耶利米書 28章1節 到 28章17節   背景資料  上一筆  下一筆
Chit章是針對假先知哈拿尼雅所講ê話。一般人民實在真oh清楚知影án怎分辨真假先知?因為tī先知運動中,in傳講信息ê時lóng有一個特點,lóng會用「上主對我講」chit種句型出現。另外一方面,mā tùi先知耶利米ê話發見,伊對tī哈拿尼雅所講有關猶大王國未來ê預言,先知耶利米並無確定是m̄是是tùi上帝來ê啟示,á是根據伊家己ê意念所講ê。後來,先知耶利米chiah tùi上帝hia得tio̍h確實ê啟示,知影哈拿尼雅chìn前所講ê並m̄是出tī上帝。因為án-ne,伊就講出上帝對哈拿尼雅ê懲罰。

Tio̍h注意ê是:先知有可能常常得tio̍h上帝ê啟示,m̄-koh並m̄是in所講ê一切信息lóng是tùi上帝來ê啟示。哈拿尼雅過去bat得tio̍h上帝ê啟示,因為án-ne,伊可能想:chit-má國家危急,民心bē穩,有可能傳講chit種信息thang幫助伊ê國家、社會穩定pah。Koh講,伊mā有可能誤解了大約一百年前,先知以賽亞時代傳出ê信息。當時亞述帝國國王西拿基立帶兵進攻耶路撒冷ê時,猶大王希西家差人去見先知以賽亞,先知以賽亞就傳出安慰鼓勵ê信息,以及上帝teh-beh親自派天使攻擊亞述帝國ê軍隊,解救猶大城耶路撒冷ê被困危機(參考以賽亞書三十七:21—38)。哈拿尼雅可能受tio̍h chit件歷史事件ê影響,因為án-ne mā傳出像先知以賽亞chit種上帝會解圍ê信息。M̄-koh當時面對國家陷入危機ê時,希西家王ê態度是懺悔,並請先知以賽亞向上帝祈求拯救(參考以賽亞書三十七:1—4)。當年ê猶大希西家王是用披麻、拆裂衫褲ê方式,帶文武百官到聖殿去懺悔;chit-má ê猶大王西底家則想用家己ê氣力來解困。兩個之間ê境況完全無仝,結果當然mā bē仝款。做一個先知一定tio̍h有chit種判斷能力,而且一定tio̍h有一個基本ê觀念:悔改,走chhōe上帝ê憐憫chiah是生存ê唯一方法(參考以西結書三十三:11)。

第1節,「西底家做王ê第四年五月」,chit-ê時間應該是主前593年。「基遍人押朔ê kiáⁿ哈拿尼雅先知」tī耶路撒冷聖殿tú-tio̍h先耶利米,並且kah耶利米「講話」,討論有關國家興衰ê問題。

第2到4節,chit段經文是哈拿尼雅當tio̍h聖殿ê「祭司kah群眾面前」,伊mā是用上帝ê名講話,伊講「Tī兩年內」,上帝beh kā巴比倫王「轄制」猶大人民ê鎖枷hō͘「粉碎」,並且beh kā「尼布甲尼撒王掠奪到巴比倫去ê聖殿器皿」lóng總「全部運tńg來」到耶路撒冷。M̄-nā án-ne,連同hông掠去做人質ê「約雅斤」王kah所有hông掠去巴比倫做奴隸ê「猶大人」mā lóng tio̍h「帶tńg來」,chit種信息真清楚表明:巴比倫帝國會被摧毀。

第5到9節,chit段經文是先知耶利米聽ê回應。Chit種回應ná親像伊chìn前tī聖殿向祭司kah人民轉告上帝hō͘伊ê信息仝款,就是teh指出有kóa假冒上帝知名ê先知,所傳出來ê信息是假ê,m̄-thang聽信chit種話(參考耶利米書廿七:16—17)。事(tāi)先先知耶利米回應講「m̄-koh願án-ne!願上主照你所講ê話成全!」真可能是先知耶利米iáu未是得tio̍h上帝明確ê啟示,hō͘伊知影哈拿尼雅所傳講ê信息並m̄是tùi上帝來ê啟示。M̄-koh伊ài哈拿尼雅「注意聽」伊bat傳講過ê信息,就是第廿七章16到17節。換句話講,先知耶利米ài先知哈拿尼雅想看māi,上帝怎樣可能hō͘伊得tio̍h ê啟示,是kah先知哈拿尼雅chit-má所傳出ê信息完全顛倒?而chit點mā是一般民眾感覺非常困惑ê所在。因為兩位lóng是先知,而且lóng是奉上帝ê名傳講信息。不過先知耶利米提醒哈拿尼雅ê話,除非猶大人民會曉把握時間趕緊歸向上帝,悔改認罪,若無,chiah-ê災難lóng會tī預言了後臨到。最後,先知耶利米講如果一個先知beh傳講「和平」ê信息,就一定tio̍h等chit種信息應驗ê時chiah算是真正。原因是當先知預言有災難來臨ê時,若是無看見hiah-ê人即使悔改,上帝是bē改變祂既定ê毀滅計畫。

先知耶利米án-ne講,mā是teh警告哈拿尼雅注意,過去ê先知hō͘人民懷念,á是hō͘人民尊崇,乃是因為in並無為tio̍h beh取悅掌權者而講話,mā無為tio̍h beh迎合民意,奉承達官顯要而傳講假ê信息,in甚至是冒性命ê危險,勇敢指出國王政策ê錯誤。M̄-koh,chiah-ê偉大ê眾先知,所預言ê災難卻一一臨到,而hiah-ê傳講「平安ê信息」ê先知,一定tio̍h接受考驗,tio̍h等到伊所傳講ê平安來臨,危險真正過去à,án-ne chiah真正證實伊所講ê信息是tùi上帝來ē-tàng算數。

第10到11節,先知耶利米「頷頸上ê枷擔」,這是上帝beh伊做來掛ê(參考廿七:2),為tio̍h是beh教導猶大以色列人民。M̄-koh chit-má哈拿尼雅竟當tio̍h眾人面前kā先知耶利米頷頸上ê枷擔解開、取落來,這mā表示伊所傳ê信息tú好kah先知耶利米傳講ê信息完全顛倒;先知耶利米掛tī頷頸上ê枷擔,是表示iáu大將被巴比倫帝國所囚困;哈拿尼雅則折斷這枷擔,表示上帝kā解開chit種困境。M̄-koh tio̍h注意ê是,m̄是上帝beh伊去解開這枷擔,卻是伊家己認為tio̍h beh解開。這tú好表示伊無上帝hō͘伊ê信息。然後,哈拿尼雅the̍h斷裂ê枷擔當tio̍h眾人面前講,上帝beh像伊hit種折斷先知耶利米頷頸上ê枷擔,「折斷尼布甲尼撒王加hō͘各國ê枷擔」,而且是「兩年內」就會實現。M̄-koh先知耶利米並無koh做任何辯駁,伊「離開」聖殿。事實上伊已受tio̍h極大ê侮辱,因為哈拿尼雅是當tio̍h眾人面前侮辱伊,m̄-koh伊無反擊,因為伊知影上帝ê奴僕受tio̍h侮辱,上帝必定bē靜默不語。這mā是伊chìn前對tio̍h hiah-ê議會官員所講過ê話,無論是侮辱á是殺害上帝ê奴僕,lóng會因為án-ne付出代價(參考廿六:15)。

第12到14節,chit-má上帝koh一pái下命令,ài先知耶利米kā上帝ê信息轉告hō͘哈拿尼雅,而chit-ê信息竟然是beh kā原本用「木頭」做成ê枷擔,改成「一個鐵ê枷擔來代替」,這已經teh表明原本無hiah-ni̍h嚴重,chit-má反tńg會因為哈拿尼雅假借上帝ê名發言,而且因為侮辱上帝ê奴僕先知,而hō͘猶大國kah人民受tio̍h koh khah大ê侮辱kah災難。第14節chit句「甚至ài kā野獸mā交hō͘尼布甲尼撒王支配」,tú好kah第廿七章6節所講ê相對應。先知耶利米指出上帝已經決定,ài kā kui個猶大國lóng由巴比倫帝國統治,á是管轄,甚至連動物lóng包括在內,無一件物件ē-tàng逃過tī巴比倫ê統治之下。

第15到17節,chit兩節真清楚看出先知耶利米是得tio̍h了上帝ê啟示,因為án-ne,伊拆破哈拿尼雅假借上帝ê名講ê虛構ê白賊。因為án-ne,上帝必定會追究chit種人ê罪(參考耶利米書十四:15)。即使哈拿尼雅原本是先知,m̄-koh卻利用上帝ê名欺騙人民,這等於是亂使用上帝ê名,是真可惡ê行為。先知耶利米真清楚kā哈拿尼雅講,上帝beh「消滅」伊,而且時間就是tī「今年內」,這比伊冒用上帝ê名宣告講「兩年內」ê時間iáu koh khah短,這說明伊連想beh看tio̍h「和平」、猶大人民被釋放ê日子都無機會。原因是伊ê話hō͘猶大人民m̄聽從上帝ê先知耶利米傳達ê信息。果然,就tī「hit年七月,哈拿尼雅死去。」chit句話tú好應驗ā先知耶利米ê預言,這mā表示先知耶利米chiah是真正先知。

重新查詢 專卷研經 耶利米書系列
錯誤回報,請聯繫