以賽亞書 48章12節 到 48章22節   背景資料  上一筆  下一筆
Tī chit段詩歌中,詩人先知以賽亞koh一pái強調,並且呼籲以色列人民,一定tio̍h聽從上帝ê話,因為這是in得tio̍h拯救ê唯一途徑。上帝m̄-nā期待in會聽從祂ê旨意、命令,同時mā會hō͘ in所應允ê福氣。

第12到13節,「雅各ah,聽我講pah!」chit句話kah第1節a句是仝款ê意思,對象就是以色列人民。Chia koh一pái強調chit位拯救ê上帝「是開始,是終結」,表示chit位上帝是永恆ê主宰,祂是「天kah地」ê創造者。

第14到15節,大家lóng beh聽上帝ê話。Chia上帝已經清楚表示beh呼召波斯ê塞魯士皇帝作祂ê奴僕去攻打巴比倫(參考以賽亞書四十五:1)。因為hō͘上帝呼召而順服ê人,必定會得tio̍h上帝ê賜福而得tio̍h「興盛」ê福氣。

第16節,上帝ê奴僕,一定tio̍h面對上帝。領受上帝ê命令、旨意,就是面對上帝,上帝會親自下命令並且賜力量hō͘祂所揀選、差派ê奴僕,hō͘ in有能力完成使命。

第17到19節,koh一pái出現「以色列神聖ê上帝」,chit-ê詞beh表達ê意義,是teh指chit位上帝就是救贖主,chit位救贖主一再呼籲祂ê子民聽從「命令」,án-ne「平安ná親像河水滔滔不絕」來到in中間,聽從上帝ê話ê社會,mā會享受「公義」像「水湧滾滾而來」,充滿tio̍h性命ê喜樂,chit種社會、國家就bē被敵人「消滅」。

第20到22節,chia講tio̍h上帝伸出救助ê手,帶領以色列人民離開奴隸之地巴比倫,án-ne大好ê消息會傳遍到「天涯海角」hō͘所有受掠ê人民知影,m̄-nā án-ne,上帝mā會引chhōa祂ê子民「行過沙漠」曠野之地,而且會tùi「石磐流出水來」hō͘ in bē致使乾渴,而ē-tàng平安地tńg去故鄉巴勒斯坦,ná親像當年帶領以色列人民ê祖先離開奴隸之地埃及仝款。Á上帝會棄絕作惡ê人。

重新查詢 專卷研經 以賽亞書系列
錯誤回報,請聯繫