耶利米書 27章12節 到 27章22節   背景資料  上一筆  下一筆
Chit段經文thang分做兩段落,一是第12到15節,chit段是特別hō͘西底家ê信息,先知耶利米敦促猶大ê西底家王,不要理會hiah-ê假先知ê話,伊建議西底家王繼續臣服tī巴比倫帝國,m̄-thang想beh kah幾個弱小國家kah埃及聯盟來對抗巴比倫帝國,伊強調chit種想法是錯誤ê。第二段是第16到22節,是針對猶大ê人民講話,內容是重複勸大家向巴比倫帝國投降。

第12到13節,先知耶利米tī chia真清楚kā西底家王講,ài伊「臣服」tī巴比倫,kā「巴比倫王」加hō͘伊ê「枷擔」giâ起來,強調án-ne in就「ē-tàng生存」落來。伊仝款提出警告,若是拒絕上帝hō͘伊ê信息,等於是拒絕上帝ê話,上帝一定會用真嚴酷ê「戰禍、饑荒,kah瘟疫」來懲罰悖逆ê人民。

第14到15節,先知耶利米警告西底家,m̄-thang koh再聽信hiah-ê用各種法術講「m̄-thang向巴比倫王投降ê眾先知」,因為in所傳ê chit種信息,lóng m̄是上帝ê啟示。伊指出chiah-ê假先知是假冒上帝ê名teh「欺騙人」,如果聽信假先知chit種話ê人kā會kah傳講假信息ê假眾先知仝款落場,就是「lóng tio̍h滅亡」。因為上帝m̄-nā會懲罰假先知,連聽從跟tòe ê人民mā會受tio̍h仝款ê懲罰(參考耶利米書十四:16)。

第16到17節,先知耶利米m̄-nā警告「祭司」,mā同時對全體猶大「人民」提出警告,ài大家注意chit件事,就是ài大家一定tio̍h「臣服」tī巴比倫,若是m̄聽從,in chit-má所khiā起ê所在,真緊to̍h會變成「廢墟」。

第18節,chit節是一種反諷ê講法。Mā就是講:如果chiah-ê人是真正先知,in bē總是去四界放話,in應該為耶路撒冷teh beh滅亡,懇求上帝ê憐憫chiah-tio̍h;in應該直接kah上帝對話,chiah會真正明白上帝ê旨意,卻m̄是總是講家己得tio̍h上帝ê啟示。

第19到20節,chit兩節講出猶大ê遭遇,就是「猶大王約雅敬ê kiáⁿ約雅斤」,伊kah一陣幕僚lóng被掠到巴比倫去(參考列王記下廿四:12),只「留落來聖殿ê銅柱、銅海、銅座,kah其他一kóa寶物」(參考列王記廿五:13)。時間是tī主前597年。

第21到22節,chit兩節提起ê事是大約tī西底家王ê時代發生,時間是主前586年,猶大滅亡。西底家王kah厝內人tī耶路撒冷城破ê時tī逃走途中受掠,尼布甲尼撒王tī伊面前刣死伊ê kiáⁿ,並且挖出伊ê兩隻目睭,然後用銅鍊鎖tiâu伊,kā伊帶到巴比倫去(參考列王記下廿五:1—8)。聖殿kah王宮貴重物件lóng被巴比倫帝國搜刮殆盡,m̄-koh ná mā只是暫時由巴比倫保管而已。上帝hō͘了猶大人民一個全新ê希望:上帝beh kā chiah-ê物件「運tńg來,khǹg tī原所在」,這表示有一工,上帝beh koh一pái復興猶大ê以色列人民。

重新查詢 專卷研經 耶利米書系列
錯誤回報,請聯繫