耶利米書 50章1節 到 50章20節   背景資料  上一筆  下一筆
Chit章kah第五十一章lóng是談起有關巴比倫帝國滅亡ê信息,這mā是耶利米書提起kah以色列民族互動有關ê國家、民族、部落等滅亡之言論中,所用篇幅siōng長ê一段。

依先知耶利米ê講法,巴比倫帝國原本是上帝揀選ê奴僕,為tio̍h是beh用來懲罰以色列人民ê,tī第廿五章9節、第廿七章6節,以及第四十三章10節等等經文,lóng有記載tio̍h「我ê奴僕巴比倫王尼布甲尼撒」chit種句話。仝款是先知耶利米ê話語,卻傳出上帝beh嚴厲懲罰巴比倫帝國,而且懲罰ê方式是非常嚴重,是beh毀滅巴比倫帝國。

為甚麼會變成chit-ê款式?Mā允准以tùi先知以賽亞ê信息中ē-tàng看出來,伊傳出ê信息指出巴比倫ê國王kā家己看程非常偉大,甚至ē-tàng kah上帝比高低,因為án-ne引起上帝極大ê忿怒(參考以賽亞書十四:12—15)。伊bē記得是上帝揀選ê奴僕,卻kā國家ê成就,等同家己ê偉大,甚至kā家己當做神明仝款,án-ne chiah是真正ê問題所在。

Tio̍h注意ê chit兩章中有kóa描述ê經過kah所發生ê事實並無相符,親像第五十章8到10節講:

「以色列人,逃出巴比倫pah!lín beh搶先逃離hit所在!我beh發動北方列強,聯合起來,攻打巴比倫。In beh列陣進攻,攻落巴比倫。In ê箭頭像神箭手發射ê箭,支支射中目標。巴比倫會被洗劫;洗劫伊ê beh隨意擄奪一切。我—上主án-ne宣佈了。」

頂面所講chit段經文讀起來,kah-ná是聯軍進攻巴比倫ê時chūn,以色列人民驚惶逃難,而巴比倫是慘遭無情ê洗劫,而事實上並m̄是án-ne,因為進兵巴比倫帝國ê是波斯帝國,而且以色列人民差不多是用歡迎ê姿態迎接in,因為波斯帝國是來解放in ê,而波斯帝國ê軍隊是不費一兵一卒就入城,是用「解放者」ê姿態入城,koh khah重要ê是波斯皇帝塞魯士對巴比倫人ê態度友善,無刣戮ê行為發生。Mā因為án-ne,這mā是引起真chē聖經學者探討chit兩章經文寫作時間,以及對tī本章是m̄是出tī先知耶利米ê作品,一直存疑ê主要因素。

因為以色列ê猶大國是tī主前586年被巴比倫帝國所消滅,而tī chit chìn前ê 605年,巴比倫帝國koh kā亞述帝國hō͘消滅,hō͘亞述帝國tī主前721年所滅亡ê北國以色列,其民族就此全部lóng歸tī巴比倫帝國管轄統治之下。因為án-ne,當論到巴比倫亡國ê時,另外一方面就是teh表示以色列kui個民族lóng kā得tio̍h釋放ê機會。

第1到3節,chia開始就說明以下ê信息lóng是針對「巴比倫城kah它ê居民」。Tùi第四十六到四十九章就已經清楚看tio̍h毀滅chiah-ê國家、族群,就是巴比倫帝國ê軍隊,因為án-ne,chiah-ê國家kah人民lóng對巴比倫帝國ê興起,以及它殘酷ê手段感覺深惡痛絕。Á chit-má換巴比倫被懲罰ê消息beh傳出來,聽tī chiah-ê被巴比倫摧毀ê國家、俘擄ê人民耳裡,lóng是一件非常興奮ê消息。	

Chia提起「馬杜克」(Marduk),中文《和合本》用「彼勒」、「米羅達」,這是巴比倫ê siōng主要神明,巴比倫人kā它看做是in國家ê守護神,mā是in認為管理土地ê神。因為「巴比倫陷落了」,所以連帶ê in所信奉ê神明馬杜克mā「蒙羞受辱」。這是因為古代ê人認為:beh摧毀一個國家á是消滅一個民族,就是先kā hit-ê國家á是民族ê主要神明hō͘摧毀。Án-ne,信奉它ê人民就會驚惶不安。Á會來摧毀攻打ê是「有一個國家tùi北方來」ê,m̄-koh若對照第9節來看,就會發見m̄是只有一個國家,卻是真chē國家聯合起來攻打巴比倫。而且是會徹底消滅巴比倫,hō͘伊成做「國土荒廢,無人khiā起;人kah野獸lóng走光了」ê所在。

第4到5節,tùi chit節開始直到第10節,lóng是提起有關以色列民族會tńg去故鄉ê事。Chia提起「以色列kah猶大ê人民」chit句話,意思是teh指全體以色列民族,in會「邊行邊哭chhōe」上帝。並且mā tio̍h chhōe「往錫安去ê路」,這表示in taⁿ thang回鄉tńg去,m̄-koh真chē tī巴比倫出世ê新生代,已經bē記得,需要有年老一代ê指引、帶領。Á chit句「in beh kah我訂立永遠ê約,永遠bē棄sak」是講出in會án-ne淪落成做巴比倫帝國ê奴隸,就是bē記得bat kah上帝有立過永遠ê約,in無照約去行,chit-má beh重新kah上帝訂立新約。先知耶利米bat指出,這新約無koh寫tī肉體上,而是beh寫tī心版上(參考耶利米書三十一33)。只有刻畫tī心版上ê約,chiah會永遠記tiâu,「永遠bē棄sak」。

第6到7節,chit兩節經文講出以色列人民ê問題,就是領導者錯誤ê引chhōa,hō͘人民棄sak了上帝ê旨意。

注意chia所用ê「牧者」一詞,是teh指以色列ê領導者,包括君王、先知、祭司、社會領袖等。Chia提起以色列ê統治者怠忽職守ê問題,in無好好á照顧人民,chit-má chhōe bē-tio̍h「羊kho͘-á」,表示國家已經無了。因為以色列人民bat淪亡tī亞述帝國kah巴比倫帝國統治之下。chit-má上帝beh重建in,因為án-ne,當上帝出手懲罰巴比倫ê時,mā hō͘以色列民族帶來一個契機。

第8到10節,chit三節是呼籲所有以色列人民趕快「逃出巴比倫」,並且ài in「搶先逃離」。為tio̍h beh發動「北方列強,聯合起來,攻打巴比倫」,而且會「攻落」,hō͘巴比倫束手無策。

第11到13節,chit節講上帝指責巴比倫人「侵奪了」祂ê「國家」,chit-ê意思是teh指上帝子民以色列民族所建立ê包括以色列kah猶大。M̄-koh巴比倫認為家己真行,真有能力,iáu為tio̍h án-ne而「狂歡」。M̄-bat謙卑,mā bē記得tio̍h走chhōe上帝ê旨意,因為án-ne,chit-má上帝懲罰巴比倫,hō͘伊「蒙羞受辱」,而且「淪為siōng弱小ê國家,成做乾旱無水ê曠野」,換句話講,巴比倫會變成別人欺負ê對象。

第14到16節,chit段經文講出上帝已經發出命令,beh開始懲罰巴比倫,hō͘包圍巴比倫ê聯軍以弓箭對準。chit-má上帝beh用巴比倫過去對待hiah-ê被伊phah敗ê人ê方式來回報伊。

巴比倫人「怎樣待別人,lín mā tio̍h照樣待in」,chit句話mā反應了早期社會ê人際關係—以牙還牙、以眼還眼ê社會生活定律。出埃及記第廿一章24節、利未記第廿四章20節,以及申命記第十九章21節等等所在ê經文,lóng thang看tio̍h摩西律法規定ê「報復」行為。

「不beh hō͘ in掖種,mā不beh hō͘ in收割」,chit句話表示巴比倫受tio̍h懲罰性ê攻擊結果,差不多是hō͘洗劫一空,成做廢墟ê狀態,因為即使khiā起tī城內,mā kā活活餓死,缺糧ê情景會非常嚴重,mā因為án-ne,ē-tàng逃亡ê「外僑」lóng離開。

第17到18節,chia用「獅」來表示列強如亞述kah巴比倫。然後講tio̍h以色列民族ê歷史境遇,就是亞述先tī主前721年「吞食」以色列,「續落來」是巴比倫王尼布甲尼撒tī主前586年「啃tio̍h」ê骨頭,hō͘猶大mā被吞食殆盡。M̄-koh chit-má上帝beh用過去亞述帝國被滅亡ê方式,「照樣」來對待巴比倫帝國,消滅它。

第19到20節,chit兩節講出上帝beh帶領以色列人民tńg來到in ê「故土」迦南地,chit種預言一再出現tī先知ê文獻中。先知耶利米bat提起以色列人民經過巴比倫帝國統治「七十年」後,會得tio̍h釋放回鄉(參考廿五:12)。

主前538年,當波斯帝國消滅巴比倫帝國了後,塞魯士皇帝就下令釋放統治區內所有以色列人民tńg去故鄉去重建家園。

Chia提起「迦密山」,這是設tī地中海附近ê一座山,mā是水氣非常充沛ê山,因為án-ne,號名「迦密」,意思是teh指「肥」ê意思。

「巴珊」,這是tī約旦河以東ê所在。以西結書第廿七章6節講chia出產出名ê「橡樹」,而tī第三十九章19節則講巴珊以出產肥牛出名。

「以法蓮」,這是巴勒斯坦中部地區,以青翠草原,非常適合放顧羊、牛出名。

「基列」,這是用有肥ê土地,有豐富ê草原地區而出名。Tī民數記三十二章1節提起雅各ê大kiáⁿ呂便被分配到chit塊土地,thang安心放牧cheng-seⁿ,因為草原廣大使呂便支派想爭取tī chia定居生活。

當上帝beh帶領以色列人民tńg去故土ê時chūn,mā就是以色列人民身上ê罪過已經lóng被上帝赦免、赦免(參考以賽亞書四十:1)。

重新查詢 專卷研經 耶利米書系列
錯誤回報,請聯繫