耶利米書 7章1節 到 7章15節   背景資料  上一筆  下一筆
Tùi第七章開始直到第十章,是先知耶利米tī耶路撒冷聖殿門口傳講信息ê記錄。Tio̍h注意ê是chit段經文記錄並m̄是tī仝一個時間傳講,卻是經歷過kúi-nā年ê時間chiah完成。第七章所講ê、所用ê文辭也kah頭前幾章差別真大;頭前幾章lóng是用詩歌ê方式teh表達,第七章ê經文則用散文ê方式寫出來。

Chit段經文是先知耶利米tī耶路撒冷傳講ê信息。Tùi chit段信息thang看出內容ê特色:信仰kah社會生活是一體ê兩面,無法度分開。若是kā信仰tùi生活kah工作中抽離出來,hit種ê信仰是虛假,不實在ê。這mā是為甚麼先知ê信息中一再強調實踐社會公義ê重要性,因為這是上帝對祂揀選ê子民所賦予 ê社會責任(參考創世記十八:19,以賽亞書四十二:1、4、6—7)。每一個時代lóng仝款,當chit種信息kah信徒ê利益衝突,特別是執政者ê利益違背,就真oh被接受。耶穌受難ê原因是án-ne,今á日ê傳道者tī某一kóa地區會hō͘侮辱、迫害,mā常常是因為傳講ê信息kah當地人民ê生活、工作之利益有衝突致使ê結果。

第1到4節,上帝差派先知耶利米到耶路撒冷「聖殿門口」,ài伊「向進入聖殿敬拜上主ê人傳達」上帝ê信息。Án-ne,聽tio̍h信息ê對象必定lóng是猶大人民。所傳達ê信息內容就是ài in「棄邪歸正」,「m̄-thang koh再相信hiah-ê騙人ê話」,講甚麼tī耶路撒冷真安全。Īnm聽從上帝ê話「棄邪歸正」,結果惹起上帝忿怒,進一步koh棄sak in,就算bih起來tī耶路撒冷聖殿mā仝款,性命不保。

第5到7節,「tio̍h棄邪歸正」,chit句話koh一pái重複第3節所提過ê,表示猶大以色列人民已經背離上帝ê教導,做真chē無應該做ê事,chit-má先知傳出ê信息是ài in「以公平相待」。

Chia「公平」指ê是公正、公道、無欺騙ê行為。Chia強調「公平相待」ê原因,就是有發生「佔外僑kah孤兒寡婦ê sio̍k」,以及「殺害無辜」、「拜別ê神明」等,chiah-ê lóng是上帝眼中看做嚴重惡質ê行為。先知耶利米強調講,只要猶大人民知影「改過」,上帝就會hō͘ in「繼續居留」tī上帝賞賜hō͘ in「祖先」流傳到in khiā起ê這迦南地。

第8到10節,tùi chit三節thang看出上帝嚴厲地控訴猶大人民所做惡質之行踏,包括in不時聽hiah-ê假先知傳講「騙人ê話」,kan-taⁿ知影做「偷the̍h」、「刣人」、「姦淫」、「做偽證」、「向巴力獻祭」等等chiah-ê lóng是上帝看做「恨惡ê事」,然後卻走去聖殿講:「咱真安全!」chit句話意思是teh指當敵人來攻擊耶路撒冷ê時,in就走進聖殿裡bih起來,祈求上帝庇護。M̄-koh平時,in卻是熱心地去拜偶像巴力神明,chit種行為是對上帝來講是真大ê侮辱。

第11節,「Lín認為我ê聖殿是賊窩mah?」chit句話mā被耶穌引用teh譴責tī當時宗教領袖把持聖殿,並且kah販賣商人勾結欺騙人民ê事頂面(參考馬可福音十一:15—17)。Tùi耶穌潔淨聖殿ê故事,就thang發見一個重要ê事實:人若無法度tī生活上遵照上帝ê旨意來行,án-ne,koh再好ê宗教祭典禮儀,mā只不過是一種掩蓋(khàm)罪惡ê行為而已,m̄-nā無法度彰顯宗教信仰ê情操、意義,顛倒地,koh khah sêng是teh褻瀆神聖ê上帝仝款。先知耶利米tī chia講上帝非常「清清楚楚地看見」猶大人民ê「一舉一動。」因為上帝是無所不在、無所不知ê神。

第12到15節,先知耶利米傳達上帝ê話,ài猶大人民去看māi上帝對待「示羅」,chit-ê所在原本是以色列人民tī約書亞帶領in進入迦南後,第一個設立會幕敬拜上帝ê所在(參考約書亞記十八:1)。到士師ê時代,「示羅」是以色列十二支派ê聖地,tī chia有會幕、約櫃,kah大祭司(參考士師記廿一:19,撒母耳記上一:3),一直到撒母耳ê時代,「示羅」lóng是以色列人民ê宗教中心。M̄-koh後來,以色列人民棄sak上帝,結果約櫃被非利士人搶行,chē kah三萬以色列軍人被刣(參考撒母耳記上四:1—11)。chit-má上帝用「示羅」來譬喻耶路撒冷城teh beh面臨仝款ê運命,會遇tio̍h巴比倫攻破,而且聖殿mā會hō͘燒毀,城kah聖殿lóng會成做廢墟。原因是in犯真chē罪,雖然有上帝ê先知傳達信息ài in悔改,m̄-koh in「lóng是m̄聽」。上帝決定beh hō͘ in被掠到外國去做奴隸,ná親像主前721年北國以色列人民所遇tio̍h ê結果仝款。

重新查詢 專卷研經 耶利米書系列
錯誤回報,請聯繫