耶利米書 14章1節 到 14章9節   背景資料  上一筆  下一筆
Tùi chit章開始一直到第二十章,除了第十七章有一個段落是關係安息日ê問題外,其餘lóng是先知耶利米提起約雅敬王末代(主前603到597年)期間所傳講ê上帝信息。雖然先知耶利米盡心、盡力teh宣揚上帝ê信息,希望藉這ē-tàng hō͘猶大人民回心轉意tńg來到上帝面前,m̄-koh顯然地,猶大人民已經是心硬、固執到無法度認罪,hō͘先知耶利米所有ê努力顯然lóng是白做,tùi chia mā thang看出伊心內ê痛苦kah難堪。

Tùi chit章到第十五章9節,chit段經文lóng是討論有關旱災帶來ê災害,chit段詩歌mā是一首哀歌,講tio̍h因為上帝不落雨所帶來ê性命苦難。只要是旱災,就是全面性ê災害,無論貧富貴賤,人人lóng仝款會面臨性命ê苦難,甚至hō͘ cheng-seⁿ mā會連帶受災。先知耶利米寫chit首詩歌,mā是希望以色列同胞ē-tàng知影悔改,好得tio̍h上帝ê赦免、憐憫。

Chit段詩歌描述旱災帶來嚴重ê性命困境。同時mā有先知耶利米teh替猶大人民向上帝祈求。Chit種代替祈求原本就是先知ê職責之一,m̄-koh上帝mā bat真清楚kā先知耶利米講,上帝並無想beh beh聽伊替以色列人民祈求ê聲音(參考耶利米書七:16、十一:14、十四:11)。

第1到3節,上帝kā先知耶利米講有關「旱災ê事」,聖經mā提起旱災,是因為上帝拒絕落雨ê緣故。親像:以賽亞書第十三章10節、第廿四章23節、第三十四章4節;以西結書第三十二章7到8節;約珥書第二章10節、31節;阿摩司書第八章9節等等,chiah-ê lóng有一個共同ê特色,就是表明當上帝ê懲罰來臨ê時,連天地lóng會為之色變。摩西就bat án-ne警告以色列人民,無落雨mā是上帝對以色列人民ê懲罰(參考申命記廿八:15—24)。

Chia真清楚描述,當嚴重乾旱來臨ê時,猶大國teh beh面臨死亡ê威脅,即使「居民躺tī土腳哀傷」,「耶路撒冷哭號求助」,上帝mā並無會因為án-ne phah開天窗降落雨水。猶大人民四界去chhōe水,m̄-koh只有ē-tàng「帶空水罐tńg來」,這表示根本chhōe bē-tio̍h水泉。Chit句「富人差奴僕去phah水」,表示乾旱來臨,就算是有錢ê財主mā仝款會面臨死亡ê威脅。

第4到6節,「天不降雨,大地龜裂」,chit時「作穡人蒙tio̍h頭失望」,連「野地ê母鹿」,代表有堅韌性命力ê動物,mā會因為為chhōe bē-tio̍h「草料」,無法度繼續哺乳小鹿,只有ē-tàng先自求生存。原本thang攀爬siōng峭壁ê「野驢á」、「野狗」等動物,m̄-koh taⁿ mā因為嚴重乾旱,致使強壯ê野驢á變成ná親像teh要喘不過氣來ê野狗仝款,而且因iau餓「視力衰退」,看bē清楚方向了。

第7到9節,這是先知耶利米teh替猶大人民向上帝祈求。伊講雖然猶大人民離開上帝ê教導,去拜偶像神明,m̄-koh伊祈求上帝ē-tàng按照「諾言」,伸手幫助以色列人民。因為上帝chiah是猶大人求生存ê「惟一ê希望」,是猶大人民「遭難ê時ê救主」,伊祈求上帝m̄-thang kā猶大人民當做「生份人」,mā m̄-thang像「過路ê旅客」,天一下光「就行」。「lóng無戒備」á是「bē-tàng為力ê戰士」是teh指上帝完全無採取拯救in ê行動。伊mā祈求上帝m̄-thang「棄絕」猶大人民。

重新查詢 專卷研經 耶利米書系列
錯誤回報,請聯繫