約伯記 1章1節 到 1章12節   背景資料  下一筆
約伯記第一到二章是kui本約伯記ê「序文」,tī chit兩章ê篇幅中,作者kā kui個故事人物做一個清楚交帶,包括事件ê背景kah約伯chit-ê人ê特質。講約伯是一個正直ê好人,敬畏上帝,m̄做任何pháiⁿ事。Tī這章ê序文中,是用上帝kah撒旦ê對話方式來進行,並且描述hiah-ê僕人一個接一個來向約伯報pháiⁿ消息ê描述,講出約伯ê苦難,竟然是tī上帝同意之下chiah發生。

    Chit段經文是紹介「約伯」chit-ê人,以及天庭開會ê情景。Chit種天庭開會ê情景,ē-sái講是約伯記chit本經冊siōng特別ê所在。作者透過chit種方式,teh強調一個中心思想:天頂ê決策,ē-tàng變更地上ê一切。

第1到3節,chit段經文先紹介約伯ê背景。其實「約伯」chit-ê名有含「攻擊者」,á是「被攻擊者」ê意思。M̄-koh chit種名kah chia所紹介ê「約伯」完全無相仝。「烏斯地區」,可能是tī約旦河以東ê地區,正確地點已經bē-tàng考。作者講「約伯」是「正直ê好人」。所講ê「正直」指ê是:一切遵照上帝ê教導去行。Á「好人」一詞,一再出現tī約伯記中,有時用「無thang指責」(參考八:20)、「清白」(參考九:20)、「無罪」(參考九:21、22)、「正直清白」(參考十二:4)。講約伯「m̄做任何pháiⁿ事」,意思是teh指遠離邪惡ê事,mā因為án-ne,chiah ē-tàng表達約伯是一個「正直ê好人」之生活態度。Kā「敬畏上帝」kah「m̄做任何pháiⁿ事」連做伙看,ná親像摩西律法上所要求以色列人民做到ê「疼上帝」,同時mā「tio̍h疼家己ê厝邊,親像疼家己仝款」(參考利未記十九:18)。約伯chit-ê人確實是做到à chit-ê程度。

然後作者講伊有「七個kiáⁿ,三個cha-bó͘-kiáⁿ」。聖經中ê「七」這數字,表示有含上帝ê祝福ê意思,因為伊有敬畏上帝之心。三個cha-bó͘-kiáⁿ kah七個kiáⁿ,加起來是「十個」;「七」千隻羊加「三」千隻駱駝mā是「十」;「一千頭牛」等於是「五百加五百」等,chiah-ê數字lóng teh表示一個概念:雙手伸出來就是「十」根指頭,teh代表完美無缺。以色列文化中「五」kah「十」lóng teh表示「完美」ê意思。

駱駝,這是當時遊牧民族siōng貴重ê「動力」,有駱駝ê人,表示家境bē-bái,而約伯有「三千隻駱駝」,tú好表示伊是非常富有ê人,同時mā teh代表伊tī當時ê烏斯地區擁有極高ê社會地位。

第4到5節,chit兩節經文thang看出約伯ê富有,m̄-nā是有一萬一千五百頭ê cheng-seⁿ,iáu有「成群ê奴僕」,並且thang不時tī厝裡宴客。第5節mā是回應第1節ê所謂「敬畏上帝」,包括會tī歡宴了後省思是m̄是犯罪ê行為。Chit種反省ê功課,是深驚tī「無意中侮慢得罪上帝」,意思是teh指用無正確ê話語談論有關上帝ê事(參考馬可福音三:28—30)。

第6到7節,chit兩節ē-sái講是聖經中siōng特別ê一節,說明上帝tī天頂ê眾神明前召開天庭開會,眾「神子」聚集tī上帝面前,chiah-ê「眾神子」,就是上帝ê奴僕,mā是teh指「天使」ê意思(參考列王記上廿二:19,詩篇八十二:1、八十九:5—7,以賽亞書六:2),in是上帝ê幫手(參考創世記三十二:2、詩篇一○三:20—21,撒母耳記下廿四:16,列王記下十九:35)。上帝召開天庭會議,mā同時teh表示上帝beh審判重大ê事務,討論有關世間發生ê tāi-chì,á是聽聽各地「使者」ê 回報(參考撒迦利亞書一:8—12、六:4—7)。

注意chia ê「撒旦」,有加上「定冠詞」,表示伊mā是上帝ê「奴僕」之一,它扮演ê角色是親像「檢察官」仝款,專門負責「控告」、「檢舉」世間人類ê行為。M̄-koh後來聖經中ê「撒旦」無koh加上「定冠詞」,真可能是因為後來以色列人民看「撒旦」就是專門teh「搗蛋」,挑撥人遠離上帝ê一種力量,chit種觀念已經普遍,因為án-ne,就不koh加上「定冠詞」,hō͘人一看就知影是「pháiⁿ ê」、「無好ê」。上帝詢問chit位巡視(漫遊)地上各地ê「撒旦」,問它有無看tio̍h甚麼特別ê事á是物?

第8到11節,chit節是上帝teh紹介約伯hō͘撒旦認bat。上帝稱呼「約伯」是祂ê「奴僕」,意思是「約伯」kah上帝之間已經到à「bē-tàng分」、「非常密切」ê關係。當上帝稱呼一個人是祂ê「奴僕」ê時,mā teh表示chit-ê人就是上帝親自揀選ê對象。上帝hō͘撒旦知影約伯確實是一個忠心ê奴僕。M̄-koh撒旦卻反駁上帝ê講法,認為約伯會án-ne忠心,是因為「有利可圖」,撒旦chit種回應非常直接而且尖銳。Mā就是講:上帝kah「約伯」之間關係是建立tī彼此hō͘利ê基礎上。撒旦為tio̍h beh證明所觀察是正確,它建議上帝tùi約伯身上撤退,並且tio̍h「the̍h走」約伯身上tùi上帝所領受ê一切財富,伊認為若是án-ne約伯一定會棄sak上帝。

第12節,kui本約伯記一再受tio̍h議論ê經文,就是chit節。一般lóng會問:為甚麼上帝會允准撒旦去做chit件「pái佈」約伯ê事?án-ne,上帝是真正愛約伯mah?約伯án-ne忠實tī上帝,上帝kám無koh khah應該伸手庇護約伯,hō͘撒旦遠離約伯chiah-tio̍h。M̄-koh作者beh表示一個重要ê認bat:上帝對忠實tī祂ê奴僕有絕對ê信心。Ná親像約伯對上帝有絕對ê信心。因為上帝認bat約伯。Chia mā講上帝允准撒旦對約伯進行測試,m̄-koh有限制tī一定ê範圍,bē-tàng lóng無顧忌ê想beh án怎to̍h án怎。作者用chit種方式teh說明撒旦mā是tī上帝掌控ê中間,它一定tio̍h聽從上帝ê命令做tāi-chì(參考哥林多前書五:5,哥林多後書十二:7)。

重新查詢 專卷研經 約伯記系列
錯誤回報,請聯繫