koh伊表示bē親像伊三人hit種回答約伯,因為in所講ê是無智慧ê話語。

    第15到16節,《現代中文》譯本聖經起頭用「約伯ah」chit-ê詞,會掠做是是以利戶teh對約伯講話。M̄-koh原希伯來文並無明顯註明伊是向甚麼人講話。Chit兩節thang看出以利戶mā是一個真驕傲ê少年人,伊講chit三個長輩lóng khiā tī hia「閉口不言」,因為án-ne,伊決定無koh「thèng候」,換家己來回答約伯所講ê話,這mā teh表示伊ê口才ē-tàng贏過頭前三個朋友。

    第17到19節,以利法ài kā家己ê看法講出來,表示伊ê見解必定是有智慧ê,而且伊chit-má ê心境是迫不急待想beh講hō͘約伯聽。以利戶講若家己koh再不講話,就會親像「裝滿新酒ê皮囊爆裂」,這是一句流行tī巴勒斯坦ê諺語,講新酒一定tio̍h裝tī新皮囊裡,chiah bē破裂(參考馬可福音二:22)。這表示應付新時代ê轉變,一定tio̍h有新ê思維。以利戶ê看法是hit三位長輩ê腦袋中,所存有ê觀念lóng是「陳腐」ê想法,伊ê chiah是新ê。

    第20到22節,以利戶表示伊beh講ê話bē偏袒任何人。以利戶án-ne講是teh表明家己ê立場公正、客觀,bē講「諂媚」ê話。「諂媚」,chit-ê詞ê意思是teh指虛假,kah欺騙仝款,bēhō͘ 上帝喜愛(參考十三:10)。

重新查詢 專卷研經 約伯記系列
錯誤回報,請聯繫