Chit章是先知耶利米ê獨白；tī第十一章18到23節，第十五章10到21節，第十七章14到18節，第十八章18到23節等等經文mā lóng是伊獨白，而且chiah-ê獨白lóng kah伊向上帝控訴仇敵想beh謀害伊ê事件，á是kah伊teh哀嘆家己ê境遇有關。M̄-koh第二十章7到18節chit段經文中，真清楚顯露出先知耶利米心中ê掙扎，並講述出伊心內ê苦悶、鬱卒。

Chit段是耶路撒冷聖殿總監巴施戶珥侮辱先知耶利米，以及先知耶利米對巴施戶珥ê回應。

第1到2節，chia提起巴施戶珥祭司負責監管聖殿一切祭祀禮儀ê規矩，當然mā包括審核言論是m̄是得體之工作。因為án-ne，當伊聽tio̍h先知耶利米koh tī聖殿傳達上帝ê話後非常受氣，認為先知耶利米所傳說ê言論會帶來動盪不安，因為án-ne，就出手「歐打」伊，並kā伊「囚禁」tī耶路撒冷聖殿「北面ê便雅憫門」。伊敢「毆打」伊，真可能是根據申命記第廿五章2到3節ê規定，認為先知耶利米乃是假先知ê緣故。

第3節，巴施戶珥只關了先知耶利米一個暗時，「第二工早起」就kā伊「放了」出來。M̄-koh先知耶利米隨時回應了巴施戶珥ê舉動，就是重新hō͘伊一個名。原來「巴施戶珥」ê意思是teh指「四面富饒」，m̄-koh先知耶利米講chit-má chit-ê名會變成一種「四圍恐怖」記號，hō͘巴施戶珥無論gōa chē，看見伊ê人lóng會感受tio̍h不安、驚惶。

第4到6節，chit三節真清楚講出猶大國teh beh面臨巴比倫帝國ê侵犯，國家會面臨空前ê浩劫，m̄-nā猶大國會hō͘毀滅，猶大人民若m̄是「被掠到巴比倫去」做奴隸，就是hō͘「處死」。這等於teh kā巴施戶珥先知耶利米所講ê話會應驗，而chiah-ê慘酷ê情景伊會「親目看見」，而且伊kah伊全家，以及過去聽信巴施戶珥ê人，mā lóng teh-beh被掠到巴比倫，伊mā會死tī hia，葬tī hia，原因是伊過去所講ê lóng是白賊。