耶利米書 13章12節 到 13章27節   背景資料  上一筆  下一筆
Chit段經文是用酒缸做譬喻,說明猶大人民ná親像lim醉了酒ê人仝款,m̄-nā m̄知實況,而且因為失去理性致使社會秩序ê混亂。然後tī第15到17節用一首短詩講出第三pái警告。Tùi詩歌ê內容ē-tàng看出先知耶利米teh警告猶大人民,就是因為in驕傲,棄sak了上帝。如果in知影謙卑,就會知影用懺悔ê心tńg來到上帝ê面前來,án-ne iáu有得tio̍h上帝拯救ê希望。續落來tī第18到19兩節提出第四pái警告,對象是當時猶大國ê領導者。先知耶利米警告in,講in ê地位必定會hō͘剝奪。

最後tī第20到27節是chit章ê第五個警語,對象是耶路撒冷。Tī chit段經文中真清楚指出,猶大人民會遇tio̍h án-ne大ê災難,就是因為in棄sak上帝去拜假神ê緣故。

第12到13節,「Kā每一個酒缸lóng盛滿酒」chit句話,是當時一句非常普遍流行ê話語,意思就是講每一個器具lóng應該發揮它應有ê功能。Chit-ê比喻表明上帝揀選ê子民,lóng應該表現出應該有ê榮譽。M̄-koh續落來上帝卻ài先知耶利米kā猶大人民講,上帝beh「用酒灌醉chit-ê所在所有ê居民」,表示祂kā懲罰猶大ê以色列人民,hō͘猶大全國人民lóng像lim了烈酒ê人仝款失迷方向,chhōe bē-tio̍h正確ê道路。

第14節,「彼此衝突」,這mā是因為醉酒ê緣故,hō͘人無緣無故亂發脾氣,甚至會chhōe藉口kah別人興起衝突。Hō͘猶大國ê以色列人民彼此之間「不憐憫」、「無疼惜」、「無仝情」。Chit種社會生活絕對bē安寧。

第15到17節,tùi詩歌ê內容ē-tàng看出先知耶利米teh警告猶大人民,就是因為in驕傲,棄sak了上帝。如果in知影謙卑,就會知影家己ê軟弱、有限,明白並承認家己所犯ê錯誤,用懺悔ê心tńg來到上帝ê面前來,án-ne就iáu有得tio̍h上帝拯救ê希望。先知呼籲伊ê同胞「tio̍h謙卑,注意聽」,聽從上帝奴僕先知ê話會án-ne呼籲ê原因,tú好表示先知耶利米ê時代,猶大人民已經bē記得上帝ê話語,in根本就聽bē落去上帝ê信息。伊ài同胞tī「烏暗無來臨」chìn前,tńg來到上帝面前來,因為全能ê上帝chiah是值ē-tàng色列人民「榮耀」ê性命之主,而無應該去歌頌hiah-ê虛假ê偶像神明。伊提出嚴厲ê警告,若是in iáu是m̄聽,結果只有ē-tàng因為in ê「狂傲暗自啼哭」,而且是痛心艱苦心到「痛哭流目屎」原因是「上主ê子民受掠去了」,這是發生tī約雅斤王ê時代(參考列王記下廿四:10—17)。時間大約是tī主前597年。先知耶利米ê呼籲就是希望猶大人民會趕緊悔改認罪,免得引起上帝ê忿怒(參考耶利米書廿六:13,以西結書廿一:13)。

第18到19節,chit兩節經文是chit章經文第四pái警告,對象是當時猶大國ê領導者。先知耶利米講國王kah太后會tùi in ê「寶座上落來」,in「頭殼頂華麗ê冠冕已經ka-la̍uh」,chit句話真清楚是teh指約雅斤王kah伊ê老母、厝內人全lóng hông掠去巴比倫做奴隸(參考列王記下廿四:12、15,耶利米書廿二:24—27)。而且包括人民lóng kā「全部受掠去」,就算有城鎮陷入敵人ê圍困,mā無任何挽救ê機會。

第20節,chia所講ê「敵人tùi北方來」,就是teh指巴比倫帝國ê意思。過去thang做宗主國ê猶大,taⁿ已經無力成做他國ê宗主國了。

第21節,根據列王記下第二十章12到19節ê記載,tī主前約704年ê時chūn,巴比倫帝國bat kah猶大國有真好ê交情,tī猶大王希西家破病ê時chūn,巴比倫帝國iáu bat差派特使來探望希西家王,慰問伊。M̄-koh chit-má chit-ê「盟友」變成來「征服」猶大國ê敵人,這會hō͘猶大經歷到ná親像「產婦陣痛仝款痛苦」。

第22節,「衫褲被撕破」、「被強暴」,chiah-ê lóng teh表示猶大人民被侮辱,以及被踐踏ê意思。不過,這是in犯罪帶來ê結果,mā就是講,in受苦並m̄是被冤枉,卻是咎由自取。

第23節,雖然án-ne,猶大ê以色列人民ná親像已經「慣做pháiⁿ事ê人」,根本就bē想tio̍h悔改歸向上帝。

第24到27節,chit段經文講上帝決定懲罰猶大ê以色列人民,kā in tùi上帝賞賜hō͘ in khiā起ê土地頂面「趕走」,而方式就ná親像「風吹走麥hiūⁿ」仝款。這表示in會四散到各地去做奴隸,原因就是in去拜偶像神明所帶來ê結果,chit點mā是kui本先知耶利米信息ê中心。上帝並無冤屈in,因為in所做一切拜偶像ê lah-sap行踏,包括in「tī山頂kah田裡kah蹤異教ê神明」等等chiah-ê行踏,lóng清楚顯露tī上帝面前。

重新查詢 專卷研經 耶利米書系列
錯誤回報,請聯繫