約伯記 22章1節 到 22章30節   背景資料  上一筆  下一筆
Tùi第廿二章開始,直到第三十一章止,是約伯kah三位朋友對話ê第三回合。(第一回合是tùi第三到十四章;第二回合是第十五到第廿一章。)tī chit第三回合中,插入無署名作者ê歌頌智慧ê第廿八章,雖然有kóa學者講是約伯講ê,m̄-koh mā有ê學者持無仝ê看法,認為這是後來編者加上ê,意見分歧。

關係第三回合thang看出一個編輯上ê特色,就是約伯和伊三位朋友之間ê對話非常緊khêng,彼此不時無等對方講完,就搶tńg來話。Tī這樣激烈ê搶答中間,約伯最後真感慨ê講出伊對性命ê看法,共長到三章ê篇幅。

Chit章開始mā是由提幔人以利法發言。Á值得注意ê是,伊ê講詞雖然用語iáu-koh犀利,m̄-koh最後用了一kóa鼓勵、安慰ê話語對約伯講話。Á比勒達iáu-koh kah過去仝款,大談上帝ê全能m̄是約伯thang理解ê,不斷ài約伯謙卑落來,承認家己ê錯誤kah有限,án-ne chiah ē-tàng明白上帝ê旨意。M̄-koh Tī chit段篇幅中,瑣法ê言論真少,大部分lóng是只有講幾句話,就被約伯phah斷,這可能kah瑣法提bē出新ê觀點有關pah。

第1到3節,伊開始就講「人對上帝有甚麼路用」、「好處」、「有益」、「幫助」?Chit種用疑問句型開始講話ê方式,mā是以利法kah約伯對話中ê特有方式(參考四:2、五:1、十五:2)。伊用一種帶有諷刺ê方式來講約伯,伊講約伯就算是自認有「智慧」、「行為正直」、「良善」等等,chiah-ê koh對上帝有甚麼特別ê所在?以利法chit種講詞,真清楚表達出一個觀念,mā是普遍基督徒所強調ê,就是人若無敬拜上帝,m̄-bat上帝,食虧ê是家己,並m̄是上帝。人無論chē有成就,lóng bē加添上帝ê光彩;仝款ê,人即使真惡質,mā bē對上帝有任何ê損害。Chit種觀念久長以來是信仰傳承上ê認知(參考箴言九:12)。因為上帝ê榮耀本來就已經超越一切,人ê榮耀並無會加添上帝ê榮耀,顛倒是人犯罪ē-sái上帝痛心。

第4到5節,以利法koh一pái強調上帝是公義ê,祂bē混亂秩序,賞罰是非常清楚ê,chit種講法mā是比勒達講過ê(參考八:3)。上帝對tī犯罪ê人必定會有嚴厲ê懲罰,並無會因為伊「敬畏上帝」,上帝就不懲罰。「敬畏」上帝ê人,上帝一定會照顧,而chit點mā是聖經一貫ê教導(參考詩篇三十三:18—19)。因為án-ne,以利法iáu-koh堅信約伯一定是犯嚴重ê罪,chiah會受tio̍h chiah-ni̍h重ê懲罰。以利法對約伯指控ê罪狀,tī第6到9節中有真詳細ê敘述。

第6到9節,Tī chit段經文中,以利法明確地指控約伯,講伊「剝光」了sàn-chhiah人ê衫褲,只為tio̍h beh sàn-chhiah人「iáu清欠款」。續落來伊指控約伯欺負sàn-chhiah人,tī in欠缺食物kah水ê時chūn,拒絕伸出援手。然後講約伯利用權勢「佔有所有ê土地」,這若是屬實,則約伯是犯真嚴重ê罪惡,因為tī先知ê文獻中,lóng bat對chit種行為提出嚴厲ê譴責。伊mā指控約伯,講伊欺負「寡婦」kah「孤兒」,當in向約伯求助ê時,約伯卻是富而不仁,吝嗇施捨,竟然叫「寡婦空手tńg去」,並且iáu欺負孤兒,「phah斷了孤兒ê手股頭」,chit種以惡質態度對待弱者ê行為是真嚴重ê罪過。

第10到11節,以利法認為約伯就是因為有犯頂面所講嚴重ê罪狀,因為án-ne,伊會面臨chiah-ê災難mā是理所當然ê事。伊講tī約伯ê「周圍有陷阱」,因為án-ne,當上帝懲罰伊ê時,就是tī伊生活ê四周佈滿仇敵,chiah-ê仇敵就會想出所有ê辦法設置各式各種ê陷阱來陷害伊,ná親像比勒達所講ê仝款(參考約伯記十八:8—10)。Mā因為án-ne chiah致使約伯被「驚惶」、「烏暗」、「大水」等包圍,意指hō͘伊陷入面臨死亡ê境況中。

    第12到14節,以利法講上帝雖然是khiā起tī高天之上,m̄-koh伊「俯視tio̍h高處ê星辰」,而邪惡人ê往往會認為上帝lóng m̄知世間人類所做所為,其實he是認為邪惡ê人心中chiah會有ê念頭,認為,「密雲」會遮天kah地之間ê空間,hō͘上帝無法度看清楚世間ê人做kóa甚麼事。以利法認為會chit種想ê人就是心內邪惡者。以利法chit種講詞,是意有所指地teh講約伯就是chit種人。

第15到17節,以利法認為約伯ná親像一個邪惡ê人,因為án-ne,伊特別警告約伯mài跟tòe邪惡人ê路徑。伊講邪惡ê人必定會早死,m̄免等到伊ê死期來臨。Mā只有邪惡者chiah會要求上帝遠離in,甚至認為「全能者」對伊mā無thang奈何。

第18到20節,以利法是用約伯所講ê話來打擊約伯,m̄-koh卻是故意誤用á是有曲解約伯ê本意。因為約伯是講邪惡者會曉誇耀家己ê成就,認為成功乃是伊個人努力ê成果,kah上帝ê賜福無關係。M̄-koh chiah-ni̍h惡質ê人,卻kah-ná mā無看tio̍h上帝對in會怎樣。以利法則認為約伯就是邪惡者,因為án-ne chiah會有chit種想法,並且講出來。因為án-ne,以利法koh一pái強調上帝必定會懲罰邪惡ê人。伊講當邪惡者hō͘ 上帝懲罰ê時,hiah-ê過去受盡苦難ê好人,一定會大大ê歡欣,即使是無辜受難者,mā會因為án-ne而感覺安慰。伊mā支持瑣法所講ê邪惡者所累積起來之財產lóng會被毀滅。

    第21到23節,以利法勸勉約伯:只要「kah上帝親善和好」,kā上帝ê「話牢牢記tī心內」,án-ne就會得tio̍h上帝ê賜福。Chit句話mā tú好反駁了約伯tī第廿一章7到8節所提起ê:是上帝hō͘邪惡人興旺、長壽、發達。Á tī以利法ê觀點中,認為約伯目前ê苦難,就是因為罪所造成,mā hō͘伊kah上帝之間ê關係受tio̍h破壞。伊ài約伯「謙卑tńg來到」上帝面前。Chia ê「tńg來到」,意思是teh指悔改。人只有悔改,chiah ē-tàng得tio̍h上帝ê憐憫kah疼惜。

第24到25節,chit兩節mā暗示了約伯失敗ê原因,就是因為teh過去興旺ê日子,約伯只注重財富、珍寶之類ê物質生活,而kā上帝ê話語kah教示hō͘ bē記得。

Thang kā第22到25節等等這四節經文,對照詩篇第十九篇7到11節,詩人講述上帝ê話kah教示遠比黃金、珍寶koh-khah貴重。因為án-ne,伊ài約伯用上帝來做伊性命ê「黃金」、「白銀」,chit種性命chiah會真實。

第26到28節,這是以利法koh一pái講述遵行上帝旨意ê人,會得tio̍h上帝ê賜福。Chiah-ê所謂「善有善報」ê觀念,á是所講ê「好人」會得tio̍h上帝特別ê看顧之類ê講法,tī以利法等chit三個朋友ê嘴中已經出現過真chē pái,親像:第五章17到27節,第十一章13到20節等等等。其實mā thang講,以利法已經m̄知iáu有甚麼好講ê,因為án-ne只好一再重複傳統ê信仰觀念。其實mā thang tùi chia看出以利法ê chiah-ê講詞中,有一個觀念真無正確,而且是危險,he就是伊認為kah上帝和好,就ē-tàng得tio̍h富裕ê物質生活。M̄-koh約伯記chit本經冊tú好佳哉說明:chit種信仰認知,是kā信仰建構tī「有利可圖」ê基礎上,mā是約伯記作者teh質疑ê重點主題:kám講chit-ê世界上無信仰真誠ê人?只是單純ê信,並無求任何利益回報。

第29到30節,tī以利法心中,約伯就是因為「驕傲」chiah聽bē落去in chiah-ê朋友ê勸勉,除非伊「謙卑」落來,án-ne chiah會得tio̍h上帝ê救恩。伊認為如果約伯chiâⁿ實「無辜」、「行為正直」,必定會得tio̍h上帝ê拯救。

重新查詢 專卷研經 約伯記系列
錯誤回報,請聯繫