以賽亞書 48章1節 到 48章11節   背景資料  上一筆  下一筆
Chit章ê詩歌是第四十到四十八章chit段經文ê總結,說明以色列人民為甚麼會淪為巴比倫ê奴隸?原因就是in享受以色列chit位號ê尊榮,m̄-koh卻無順服上帝ê心,而去拜偶像,悖逆上帝ê旨意,chiah-ê lóng tī說明in拒絕聽從上帝ê信息。因為án-ne,tī chit章中,詩人mā就是先知以賽亞真清楚講述以色列人會淪為奴隸ê原因,是in拒絕上帝ê話。chit-má上帝beh重新塑造in(參考第10到11節),並且beh伸手拯救以色列人民離開巴比倫,並m̄是因為in已經悔改,á是真正有改變,卻是上帝信守過去祂kah以色列人民ê祖先之間ê立約,上帝期待以色列人ē-tàng tī脫離巴比倫了後,真正聽從上帝ê話。

Chit段詩歌真清楚指出以色列人民會án-ne淪落為他國奴隸,並m̄是因為上帝無疼in,卻是in拒絕聽從上帝ê話,chiah落到án-ne悽慘ê落場。Kui本聖經ê中心信息是:聽從並且確實遵守上帝ê話語,一定會得tio̍h上帝ê保守,tī上帝所應允ê土地頂面存活。

第1到2節,koh一pái呼籲以色列人民tio̍h「聽chit-ê話」,mā就是上帝透過先知所傳達ê信息。Chia用「雅各家ê人」、「是以色列人」、「是猶大ê kiáⁿ孫」等用詞,其實lóng是teh指全體以色列人民。特別tio̍h注意ê是,當提起「雅各」Chit-ê名詞ê時,mā同時teh表示in是kah上帝立約ê族群。M̄-koh m̄-thang認為全部以色列人民lóng是「聖城ê人民」,卻是kan-taⁿ有ê少數,因為kan-taⁿ有少數是真正「倚賴」以色列ê上帝。

第3到5節,chit段詩歌koh一pái說明chit位以色列ê上帝「預言kā beh發生ê事」,m̄-nā án-ne,祂mā ē-tàng決定tī甚麼時chūn beh「實現」預言。上帝mā明確指出以色列人民因為心硬,「愚圖自用」、「拗蠻強烈如鐵」、「堅硬如銅」,in根本無kā上帝ê話khǹg tī心內。M̄-koh上帝hō͘以色列人民知影in會遇tio̍h ê懲罰,而這絕對m̄是in去拜ê假神所ē-tàng預先警告in ê事。

第6到8節,chit段詩歌koh一pái強化第5節所提起ê,上帝所預言ê事lóng發生。而且祂chit-má beh繼續發佈新ê預言,beh hō͘所有ê預言應驗。上帝chit種動作只有一個目的:hō͘祂ê子民知影,擁有chit種能力ê神,chiah是真正神。Á chiah-ê lóng是「隱藏ê事」,無人知影,mā是「從來無聽見過」ê事,m̄-koh上帝chit-má beh hō͘ chiah-ê事發生,這是teh指上帝beh興起波斯皇帝塞魯士,這是當時ê以色列人民無法度想像會tio̍h ê。因為當時巴比倫乃是kui個中東地區siōng強猛ê帝國,m̄-koh上帝卻hō͘波斯phah敗巴比倫帝國,並且kā它完全消滅。Á chit款tāi-chì,上帝故意不及早發佈,免得hiah-ê拜虛假之神ê人民koh講in早已經知影了。上帝清楚知影chiah-ê悖逆ê以色列人民心懷「詭詐」ê念頭,而這是上帝siōng討厭ê行為。

第9到11節,上帝一再容忍以色列人民ê悖逆行為,m̄-koh透過真chē方式來「試煉」in,就是hō͘ in經歷「痛苦ê火鍛鍊」,希望in tī苦難中,認bat上帝chiah是真正拯救者、真正神。上帝強調祂會án-ne做就是為tio̍h beh維護祂ê聖名,因為祂kah以色列人民之間有約。祂信守chit-ê約,chiah會伸手救助in(參考出埃及記二:23—25)。

重新查詢 專卷研經 以賽亞書系列
錯誤回報,請聯繫