以賽亞書 47章1節 到 47章15節   背景資料  上一筆  下一筆
第四十七到四十八chit兩章有一個共同主題就是:上帝beh借用波斯帝國皇帝塞魯士來當奴僕,差派伊去帶領上帝ê子民脫離巴比倫ê轄制,hō͘ in重回故鄉。為甚麼上帝beh懲罰巴比倫?根據以賽亞書第十四章12到15節ê記載,是該國tùi國王到人民lóng真驕傲,甚至beh kah上帝共比高,bē記得in是上帝所徵召來當奴僕(參考耶利米書廿五:9),一定tio̍h聽從上帝ê旨意,卻m̄是kā家己當做上帝。

第四十七章,是用哀歌ê形式寫出來。內容teh描述bat輝煌、榮耀到極點ê巴比倫帝國,taⁿ kā沒落,而且teh beh面臨被毀滅ê結果。

第1到4節,經文開始就是上帝直接對巴比倫講話,ài她「落來」,而且是tùi她ê「寶座上落來,坐在地面ê土粉頂面」,chia用「土粉」形容巴比倫teh beh陷入非常卑賤之態(參考約伯記一:8),表示它ê名譽掃地ná親像土粉一般。而且講它kā「成做奴隸」,負責「推磨,磨麵」ê工作。Á它ê婦女被迫一定tio̍h「除下底罩」、「脫掉長裙,露出腿來」ná親像妓女一般。Á它ê人民會hō͘對待ná親像奴隸,tú親像過去in對待猶大人民仝款,m̄-nā是hō͘剝掉了身上ê衣物而「赤裸」,就算beh過河mā一定tio̍h是赤腳涉水而過,這lóng是上帝「報復」in ê懲罰,因為上帝beh拯救「釋放」以色列人民。

第5節,chit-má上帝下命令,ài巴比倫「不准作聲」,去「坐tī黑暗」ê監牢內,它已經會失去本來上帝揀選出來當奴僕ê時擁有ê光環。

第6到7節,chia真清楚指出並m̄是巴比倫帝國有甚麼能力ē-tàng制伏以色列民族,卻是因為上帝ê旨意,tio̍h用巴比倫來懲罰以色列人民。M̄-koh巴比倫認為家己真行,用非常慘忍ê手段對待以色列,「lóng無仁慈,對老年人mā殘酷無情」,tùi「不思想chit項事ê結局」就是滅亡。

第8到9節,「聽pah!」這是一句警語,而且是真嚴肅ê語句。Chit兩節指出巴比倫滅亡ê原因,就是「自稱kah上帝仝款偉大」,這teh表明巴比倫帝國人民ê心目中,根本無kā上帝khǹg tī內面,m̄-nā án-ne,統治者iáu會kā家己當做是神,ài人民崇拜伊(參考但以理書六:7)。chit-má上帝beh透過波斯帝國ê塞魯士來懲罰它,thang想像會tio̍h ê結果就是人民會「喪夫失子」,無重新koh再起、復興ê機會。

第10到13節,既然巴比倫自認kah上帝仝款偉大,無人thang比,而且「認為無人看見你ê惡行」,chit-má上帝表明祂m̄-nā清楚看見它所有惡質ê行踏,而且beh出手嚴懲,就算它用盡所有「法術」,災難照樣降臨到它身上,任何「咒語」lóng無法度救它。縱然國內真chē「星象家」mā bē-tàng做甚麼,只有ē-tàng「按月」講出kā beh發生ê災難而已。

第14到15節,chiah-ê宗教師á是星象學家,看起來真有學問,thang占卜預測會發生ê事,m̄-koh卻無法度保護家己免受災難。因為上帝出手懲罰ê時chūn,任何人lóng無法度逃離。想beh óa靠家己ê知識、才能ê人,最後就是「行上末路」,無法度得tio̍h上帝ê賜福。

重新查詢 專卷研經 以賽亞書系列
錯誤回報,請聯繫