Tùi chit章經文中thang看kah真清楚，先知耶利米ê信息kah其他先知ê信息lóng teh強調信仰kah社會生活是一體ê兩面，無法度分開。若是tī社會生活行為上欺壓窮困者，然後koh再去敬拜上帝，he是嚴重侮辱上帝ê行為，mā是teh污穢聖殿ê神聖。所以先知運動中有一項，就是ài大家改正chit種惡質ê社會生活行踏。M̄-koh眾先知chit種呼籲m̄-nā無得tio̍h人民ê尊重，顛倒ê，卻是惹來hiah-ê有權勢者ê忿怒kah討厭，in用真chē理由想beh堵住先知ê口。

Ná親像主前第八世紀ê先知阿摩司，伊當時是遇tio̍h大祭司亞瑪謝ê恐嚇，而先知耶利米chit-má則被掠審問，官員起訴伊beh判伊死刑。先知耶利米被掠了主要原因，是伊宣告掌權者惡質ê社會行為，會hō͘耶路撒冷聖殿像北國以色列早期ê宗教中心示羅仝款被毀滅（參考廿六：9），in認為先知耶利米chit種講法是teh恐嚇人民。

Koh講，tùi先知運動中mā thang看tio̍h一個事實：一個國家ê興亡，一個民族ê興衰，並m̄是在tī物質生活是m̄是富裕，以及該國ê硬體建設有chē進步，卻是在tī in心靈是m̄是純潔。

Chit段經文記述先知耶利米聽從上帝ê指示，去khiā tī耶路撒冷聖殿ê庭園，傳達上帝beh伊講ê信息hō͘進出聖殿ê猶大人民聽。伊ài猶大人民聽從上帝ê話，若無，聖殿會親像以前以色列人民ê宗教聖地示羅仝款被上帝拆毀。M̄-koh當chiah-ê猶大ê權貴階層聽tio̍h先知耶利米傳出chit種信息後，反應真激烈，in kā伊掠，然後開庭審問，並要求kā先知耶利米判處死刑。

第1到3節，「約西亞ê kiáⁿ約雅敬做王開始」，「約雅敬」是tī主前609 á是608年做王統治猶大，伊原本ê名叫以利亞敬，被當時宗主國埃及國王尼哥改名成做約雅敬。伊總共統治猶大國長到十一年。Tī chit段統治期間，伊確實是背負了龐（pâng）大ê國家戰爭債務，m̄-koh伊並無憐憫人民ê苦難，卻是加重人民ê稅賦（參考列王記下廿三：33—35）。Koh khah惡質ê是伊挪用了chiah-ê龐（pâng）大稅收建造華麗ê宮殿來自己享受（參考耶利米書廿二：13—14、17）。伊「仿效伊祖先ê pháiⁿ模樣，做上主看做邪惡ê事」（參考列王記下廿三：37）。會「做邪惡」ê tāi-chì ê王，chiah會對上帝奴僕所傳出ê信息不理睬，甚至會對上帝ê奴僕採取嚴厲制裁ê態度。因為án-ne，上帝ài先知耶利米去「khiā tī聖殿ê庭園裡」，然後對tio̍h「tùi猶大各城鎮來禮拜」ê猶大人民傳講上帝ê信息，並且是「一句mā bē-tàng省略」，這是真嚴厲ê警語。先知耶利米講，如果猶大人民「肯聽，肯棄sak邪惡ê道路」，上帝會「取消因為in ê惡行beh加hō͘ in ê毀滅」。這ná親像先知以西結所講ê，上帝寧可罪人悔改而存活，mā無願意看見罪人死亡（參考以西結書三十三：11）。

第4到5節，真清楚，猶大人民並無想beh遵守摩西ê律法，mā m̄聽上帝奴僕先知ê苦勸。因為án-ne，先知耶利米警告耶路撒冷ê毀滅會親像以前上帝毀滅示羅仝款，徹底摧毀耶路撒冷，hō͘伊成做各國咒罵ê城市。

第7到9節，包括「祭司、先知」在內ê猶大民眾lóng聽tio̍h了先知耶利米ê信息，m̄-koh chiah-ê權貴階層ê「祭司、先知」就掠tiâu先知耶利米，對伊咆哮，講伊「該死」，講伊預言上帝beh摧毀耶路撒冷聖殿ê事，明明是就是一種咒罵，因為án-ne，群眾就án-ne包圍了先知耶利米，情勢有危kah性命安全之慮。

第10到11節，chit時chūn，有「猶大國ê官員聽見chit項事就tùi王宮趕到聖殿」來，in tī耶路撒冷ê「新門」，mā就是「便雅憫門」ê所在（參考二十：2）開庭審理chit件案子。Chiah-ê猶大ê祭司kah眾先知指控先知耶利米ê預言ē-sái民心驚恐，「應該處死」。