以賽亞書 53章1節 到 53章12節   背景資料  上一筆  下一筆
Chit章ê詩歌真清楚描述這受苦ê奴僕,án怎經過苦難,伊願意承擔人類一切ê罪孽,無發出任何求救ê呼聲,mā無任何抱怨。而且伊「自願犧牲性命」來「擔當眾人ê罪」,只為tio̍h beh喚醒眾人歸向上帝。

第1節,chia一開始上帝ê奴僕就問「甚麼人會相信咱ê傳報?」這是久長以來一再發生ê事,上帝ê信息lóng是無人願意注意聽,人只有tī性命tú-tio̍h極大苦難ê時,chiah會想beh chhōe上帝ê話來脫離苦難。Chit句話已經清楚說明上帝奴僕所傳ê信息,無人願意聽。因為大家lóng kan-taⁿ會期待看見上帝彰顯祂ê大能,ná親像過去顯chit-má以色列人民出埃及進入曠野等神跡奇事。M̄-koh即使有chiah-ê,mā無人會因為án-ne而相信上帝ê話語、旨意。

第2到3節,chia開始就講上帝ê奴僕受苦、受凌辱,其實「是上主ê旨意」,m̄是人ê思維有辦法明白。Chit兩節描述chit位苦難ê奴僕ê樣式如下:

「會親像幼苗puh芽」,chit句話thang參考以賽亞書第十一章1節,提起beh tùi耶西ê殘幹上抽出嫩芽。

「像花草tī炕旱ê土裡生根」,表示chit位奴僕並m̄是弱禁bē-tiâu風,伊是tī siōng艱困ê環境下成長茁壯。

「無威儀,mā不iân-tâu」,「儀表平凡」ê普通人樣式出現。

「被藐視,hō͘人棄絕」,這表示tī伊ê時代,無人chhap伊,雖然伊是傳揚上帝ê話語,m̄-koh並無受歡迎。

「伊忍受痛苦,經歷憂患」,這是上帝忠實奴僕不時會tú-tio̍h ê境遇。

「人lóng掩面m̄看伊一眼」,表示這奴僕外表所呈現ná親像患tio̍h重病仝款,眾人lóng m̄敢伊接近,ná親像被隔離ê人。

第4到5節,chit兩節說明chit-ê受苦ê奴僕,所承受ê苦難之大,並m̄是一般ê破病á是所犯ê罪過,卻是遠大大超過咱所ē-tàng想像ê範圍之外,m̄-koh大家lóng認為伊承受chit種性命ê苦難是應該ê,認為伊是因為得罪了上帝chiah致使chit種重大結果。其實,伊是承擔了人類ê「罪惡」、「過犯」,mā因為án-ne,hō͘「咱得痊癒」、「醫」。這表示受苦ê奴僕是一個「贖罪者」,m̄是因為伊家己犯罪,卻是伊kā hiah-ê人所有ê罪過承攬了落來。

第6節,「一陣失迷ê羊」,thang參考耶利米書第五十章6節。Chia講「一陣失迷ê羊」,意思真清楚,m̄是指一隻羊,卻是整體民族ê失迷。Chia ê「失迷」一詞,mā表示是離開上帝ê教導,致使偏離了正路。M̄-koh,上帝憐憫人ê「過犯」,kā這一切苦難lóng hō͘這奴僕「承擔」落來,chit位奴僕ná親像代罪羊羔仝款。

第7到9節,chit位受苦ê奴僕「受迫害,受虐待」,卻ná親像「待宰ê小羊」tī「剪毛」ê人ê手上,是「一聲不響」、「一言不發」,chit種沉默ê現象,tī以賽亞書第四十二章2節bat提起過,而chit點tī先知耶利米身上就發生過(參考耶利米書十一:18)。即使伊「被拘禁,受審判,被處死」,伊lóng kā chiah-ê承擔落來,無任何抗議之詞出現,chit種情景ná親像福音書所記載耶穌tī公會受審判審判,甚至kā伊判定釘死tī十字架完全仝款。Tī耶穌被釘十字架ê時chūn,伊ê身邊有兩個「暴徒」mā kah伊同釘十字架(參考馬可福音十五:27,馬太福音廿七:44),來死後,是埋葬tī「財主亞利馬太ê約瑟」之墓穴(參考馬太福音廿七:57)。

第10節,tùi chit節到第12節,lóng teh強調上帝奴僕受苦,其實mā是出tī上帝ê旨意、安排。換句話講,是上帝特意hō͘祂ê奴僕面臨chit種遭遇,並m̄是上帝bē出手救助。Á是beh透過chit位奴僕ê受苦成做「贖罪ê祭」。

第11節,chit節真清楚指出,上帝奴僕受難,就是為tio̍h beh hō͘「眾人成做義人」,並且因為án-ne而得tio̍h上帝ê「赦免」。因為án-ne,當看見上帝拯救ê恩典降臨ê時,chit位受苦ê奴僕知影家己有完成了上帝所付託ê使命,就會得tio̍h「喜樂」,知影家己受苦「m̄是徒然」。

第12節,thang參考第五十二章13節。Chit節講這奴僕ê受苦,並無出tī勉強,卻是出tī「自願犧牲性命」,表示chit位奴僕並m̄是teh圖謀自身ê利益,卻是在tī「自願」為「承擔眾人ê罪」。因為án-ne,即使是面臨死亡mā無逃避,為tio̍h是beh表達對上帝ê忠實kah順服。


重新查詢 專卷研經 以賽亞書系列
錯誤回報,請聯繫