耶利米書 23章33節 到 23章40節   背景資料  上一筆  下一筆
Chit段經文是先知耶利米講ê話,Tī chit段信息中,上帝一再強調猶大人民已經成做祂ê重擔。原因是猶大人民是屢勸m̄聽上帝ê話。

第33到34節,chit節上帝ài先知耶利米kā猶大人民講,包括in ê先知、祭司等,講in是「上主ê重擔」。注意在希伯來文「重擔」是用「maśśā」,它ê原文有兩種意思,一是teh指重擔,二是teh指信息。前者表示被迫tio̍h承擔ê擔(tàⁿ),mā表示重大ê責任。後者,是表示聽tio̍h ê人beh向傳達ê人負責。Tī chia表示上帝無願意負起照顧猶大人民ê責任,祂beh「擺脫」chit種「重擔」。若有任何猶大人民講上帝是有責任照顧in(重擔),上帝一定會受氣而「懲罰」hit人kah「伊全家ê人」。因為án-ne講是一種無負責任ê態度。

第35到36節,koh一pái警告bē-tàng講chit句「上主ê重擔」chit句話,因為上帝已經決定無koh chhap猶大人民。若是有人繼續用「上主ê重擔」chit句來對猶大人民講話,就表示chit-ê人是teh「亂使用」上帝ê名。猶大人民beh問ê是上帝有無信息hō͘ in?因為in kan-taⁿ想beh聽假先知ê話,當然聽無看tio̍h上帝ê信息。

第37節,chit節真清楚指出先知耶利米時代,一再出現假先知,in假借上帝ê名發表言論,上帝ài先知耶利米清楚指出,in用上帝ê名所講ê話lóng是假ê。

第38到40節,因為chiah-ê假先知用上帝ê名傳達不實ê信息,而人民koh歡喜聽從。因為án-ne,上帝ài先知耶利米kā猶大人民講,上帝絕對會離開in,這就ē-sái猶大人民「久長蒙羞,永受難忘ê恥辱」。Chit-ê意思真清楚,猶大國一定會滅亡,人民會hông掠去做奴隸。

重新查詢 專卷研經 耶利米書系列
錯誤回報,請聯繫