耶利米書 38章1節 到 38章13節   背景資料  上一筆  下一筆
Chit章是延續第三十七章11到21節ê背景。Mā有一種講法是:認為第三十八章就是第三十七章11到21節內容ê另外一種記錄。會有chit種觀點是因為:

(1)chit兩章lóng記載先知耶利米是hō͘控「叛國」罪名,講先知耶利米煽動人民向巴比倫軍隊投降(參考三十七:13/三十八:4)。

(2)chit兩章lóng提起先知耶利米是被關tī「約拿單監獄」(參考三十七:15/三十八:26)。而且Tī該監獄tú-tio̍h非常惡質ê對待,hō͘伊ê性命有危險(參考三十七:20/三十八:9)

(3)chit兩章lóng提起西底家王kā先知耶利米帶去私下腳問伊有無上帝ê信息(參考三十七:17/三十八:14)。以及問完結束後,西底家王就依先知耶利米ê要求kā伊送到王宮監獄裡監禁(參考三十七:21/三十八:28)。

(4)chit兩章lóng記載先知耶利米tī監獄中食ê物件,直到耶路撒冷城內無餅thang食(參考三十七:21/三十八:28),而照第五十二章6節ê記載,當城裡饑荒非常嚴重ê時,mā是耶路撒冷城被攻破ê時間。

Chit段經文講國王身邊ê重臣正式向國王控訴先知耶利米,講伊煽動人民向巴比倫帝國ê軍隊投降。In要求國王kā先知耶利米判處死刑。

第1節,「馬坦ê kiáⁿ示法提雅」,伊是王室ê首領。

「巴施戶珥ê kiáⁿ基大利」,是祭司,而巴施戶珥擔任聖殿總管,bat phah過先知耶利米。伊ê kiáⁿ基大利tī宮廷職位真koân。

「瑪基雅ê kiáⁿ巴施戶珥」,tī第廿一章1節出現過,mā是西底家王身邊ê重臣。

第2到3節,頂面所講chiah-ê人看見先知耶利米teh向耶路撒冷城內ê民眾「轉達上主ê話」,講甚麼人向巴比倫人「投降,甚麼人就bē致使被刣,性命ē-tàng保全」。先知耶利米koh一pái強調只要是留tī城內,必定會遇tio̍h「刀劍、饑荒、瘟疫」ê災難。因為上帝「一定會kā chit-ê城交hō͘巴比倫ê軍隊;in beh來佔領」。注意chia ê「刀劍」就是「戰爭」ê意思。Chit種言論tī he城被包圍ê緊張時刻,真容易就被認定是攪亂民心、煽動人民棄sak家己國家,謠言惑眾,一定tio̍h判處死刑。

第4節,ná親像第1節所提起ê chiah-ê官員聽了後,非常震怒,因為án-ne,in「去見王」,控告先知耶利米,要求國王kā伊「處死」,理由是「伊教唆tī城內ê兵丁kah人民投降,hō͘士氣低沉」,in認為先知耶利米ê言論不利tī人民,「kan-taⁿ想beh害in」。

第5到6節,可惜西底家王並無堅持保護先知耶利米,伊允准chiah-ê臣子去處理先知耶利米。就án-ne in就「用索á」kā先知耶利米「墜入瑪基雅太子ê井裡」,這「口井tī宮廷監獄裡,井裡無水,只有淤泥」,in ê做法就是hō͘先知耶利米死tī井中,無需要另外掩埋,mā bē有人知影。

第7到10節,「宮廷太監,古實人以伯‧米勒」聽tio̍h chit-ê消息,知影chit時先知耶利米ê性命真危急,「一定會餓死tī hia,因為城裡已經絕糧了」,以伯‧米勒利用西底家王tú-teh開庭(便雅憫門開庭)審案,就kā chit-ê tāi-chì向西底家王陳情,講「chiah-ê人án-ne待先知耶利米真可惡」。Iáu好,西底家王聽tio̍h chit種消息,就命令以伯‧米勒趕緊kā先知耶利米「救出來」,án-ne chiah hō͘伊ē-tàng脫離死亡ê險境。

第11到13節,以伯‧米勒真小心地「用破布爛衣」kah「索á」,kā先知耶利米tùi ná口井中「khiú出來」,m̄-koh並無釋放伊,卻是繼續kā先知耶利米關tī宮廷監獄裡。

重新查詢 專卷研經 耶利米書系列
錯誤回報,請聯繫