以賽亞書 42章14節 到 42章25節   背景資料  上一筆  下一筆
Chit段詩歌是繼續第13節所提起ê,上帝beh出手phah hiah-ê對敵祂旨意ê人。

第14節,「沉默好久」,表示上帝對hiah-ê為非作pháiⁿ ê人無任何回應。M̄-koh這並無表示上帝m̄知,mā m̄是講上帝允准chiah-ê無公義ê事發生,卻是上帝有家己ê時間kah計畫。chit-má祂決定beh出手了。當上帝一出手,就會hō͘人經歷到「像陣痛ê婦人大聲叫」ê痛苦。

第15節,當上帝進行審判ê時,必定會摧毀祂創造ê所有山岡kah河川。Tú好kah第四十一章18到19節描述ê完全顛倒,chit對悖逆者來講是摧毀,而對tī óa靠上帝救恩ê人,就ná親像甘露、雨水降落tī炕旱之地仝款得tio̍h滋潤生機。

第16節,上帝ê救恩來臨ê時,連原本是「chheⁿ-mê子民」,mā ē-tàng「行上」m̄-bat行過,而且是完全「生份ê道路」。因為上帝ē-sái「烏暗變做光明」,mā「hō͘崎嶇小路變成康莊大道」,ná親像第四十章4節所描述ê,當ná拯救者來臨ê時,必定會先完成chiah-ê工作。

第17節,tī第13節講「敵人」,tī chit節是講「假神」、「偶像」。上帝ê仇敵就是chiah-ê虛假ê神明,上帝ê子民若是去拜虛假ê神明,等於是kah上帝ê敵人khiā tī同一陣線頂,當然會引起上帝ê忿怒。

第18到19節,「chheⁿ-mê」、「耳聾」lóng tio̍h「看」、「聽」,因為當上帝beh審判全世界ê時,m̄是只有耳聰目明ê人chiah tio̍h注意聽、注意看,連khiā起tī島嶼、高山ê子民lóng tio̍h注意聽。chit-má則呼籲所有ê人,包括看bē-tio̍h、聽bē-tio̍h ê人lóng tio̍h注意。

Chia「我ê奴僕」、「差遣ê使者」,lóng是teh指tio̍h以色列人民。In既然是上帝ê「使者」,就應該tio̍h聽從上帝ê話語chiah-tio̍h,m̄-koh以色列人民顯然並未án-ne。

第20節,chit節指出作為上帝奴僕ê以色列人,竟然去拜hiah-ê完全無性命跡象ê虛假神明。In雖然親目看過上帝行了真chē神跡奇事,仝款「無心得」,聽上帝奴僕傳達ê信息,猶原「無領悟」。

第21到22節,經文中先提起上帝beh「伸張正義」,m̄-koh卻因為以色列人民無嚴守上帝ê律法誡命,而hō͘民族敗壞,心靈破碎,最後淪為外族人「欺壓」ê對象,in被掠到異鄉,遇tio̍h「蹂躪」,m̄-nā被譏笑(參考詩篇一三七:1—3),koh khah無人去搭救in。

第23到25節,chit段詩歌koh一pái提醒以色列人民,tio̍h知影反省,chiah會明白in會淪亡為他國奴隸,就是因為無「遵守」上帝ê「律法」而受tio̍h上帝ê懲罰,koh khah令上帝痛心ê就是連敵人已經兵臨城下,以色列人民mā無感覺,iáu認為無任何問題,原來大家lóng已經「麻痺不仁」,聽bē落去上帝發出ê警語,chiah會有án-ne慘痛ê結果。

重新查詢 專卷研經 以賽亞書系列
錯誤回報,請聯繫