以賽亞書 9章8節 到 9章21節   背景資料  上一筆  下一筆
Tùi第8節開始,一直到第十章4節,Tī chit段落中thang kā它分做四個小段落,就是第九章8到12節、第13到17節、第18到21節、第十章1到4節等等。Tī chit四個段落ê最後,lóng是用「上主ê受氣無停息;伊iáu-koh beh舉手責phah in」chit句話,作為段落ê結尾。

Chit段經文真清楚講tio̍h上帝beh興起以色列人民ê敵人,hō͘ chiah-ê敵人來完成上帝懲罰以色列人ê工作。

第8到10節,上帝ê奴僕已經kā信息傳達hō͘以色列人民了,就等tio̍h看以色列人民是m̄是願意聽從。Chia ê「全體以色列人民」,是teh指北國以色列全體人民。原本希伯來文是teh指「以法蓮」,因為北部十個支派是用以法蓮為首。可惜北國以色列人民太驕傲,m̄知上帝ê懲罰teh beh來臨,無論in怎樣防範都無用。

第11到12節,「上主鼓動in ê敵人」,chia ê敵人是teh指亞述人、敘利亞人,kah非利士人。Mā就是圍tī以色列四周ê附近國家kah族群。原因是「上主ê受氣無停息」,mā teh表示以色列人民並無想beh聽從上帝ê話語。

第13節,「以色列人民」,chia所指ê是全體以色列民族。先知ê信息不時是借用他國ê慘痛經驗作為教材,呼籲以色列人民tio̍h警誡、注意,趕緊「悔改」才能停息上帝ê忿怒。可惜到chit-má in iáu是「不悔改,不tńg來到上帝面前」,只好面對上帝忿怒ê審判。

第14到15節,上帝beh「phut掉」以色列領袖kah人民ê「頭尾」。Chia所指ê「以色列」,應該是指南國猶大ê領導階層kah貴族。所謂ê「頭」是teh指領導人,而「尾」,是teh指假先知。

第16到17節,上帝特別tio̍h嚴厲懲罰ê對象,就是chit群領導者,因為in是kā人民引入歧途ê罪魁禍首。M̄-koh聽從chiah-ê錯誤ê信息,á是故意去違背上帝旨意ê人,上帝mā會懲罰,因為「所有ê人lóng無法無天」。這已經teh暗示上帝ê懲罰就是hō͘以色列人民phah敗仗,致使國家滅亡,人民hông掠去做奴隸,無任何一個人會佳哉免得受難,即使是孤兒kah寡婦lóng仝款。

第18到19節,chia講當領導階層者chiap-chiap犯罪ê時,人民mā tòe學習in ê pháiⁿ模樣,連帶hō͘ kui個社會傾向邪惡,像「火燒刺phè ê火蔓延」,koh kah-ná「森林tio̍h火」,表示kui個社會敗壞、墮落到非常嚴重。因為án-ne,上帝已經「震怒了」,祂ê懲罰會親像一團大火燒,結果會「毀滅了人民,一個mā不留落來」。

第20節,chit節真值得注意,表示因為敵人圍困ê情景非常嚴重,iau餓到彼此交換gín-á煮充飢。Chit種情形後來mā發生tī南國猶大,時間是tī主前第588到586年代,巴比倫帝國圍攻耶路撒冷城長到十八個月,後來城內無任何食物kah水,in mā是交換gín-á煮,甚至iáu有老母煮家己ê嬰á來食(參考耶利米書十九:9,耶利米哀歌二:20、四:10),mā有kiáⁿ食父老母ê肉充飢(參考以西結書五:10)。

第21節,「瑪拿西kah以法蓮人互相攻擊」,chit句話真值得注意,chit兩個族群原本是親骨肉,in lóng是約瑟tī埃及所生ê gín-á,表示北國以色列雖然表面上看起來是同宗族ê人,tī he ê時mā鬧內訌。Koh講,chit節經文已經清楚指出一件事:若是連父母kah kiáⁿ lóng會為tio̍h beh存活落去,而食對方ê肉,親兄弟ê關係就koh khah bē有深刻ê情感thang講。

重新查詢 專卷研經 以賽亞書系列
錯誤回報,請聯繫