耶利米書第四十五章因為真清楚是寫「約西亞ê kiáⁿ約雅敬作猶大王ê第四年」，thang對照第三十六章1節來看，就會發見有kóa學者認為chit章應該編輯續接tī第三十六章了後，因為lóng是先知耶利米ài秘書巴錄記落來伊所講ê話。M̄-koh tī chit短短ê五節經文中，thang看出是第四十六到五十一章做真好ê引言，因為頭前所有ê經文lóng是關係上帝對猶大子民講ê話，而緊續落來ê六章lóng是kah外國ê興衰有密切關係。

Chit章mā是先知耶利米teh回應巴錄ê話。原因是巴錄感覺性命有苦難。

第1節，「約雅敬作猶大王ê第四年」，這是teh指主前605年ê時間，伊是tī主前609年繼位到主前598年。「巴錄」，thang講是先知耶利米siōng忠實ê伙伴，tī第三十六章4節紹介了巴錄就是「尼利亞ê kiáⁿ」，而尼利亞乃是「瑪西雅ê孫á」（參考三十二：12）。伊忠實地記錄先知耶利米所講ê話。

第2到5節，chit段經文lóng是先知耶利米傳達上帝所講ê話。

Chia提起巴錄bat講家己「悲傷痛苦」mā是「haiⁿ-haiⁿ叫而憔悴，bē-tàng安寧」，這可能是因為伊看見先知耶利米mā bat因為講出上帝ê信息而被關入監牢，伊自覺可能mā會受連累，因為án-ne伊講家己「完了」。M̄-koh先知耶利米hō͘巴錄清楚知影，一切事lóng有上帝ê旨意，上帝ê奴僕只有ē-tàng聽從上帝ê旨意，卻m̄是只想tio̍h家己ê理念。先知耶利米hō͘巴錄知影，過去上帝beh伊去「建立」ê，chit-má上帝決定beh「拔除」，原因是上帝子民lóng m̄聽從祂ê旨意。因為án-ne，伊決定beh kui個「拔除」，而且beh「對付大地」。M̄-koh上帝允准巴錄有機會「逃命」，無論gōa chē，上帝lóng會保護伊，免受災害。