耶利米書 17章1節 到 17章18節   背景資料  上一筆  下一筆
這是真特別ê一章,提起有關守安息日ê問題,而且是一再重複chit-ê問題,thang看出先知耶利米ê認知中,一再提醒信仰ê中心態度:遵守安息日,就是tī實行kah上帝之約。

為甚麼遵守安息日對以色列民族是hiah-ni̍h重要?而且是kah in性命ê生存以及國家ê存亡有關?這kah上帝所頒佈ê誡命有密切關係。有關十誡第四誡論到守安息日ê規定有兩主要ê背景:一是kah上帝ê創造有關。Tī出埃及記第二十章ê記載守安息日ê誡命,是因為上帝tī創造ê時,tī第七工就歇睏了,並且設定chit工做聖日。因為án-ne,要求所有ê以色列民族代代kiáⁿ孫lóng一定tio̍h遵守這安息日,因為這是上帝賜福ê日子(出埃及記二十:8—11,創世記二:2—3)。另外一背景kah出埃及ê經驗有絕對ê關係。Tī申命記第五章15節提起守安息日ê主要原因,是為tio̍h beh記念上帝用大能大力ê手帶領in出埃及。無論是tùi創造ê背景來看,á是tùi出埃及ê歷史經歷來看,lóng kah性命ê存亡有關。要求以色列人民守安息日mā是teh提醒in絕對bē-tàng bē記得拯救ê恩典,並且tio̍h用真誠ê態度回應上帝拯救ê疼。

因為án-ne,先知耶利米kúi-nā pái呼籲家己ê同胞tio̍h會記得遵守安息日ê時chūn,便teh表示以色列人民bē記得帶領in出埃及ê性命主宰—耶和華上帝。先知耶利米希望in ē-tàng ân-ân記tiâu拯救ê主耶和華上帝,而siōng重要、mā是siōng基本ê態度,就是tùi遵守安息日開始。

Chit段經文真清楚講tio̍h以色列人民之所以後來會亡國,而且被巴比倫帝國俘虜去做奴隸,原因就是因為in去敬拜虛假ê偶像神明,引起耶和華上帝ê憤怒。Chit點mā是kui本耶利米書ê中心信息之一。

第1節,先知耶利米傳達上帝ê信息,講上帝beh伊用「鐵筆寫ê」、「鑽石針刻」等記落來猶大人民犯罪ê情形,這表示in ê罪非常確實,無法度抵賴。而且是記錄tī in獻祭拜偶像ê所在。

第2到4節,chit兩節講述猶大人民拜偶像ê普遍kah嚴重性,明明是到處可見(參考耶利米書二:20),chē到ná親像塞滿kui個khiā起ê生活環境仝款(參考十六:18)。四界lóng thang看見拜「女神亞舍拉」ê祭壇kah神柱。因為án-ne上帝beh懲罰in,hō͘「敵人掠奪」in,phah敗in,搶奪in所有ê一切。Koh khah嚴重ê是上帝beh hō͘ in受掠離開上帝賞賜hō͘ in代代khiā起ê土地,被「流放到生份地方作敵人ê奴隸」,這是因為上帝無法度原諒以色列人民所犯ê罪行,祂ê怒火一直teh「火燒」tio̍h。

第5到13節是一首詩歌,chit首詩歌thang分做兩個段落,一是第5到8節,ē-sái講是對詩篇第一篇ê詮釋。詩篇第一篇是用「好人」kah「pháiⁿ人」為對比,chia是用信賴世人,kah信靠上帝ê人做對比。然後是第9到13節,chit段詩歌說明上帝懲罰悖逆ê子民ê時,絕對罪證確鑿。Chit段詩歌特別提起上帝對人心內ê鑒察,是伊懲罰人ê憑據。

第5到6節,chit兩節是提起óa靠世人力量ê人最後會親像栽種tī「沙漠中ê灌木,長tī炕旱ê曠野,長tī荒蕪ê鹽地」一般,面臨lian去ê結果。Ná親像會失去上帝看顧、保守ê人,受tio̍h詛咒一般,性命bē「有幸福」。

第5節提起信靠世人ê氣力,chia第7節講「專心信靠」上帝ê人,是「jōa-ni̍h-á幸福」,tú好kah第6節ê「無可能有幸福」成對比。Á chia ê「幸福」,kah源源不斷ê水湧出來有關,mā thang解釋做「富裕」ê意思。

第7到8節,chit兩節相對tī第5到6節ê詩歌。

第8節ê「樹根伸入水中」kah第6節ê「長tī炕旱ê曠野」、「荒蕪ê鹽地」成明顯對比。「伸入水中」,mā表示非常堅固,bē搖動,性命力真強。Á「樹葉常青,不斷結出果子」,chit種詩句ná親像詩篇第一篇所描述ê,栽種tī水邊ê果子樹,按照季節結果子,樹葉永bē凋零。

第9到10節,「人心比甚麼lóng詭詐」、「腐敗」,一般人無法度「測透」別人ê心內意念,m̄-koh上帝卻是看人心內ê意念而作判斷(參考掖母記上十六:7);上帝m̄-nā是「察驗人ê肺腑」,而且iáu會照人ê行為來「報應」(參考耶利米書十一:20)。

第11節,chit節ê句話真可能是取材自古老ê箴言(參考箴言廿三:5)。有ê人是「以不正當手段發財」,m̄-koh chit種人,就算擁有真chē財富,mā是枉然,因為ná ná親像「一隻鳥孵m̄是家己下ê蛋」仝款,ná親像俗語所講ê「無採工」,mā ē-sái講是個「阿西」。

第12節,chia提起「聖殿像燦爛ê寶座」,這是因為聖殿ê至聖所內有上帝ê約櫃,表明因為有上帝同在,chiah hō͘聖殿成做眾人嚮往敬拜ê聖地,mā因為án-ne hō͘聖殿擁有上帝同在ê「燦爛」光芒。這是早tī大衛時代就已經選定了地點,由所羅門王建造起來。

第13節,先知耶利米真清楚koh一pái表白講上帝是「以色列ê希望」,chit句話tī第十四章8節a句、22節c句lóng特別強調是「唯一ê希望」,因為chit位上帝是帶領in祖先行出埃及ê全能者,mā是宇宙萬物ê創造者,因為án-ne,離開chit位獨一ê真神,只會hō͘人「蒙羞」,一點幫助mā無。

第14節,chit節thang參考第十五章18節。

先知耶利米以身軀ê痛苦ê樣式來表達心內ê苦悶,伊祈求上帝「醫」,並m̄是伊肉體上真正破病,卻是一種心靈上ê痛苦,只有上帝才能hō͘伊得tio̍h安慰。伊希望上帝ē-tàng幫助伊減輕痛苦,án-ne伊就ē-tàng「頌讚」上帝。

第15節,chit節thang參考第二十章8節。

Chit節thang清楚thang看出先知耶利米心內會苦悶ê原因,就是伊傳達上帝「警告」ê信息hō͘猶大同胞,m̄-koh伊ê同胞顯然並無領受,甚至用真輕視ê話語回應伊講,就hō͘上帝ê懲罰「實行pah」,其實,in mā是teh暗指先知耶利米是假先知(參考耶利米書十八:18),伊所傳達ê信息根本就bē實現。  

第16節,chit節是先知耶利米teh向上帝告白,伊是一再為以色列同胞向上帝祈求,希望伊ê同胞ē-tàng避免「苦難」,mā從來m̄-bat有ài上帝「降災禍tī in身上」。這mā teh表示伊ê同胞中有人謠傳說伊lóng是講詛咒同胞ê話,其實並無。

第17到18節,chit兩節thang看出先知耶利米已經遇tio̍h ê恐嚇、威脅(參考十五:15)。因為án-ne,伊koh一pái向上帝呼求,成做伊「遭難ê時惟一ê避難所」。伊深深知影,任何地方lóng無安全,除非有上帝ê庇護。伊祈求上帝嚴厲懲罰hiah-ê威脅「迫害」伊ê人,chiah-ê人就是hō͘上帝奴僕「驚惶」驚惶、受tio̍h侮辱ê惡徒。


重新查詢 專卷研經 耶利米書系列
錯誤回報,請聯繫