約伯記 14章1節 到 14章22節   背景資料  上一筆  下一筆
Ná親像頭前已經提起過ê,約伯記tùi第十二章開始,到第十四章為止,這三章lóng是約伯回答拿瑪人瑣法ê話,是第一回合ê對話。約伯除了針對朋友所講ê來答覆之外,約伯mā同時kā家己對上帝ê信心kah遭遇苦難ê心路歷程鋪陳出來,這thang幫助讀者明白伊ê心境。

第十四章是約伯繼續向上帝陳述伊對性命ê看法,ná親像chìn前約伯一再強調過ê,性命既然án-ne短促,為甚麼iáu koh khah承受hiah-ni̍h chē痛苦?Tùi chit章ê經文mā反應出類似第十三章15節a句ê態度:「我已經無希望,即使上帝刣我koh怎樣?」chit種心態mā真親像第七章1到2節所提出ê性命觀,是真消極ê態度。Ē-sái講是約伯記siōng珍貴ê所在,是tī第十三章15節b句所講ê,即使tī siōng絕望ê時刻,mā無放棄希望,一定會爭取到最後ê做一睏為止。絕無放棄,這是約伯記kui本經冊ê中心思想。

第1到6節,chit段經文中thang看出約伯對性命採取悲觀ê態度。Chit種態度tī傳道書中不時出現,tī詩篇中mā thang看會tio̍h(參考詩篇三十九:5—6)。約伯用「軟弱」、「目nih-á」、「患難」等詞字,描述人性命ê有限,mā說明性命苦難ê景況。然後伊koh用「花草」、「影兒」來描述性命ê目nih-á、無影跡。Chiah-ê tī第七章6節、第九章25到26節mā有類似ê描述。雖然性命是án-ne,m̄-koh性命ê長短iáu是由上帝teh決定,是tī上帝ê掌握中,無人ē-tàng脫離上帝ê管轄。約伯想beh表達一個觀念:上帝真正會看顧性命án-ne目nih-á ê人類mah?伊用「肯看我一眼」來說明人ê卑微,實在是渺小到極點。約伯想beh講ê是:既然人ê性命hit種目nih-á、痛苦,ná親像花草般卑賤,上帝為甚麼iáu koh khah án-ne細膩地監視tio̍h人類?án-ne親密ê監視,等於是teh攪擾人平靜ê生活。Á tī約伯記第七章17到19節,認為上帝m̄-nā kā伊看kah真ân,甚至是連伊想beh嚥下一嘴唾沫,mā lóng hō͘ 上帝注目tio̍h。伊祈求上帝siōng好m̄-thang án-ne,因為人ná親像一個受雇ê工人,負擔ê工作已經hō͘伊真辛苦了,人每工工作mā只是為tio̍h beh生存落去。

第7到9節,tī chit三節經文中thang清楚看出約伯認為人ê性命比樹iáu koh khah無用;樹雖被phut落來,即使樹根已經衰老,甚至腐爛,只要有水就iáu會有生機,m̄-koh人卻m̄是án-ne,人只要一死就結束loh。注意第7節ê「被剉落來」chit-ê詞,表示這並m̄是家己ê因素,卻是被外在ê氣力摧毀。整段看起來有一種特殊涵意:人phut樹為tio̍h是beh hō͘樹再生出新ê枝來。M̄-koh人若hō͘ 上帝「刣死」,ē-tàng koh再koh活重生mah?

第10節,chit節講tio̍h人性命ê狀況反tńg kah第7到9節呈現顛倒ê現象;約伯tī chit節講出人ê性命遠不如朽木,只要一死就一去無koh tńg去。Chit種對性命ê看法,顯然比先知以賽亞ê看法iáu koh khah koh khah悲觀,因先知以賽亞講「人kah花草無兩樣」(參考以賽亞書四十:7)。約伯則認為人遠比朽爛ê木頭iáu不如。

第11到12節,江河lóng需要水,chiah ē-tàng表現出它存在ê意義kah價值,若無,即使koh再大ê河道,無水mā無價值。約伯用chit種方式teh譬喻一個人若是死,一切就無意義à。約伯想beh表達ê一個期待—人ê性命如果án-ne脆弱kah卑微,為甚麼上帝iáu koh khah追究人ê罪,hō͘人ê性命承受án-ne深重ê苦難?性命若是親像「一片落葉」á是親像一條枯乾ê「麥hiūⁿ」,iáu需要上帝用chit種方式追問查究mah?

    第13到14節,其實,約伯期待上帝m̄是真正消滅了伊,卻是kā伊「藏tī陰間」,這表示伊ê性命並無消失,只是hō͘「藏」了起來而已。原因是chit-má上帝正teh生氣,伊相信只要上帝ê受氣一過,就會koh再想tio̍h伊,甚至會歡喜伊(參考第15節)。Tī第14節提起真關鍵性ê字,就是「koh活」ê問題。Mā tùi chia thang看tio̍h「koh活」chit種觀念,並m̄是直到耶穌基督ê時代chiah有ê,卻是原本舊約ê時代就已經存在,而且深植tī猶太人ê文化中(參考以賽亞書廿六:19,但以理書十二:2—3)。

第15到17節,約伯對上帝有絕對ê信心,伊表示上帝會歡喜伊,mā會「呼喚」伊ê名,伊會kah上帝對話,這表示伊kah上帝之間有密切ê來往。Tī第16節chia thang看tio̍h約伯有改變看法;以前伊認為上帝觀察伊ê腳步,對伊監視ê非常嚴密(參考七:18—19),甚至連腳印lóng查驗過(參考十三:27)。M̄-koh chit-má約伯相信上帝雖然仝款嚴密觀察伊ê腳步,ē-sái講是並m̄是為tio̍h beh追究伊ê罪á是錯誤,而是beh照顧伊,扶持伊。因為án-ne,約伯對性命有一個期待,就是期待上帝赦免、憐憫伊,ē-tàng hō͘伊ê罪完全消除。Tī以色列人ê觀念中,罪就是帶來苦難ê主要因素,赦免所犯ê過失,mā等於是赦免所有ê chiah-ê罪過仝款。約伯相信只要上帝ê受氣一過,chiah-ê lóng會清楚明白,而且上帝會知影伊ê無辜,而hō͘所有發生tī伊身上ê苦難lóng消除掉。

    第18到22節,chit段詩歌koh一pái tńg來到12節以前ê陰沉狀況,對性命無koh存有任何ǹg望。Mā可能約伯是teh期待伊ê苦難隨時因為伊ê ǹg望來臨而消失,m̄-koh事實上並無án-ne,而hō͘伊感覺非常失望。Chit段話mā是約伯回答伊ê三個朋友ê結論。

    Tī第19節,伊講即使堅硬如石頭,mā會因為「水」ê沖刷而消失。譬喻人即使有非常堅定ê信心,mā會因為上帝ê冷漠、不回應,甚至不理睬而失去信心。約伯提起人是非常軟弱ê,這tùi對照第18 kah 19節就thang看出,如果山川大地lóng會因為上帝ê「懲罰」而走樣,koh khah何況是用土粉造出來ê人,必定會因為án-ne而面目全非而且無法度修復。Á設若人因為苦難而痛苦到極點ê時,就算伊ê kiáⁿ孫有jōa大ê成就,á是做出jōa-ni̍h-á見笑ê事,mā lóng bē有感覺à。約伯認為對飽受苦難ê人來講,chit種期待mā是屬tī空虛、不實在ê。因為性命是目nih-á ê,即使kiáⁿ孫真正有成就,對tī iáu tī苦難中ê人,mā無意義。因為這並bē-tàng安慰伊,因為伊身上猶原痛苦。約伯án-ne講,是teh表明一個性命體驗—苦難,hō͘人感覺性命ê意義盡失。

重新查詢 專卷研經 約伯記系列
錯誤回報,請聯繫