以賽亞書 6章1節 到 6章13節   背景資料  上一筆  下一筆
Chit章thang看tio̍h先知被上帝呼召是一件真痛苦ê事,ná親像摩西被上帝揀選ê時是一再chhōe藉口推辭,無願意接受上帝ê揀選。先知耶利米mā是一再chhōe理由來說明家己ê無能、口拙。

chit-má先知以賽亞mā是án-ne表示,伊講家己是「無清氣」,因為án-ne無適合當上帝ê奴僕。
第1節,「烏西雅王往生ê hit年」,he是tī主前792年,伊續接老父亞瑪謝成做南國猶大ê王,在位共計長到52年,直到主前740年往生。有關烏西雅王ê一生作為,tī歷代志下第廿六章有比較khah詳細ê紹介。

先知以賽亞講伊就是tī烏西雅王繼承王位ê hit年,看見上帝hō͘伊ê「異象」,受呼召而成為先知出來傳講上帝ê信息。

第2節,chit節描繪出先知以賽亞所看見ê異象,就是tī上帝身邊有「天使撒拉弗khiā teh服侍」,而且「每一個天使lóng有六個翼股」,chia並無說明到底有幾個天使,m̄-koh tī第3節用複數名詞「in」來說明ê撒拉弗天使有真chē位。然後天使有「六個翼股」,是三對ê意思。其中有兩個翼股遮「面」,可能是因為上帝ê榮光極大,若是無得tio̍h上帝ê允准,連天使mā bē-tàng直視上帝ê榮耀(參考出埃及記三十三:18—23)。另外兩個翼股用來遮「身軀」,這可能是因為天使lóng是赤身露體。每pái in ài面對上帝ê時,就一定tio̍h遮身軀(特別是teh指下體來講),這mā含意tio̍h「謙卑」。M̄-koh另外有一個講法,就是chia ê「身軀」mā是teh指「腳」(參考中文《和合本》ê譯文),表示chiah-ê天使bē-tàng跟tòe家己ê意思去行動,卻是被差遣ê時,chiah會phah開chit對翼股,飛到上帝ài in去ê所在(參考以賽亞書五十二:7)。Iáu有一對翼股是用來「飛翔」,這mā隱喻tio̍h天使ê行動非常緊,ná親像用飛ê一般。Tī啟示錄第十四章6節mā講天使是會飛ê,這可能就是因為in身上有翼股pah。

第3節,這簡短ê詩歌,表達上帝ê三個特性。

「聖哉」,連續三pái用chit-ê詞,這teh表示siōng koân級形容詞,意思是上帝ê神聖ê絕對,是無任何人á是其它神明ē-tàng媲美ê。「萬軍ê統帥」,這是上帝ê氣力,ná親像千軍萬馬一般ê勇猛,無法度thang擋。Á「榮耀充滿全地」Chit句表示無任何一個光體thang遮蓋過上帝ê榮光(參考民數記十四:21,詩篇七十二:19)。

第4節,chiah-ê撒拉弗歌頌上帝ê聲音非常響亮,足以「震動了聖殿ê地基」。    m̄-koh mā有另外一種看法,就是撒拉弗chit種震撼大地ê聲音,kah聖殿出現煙霧,lóng是teh表示上帝ê臨在。

第5節,這mā是先知以賽看tio̍h chit種情形了後,第一個反應就是認為家己必定會「死」。伊講連家己ê嘴「lóng無清氣」,而且「周圍ê人」lóng kah伊仝款。這「周圍ê人」指ê就是南國猶大人民ê意思。這表示伊m̄-nā擔心家己會hō͘上帝神聖ê震怒、審判來死,伊mā擔心家己ê同胞仝款會遇tio̍h仝款ê結果。因為án-ne,伊用chit種方式表示認罪ê態度。伊甚至表明家己ê罪koh khah重,因為伊是「親目看見了君王—上主、萬軍ê統帥」。這mā是聖經時代ê觀念,in認為只要是親目看見上帝ê面,必死無疑(參考出埃及記三十三:20)。除非有上帝特別ê憐憫才能免除死亡。

第6到7節,天使撒拉弗掌管tio̍h「火燄」。因為án-ne,chit位天使夾了一塊tī祭壇上燒紅ê「炭」「碰」觸先知以賽亞ê「嘴唇」。這是一種象徵性ê筆法,表明此炭火是聖潔、淨化過,而且是純潔ê,有含贖罪、挽tńg來、赦免ê功用。Koh khah重要ê,火是代表有上帝能力ê同在。這mā teh表示「分別為聖」ê意思。這是因為先知以賽亞講伊「嘴裡ê每一句話lóng無清氣」,上帝用chit種方式潔淨伊,thang hō͘伊傳出上帝神聖ê信息來淨化人ê心靈。

第8節,當先知以賽亞被上帝用「火燒tio̍h ê炭」潔淨了後,表示上帝已經完全赦免、憐憫先知以賽亞,就出聲呼召伊。Chia發言ê是上帝,m̄-koh卻用「咱」,這tī舊約聖經中一再出現,親像創世記第一章26節,用「咱」,表示偉大ê創造者上帝。Koh講,「咱」mā有ná親像天庭開會議ê背景,說明上帝teh主持會議,然後問有甚麼人願意為「咱」,這「咱」代表「天庭」ê會議(參考創世記十一:7,耶利米書廿三:18、22)。另外,用「咱」Chit-ê詞,m̄-nā是上帝而已,mā包括侍候tī上帝身邊ê眾天使(參考列王記上廿二:19—20),然後上帝會teh-beh採取ê行動,叫祂ê奴僕—天使去執行(參考阿摩司書三:7)。

「我去!請差遣我!」這是先知以賽亞回應上帝赦免伊ê疼,siōng具體ê方式,主動願意為上帝做見證、傳達信息。

第9到10節,chit兩節被新約聖經kúi-nā pái引用(參考馬太福音十三:14—15,馬可福音四:12,路加福音八:10,約翰福音十二:39—41,使徒行傳廿八:26—27,羅馬書十一:7—10)。其實chit兩節是反諷ê句話,teh kā先知以賽亞講,以色列人民並m̄是真正想beh聽上帝ê信息,因為in lóng心無tī焉,所以,就算in聽,mā bē明白;看了,mā bē了解。這mā teh表示in其實並無想beh聽從上帝ê話,hō͘心內ē-tàng潔淨。

第11到12節,先知以賽亞希望ē-tàng爭取koh khah chē ê機會kah時間,因為án-ne,伊問上帝「chit種情形tio̍h jōa久?」上帝ê回答真清楚,就是等到城市全lóng成做廢墟,mā就是大災難臨到ê時,in chiah會醒悟過來。這大災難就是包括人民hông掠去做奴隸ê hit工。

第13節,「十個人中iáu chhun落來一個人」,意思是teh指chhun落來十分之一,kah第五章10節ê講法真接近。Chit句話mā teh表示上帝雖然忿怒到極點,m̄-koh卻iáu會施憐憫hō͘ in,留落來殘餘ê子民,ná親像留落來「橡樹」ê殘幹仝款,ē-tàng koh再發出新芽來。Chit種觀念一再出現tī舊約聖經中,ná親像第四章2節所提起ê「殘存ê人民」是上帝特別保存落來ê(參考列王記上十九:18)。

重新查詢 專卷研經 以賽亞書系列
錯誤回報,請聯繫