耶利米書 37章1節 到 37章21節   背景資料  上一筆  下一筆
Chit章kah第三十八章lóng是用西底家王ê時代背景,記載先知耶利米因為忠實tī上帝ê話,tú-tio̍h到迫害。這mā反映出當時m̄-nā是國王、官員,連一般人民lóng拒絕上帝ê話。Mā tùi chit章thang看出先知耶利米koh一pái警告西底家王,ài伊注意巴比倫帝國是真正beh攻打猶大,siōng好ê方式是先投降服從巴比倫ê統治,伊並且提醒西底家想beh kah埃及聯盟政策是錯誤ê。M̄-koh先知耶利米chit種建言卻hō͘人看做有通敵之嫌而受掠入獄。即使是án-ne,先知耶利米並無因為被關,就改變所傳講ê信息。因為伊是上帝忠實ê奴僕,只有ē-tàng照上帝beh伊傳達ê信息而講。不過西底家王有接受先知耶利米ê請求,kā伊留tī王宮監獄裡,無kā伊送tńg去約拿單家ê監獄去。

第1到2節,「立約西亞ê kiáⁿ西底家代約雅敬ê kiáⁿ約雅斤作猶大王」,chit句話tú好回應了第三十六章30節,先知耶利米ê預言猶大王約雅敬kā「bē有後代繼承」伊ê王位。西底家是「約雅斤ê a叔」(參考列王記下廿四:15—17),這是主前597年發生ê事。可惜ê是「西底家王kah伊ê官員以及人民lóng m̄聽從上主吩咐」,in背離上帝ê教導,棄sak了上帝。

第3到4節,chia講西底家王請求先知耶利米「為國家」向上帝「祈禱」,chit件事tī第廿一章1到2節mā有記載,背景kah chit章第5節所提起ê仝款,lóng是巴比倫軍隊正圍困tio̍h耶路撒冷,時間應該是tī主前589年。而且tī第廿一章1節講差派去ê人iáu包括「瑪基雅ê kiáⁿ巴施戶珥kah瑪西雅ê kiáⁿ西番雅祭司」in做伙去見先知耶利米。Chia講派去ê人是「利米雅ê kiáⁿiáu甲」,chit-ê人後來成做先知耶利米ê敵人(參考三十八:4),伊建議西底家王kā先知耶利米處死。Iáu有「西番雅祭司」mā被委任做說客,chit時chūn ê先知耶利米「iáu未被關進監獄,thang自由tī民間進出」,這mā講出西底家王對先知耶利米iáu是存敬重,m̄敢隨便壓制伊ê言論。Mā可能chit時伊tú上任。M̄-koh thang看出西底家王kah伊ê臣僕並m̄是真正想beh聽先知傳達出上帝ê話,卻是只想beh伊替in向上帝祈禱,認為上帝會垂聽先知ê祈禱,m̄-koh chit種想法是錯誤ê。

第5節,提起巴比倫軍隊「一聽tio̍h埃及王ê軍隊已經開出國境,就撤退了」,chit件事是發生tī主前588年,當時率領軍隊來支援猶大ê埃及法老王,名叫「舍弗拉」(參考四十四:30)。因為猶大kah埃及之間訂有結盟,所以伊率軍beh到耶路撒冷來援助被巴比倫圍困ê猶大國。

第6到8節,「tùi埃及開來支援你ê軍隊會中途折回」,chit句話聽tī chiah-ê臣僕耳中,必定是ná親像當頭打擊仝款,因為先知耶利米接落去ê話是「巴比倫ê軍隊會tńg來攻城」,m̄-nā beh「佔領」耶路撒冷城,而且會「放火燒毀」。Chiah-ê事後來tī主前586年lóng一一實現了(參考列王記下廿五:8—10)。這真清楚說明先知耶利米所看見ê未來局勢,kah一般政客所看見ê大無相仝。M̄-koh mā thang想像會tio̍h,當先知耶利米講出chit段話ê時,必定受tio̍h極大ê抨擊,因為埃及軍隊iáu未開到,巴比倫ê軍隊已經撤離。這hō͘ hiah-ê堅持beh背叛巴比倫,去kah埃及結盟ê政客得tio̍h暫時ê勝利,而且認為m̄免上帝ê支持,in家己也ē-tàng解圍。Á事實上,巴比倫ê軍隊撤離並m̄是in真正驚惶埃及ê軍隊,in是採取「迴兵計」ê戰術,並m̄是真正撤tńg來,卻是無想beh kah埃及軍隊正面衝突,等埃及軍隊轉tńg去ê時chūn,chiah koh一pái揮兵直攻耶路撒冷了,hō͘已經輕鬆落來ê埃及軍隊無法度隨時整軍備戰。後來巴比倫帝國軍隊攻落猶大了後,就續落來去攻打埃及,並且重挫了埃及(參考以西結書三十:21—23)。

第9到10節,chit兩節koh一pái講tio̍h巴比倫軍隊並m̄是真正撤退,卻是一種「迴兵計」戰術。先知耶利米ài in m̄-thang「欺騙家己」,並且koh khah進一步提出嚴厲警告,就算巴比倫軍隊tī本次「只chhun一kóa倒tī營裡ê傷兵」,iáu是仝款會kā猶大摧毀。這已經充分說明猶大目前ê狀況,是不堪一擊,完全無任何國防力量thang講。

第11到13節,chit節講tio̍h巴比倫軍隊會撤退,是kah埃及出兵beh解耶路撒冷被巴比倫軍隊圍困ê危機。然後先知耶利米利用ná làng縫時間「到便雅憫境內ê親族hia去」,beh去繼承伊向a叔買ê一塊田地,m̄-koh無想tio̍h當先知耶利米「到便雅憫門ê時chūn」,「守衛隊隊長」kah其他兵丁等就「掠」伊,並且「指控」伊「想向巴比倫人投降」。

第14到16節,雖然先知耶利米有表明是tńg去繼承律法上ê土地,m̄-koh,官員並無採信,認為伊是勾結巴比倫人。「in大發雷霆」,並且iáu「phah伊」,kā伊「關tī約拿單ê厝內」。Chia並無講先知耶利米被關tī chia jōa久,只講「關了真久」。

第17到20節,chit節講西底家王kā先知耶利米tùi監獄提出來,主要目的是想beh聽聽是m̄是有tùi上帝來ê信息。M̄-koh先知耶利米先問西底家王為甚麼kā伊「關tī監獄裡」。伊真無客氣地指出「hiah-ê講巴比倫王絕對bē來攻擊lín,bē來侵佔這國家ê先知chit-má tī tó位?」chit句話mā清楚指出chit時hiah-ê假先知lóng bih起來,koh khah可能ê是早已經逃走到他國去避難了。最後先知耶利米趁機會要求西底家王,m̄-thang kā伊「送tńg去約拿單家ê監獄,免得我死tī hia」,tùi chit句話mā thang看出伊tī約拿單ê監獄hia一定是不時受tio̍h欺負,hō͘伊感覺性命有危險。

第21節,西底家王看起來kah-ná iáu想beh保護先知耶利米,因為án-ne伊就「下令」kā先知耶利米「 關tī宮殿監獄」。M̄-koh chit點請求後來mā被西底家用來保護家己(參考三十八:26)。伊「ta̍k工分tio̍h一塊tùi餅鋪街送來ê餅,直到城裡ê餅lóng食完」,chit句話至少講出伊tī王宮監獄裡受tio̍h好ê待遇,每工有餅thang食,免除iau餓,因為tī he被圍城ê時期,糧食開始嚴重缺乏。

重新查詢 專卷研經 耶利米書系列
錯誤回報,請聯繫