耶利米書 20章7節 到 20章18節   背景資料  上一筆  下一筆
Chit段經文是先知耶利米teh向上帝表白伊心內ê感受,表明tùi伊被上帝呼召了後,受tio̍h排斥、侮辱ê痛苦,mā因為án-ne伊詛咒家己出世ê日子。

第7節,先知耶利米認為家己是hō͘上帝說服去傳講信息,伊認為上帝呼召伊,m̄-koh並無出手保護伊,反tńg是hō͘伊hō͘人「戲弄」,甚至是「kui工kā伊當做笑柄」看待,hō͘伊感覺非常無奈。

第8節,因為猶大同胞並無想beh聽伊傳講ê信息,因為án-ne,每pái伊開嘴傳達上帝信息後,「lóng是招惹譏諷、藐視」,意思是kā伊當做瘋子看待,講伊不正常。

第9節,chit節thang參考耶利米書第五章14節。

因為上帝ê話ná親像一股炭火tī伊ê心中火燒(參考以賽亞書六:6—7)。心ê火熱,逼kah先知耶利米全身lóng m̄爽快,無傳講上帝ê信息,就無法度忍受chit種痛苦,「憋不住」上帝beh伊講ê話。

第10到11節,chit兩節是相對句型。當真chē人lóng用耳語謠傳伊是「恐怖」份子,包括伊「知己ê朋友lóng等tio̍h」看伊「身敗名裂」,這表示先知耶利米已經陷入孤寂。即使是án-ne,先知耶利米iáu是確信上帝會kah伊「同在」,這mā是伊雖然面臨chit種惡質環境,iáu-koh繼續傳達上帝信息ê原因。因為上帝真清楚向伊表明beh kah伊同在(參考一:8、19),hō͘ chiah-ê想beh陷害伊、孤立伊ê人lóng蒙羞。

第12節,thang參考耶利米書第十一章20節。

先知耶利米深信揀選伊ê上帝是一位「按公道判斷」,而且是「視透人ê心腸」ê上帝,祂一定會為受tio̍h迫害、冤屈ê人伸冤。因為án-ne,伊ài kā所有受tio̍h ê屈辱交hō͘上帝審理。

第13節,先知耶利米確信上帝會kā伊「tùi邪惡人手中搶救」出來。因為伊是上帝忠實ê奴僕。

第14節,先知耶利米teh「詛咒」家己出世ê日子,這kah聖經時代ê人,對性命ê出世態度完全顛倒。Tùi先知耶利米會詛咒家己出世ê日子,就ē-tàng想像會tio̍h伊心中是jōa-ni̍h-á哀傷、艱苦心。Chit種詛咒家己生日ê方式,其實mā是古代人表達性命苦難ê一種方式。

第15節,先知耶利米m̄-nā詛咒家己ê出世,mā詛咒hit位去向in父親報喜ê hit-ê人。因為chit-ê報喜ê人領了in父親hō͘伊ê獎賞,m̄-koh伊出世卻是一個痛苦ê性命。

第16節,「被上主所毀滅ê城」,指ê乃是所多瑪城kah蛾摩拉城ê毀滅。Tī這節詩歌中,先知耶利米koh一pái表示siōng好lóng聽bē-tio̍h有人傳達嬰á出世ê消息,ná親像所多瑪城kah蛾摩拉城被毀滅仝款,mā像「戰爭」ê時,hiah-ê人只聽tio̍h「喊hoah」ê聲音,án-ne,就koh再聽bē-tio̍h有人去通報任何喜訊了。

第17到18節,先知耶利米講家己寧可死tī母親ê胎腹中,以老母ê腹肚作「墳墓」。伊懷疑性命ê出世,只為tio̍h beh「經歷辛勞、悲傷」,koh tī「侮辱中消耗」性命ê歲月?若án-ne,這是真悲慘ê事。伊對上帝創造性命ê本意提出懷疑。

重新查詢 專卷研經 耶利米書系列
錯誤回報,請聯繫