以賽亞書 41章1節 到 41章20節   背景資料  上一筆  下一筆
Chit章則進一步向萬國、萬民發出聲音,ài所有ê人lóng知影chit位創造天地ê上帝,就是人類歷史ê主宰。包括世間ê君王,以及人ê手所造出來ê神明,lóng只有ē-tàng臣服tī上帝之下。

Chit段詩歌真清楚表達ê一個基本認bat:上帝創造並管理tio̍h宇宙萬物,祂mā是kui個宇宙ê審判者kah所有者。因為án-ne,tī chit世間無任何一個君王ē-tàng取代上帝,mā無任何一個神明ē-tàng kah chit位創造天地萬物ê主宰上帝相比並。同時mā講出上帝ài怎樣對待祂揀選ê子民。

第1節,詩人一開始就hoah出「諸海島ah」Chit-ê詞,這是teh指沿海各地ê島嶼,當時有真chē受掠ê以色列人民,被強制移送到真chē沿岸地區做奴隸。chit-má上帝準備進行審判ê工作,因為án-ne對所有ê人呼喊「tio̍h注神」聽上帝審判ê聲音,mā同時hō͘所有ê lóng thang來「申辯」。

第2節,chit節thang參考第四十五章1節。Chia所指出ê來自「東方」ê「ná征服者」,就是teh指波斯帝國ê塞魯士國王。上帝hō͘塞魯士王有強大力量thang制伏違背命令ê巴比倫帝國kah列國。

第3到5節,詩人tī chia說明新興帝國波斯ê軍事行動能力,ná親像tāi先進ê部隊一般,ē-tàng快速而且「穩然前進」,hō͘敵人oh得察覺,敵人即使發見,想beh趕緊應戰lóng會來不及。Chia詩人用歷史ê「開始」kah「終結」,表示kui個歷史ê進行,lóng是tī上帝ê主導下進行。因為án-ne,只要聽tio̍h上帝ài beh進行審判,而且揀選奴僕來執行祂ê命令ê時,無論甚麼人,lóng會「驚惶得pi̍h-pi̍h-chhoah」。

第6到7節,當面臨危機ê時,懍neh ê人lóng是彼此緊靠做伙,互相取暖、鼓舞,認為án-ne thang形成一股力量,抵擋上帝ê審判。M̄-koh in卻無知到認為用家己ê手鑄造出來ê虛假神明thang抵擋性命ê主宰上帝,希望án-ne thang拯救in免tī死亡,其實是一點點á幫助mā無。

第8到10節,chit節提起以色列是上帝ê「奴僕」。所謂「奴僕」是teh指地位非常卑賤ê人,mā thang指「奴隸」。Á「雅各」,mā thang指「以色列」(參考創世記三十二:28、三十五:10)。Án-ne,雅各chit-ê名稱,thang看做是一個人,mā thang當做一個民族,á是一個國家。以色列民族是上帝「揀選ê子民」,chia ê「揀選」一詞有含「立約」ê意思。因為有立約,而且上帝是信實ê,祂永遠記ē-tàng色列人民,「無遺棄」in,因為in是上帝所「揀選」ê「奴僕」。Án-ne,就有上帝kah in同在,即使面對性命ê威脅mā m̄免驚惶,因為上帝必定會「保護」、「拯救」in。

第11到12節,說明主人ài怎樣對付hiah-ê欺負主人ê奴僕ê人。對chiah-ê專門欺負人ê人,上帝會審判in ê罪,hō͘ in慘遭極大ê失敗,á是「死亡」,甚至會hō͘上帝「消滅」。

第13節,chia koh一pái表示上帝會伸出祂ê「正手」扶持祂所揀選ê奴僕,會賜kā in賜福力量,hō͘奴僕thang khiā得真安穩,bē搖動。

第14節,「你雖弱小,mā m̄免驚惶」,這是上帝ê子民一定tio̍h有ê認bat。只要有上帝同在,tī人看起來siōng軟弱ê,mā kā變成siōng剛強(參考哥林多後書十二:7—10)。

第15到16節,第14節提起以色列人是「弱小」無力(參考申命記七:7),m̄-koh chit-má上帝teh-beh hō͘ in ná親像「裝上koh新koh利ê齒」,如仝一個部全新ê「phah穀機」,有能力徹底毀滅過去欺負in ê國家、族群。

第17到20節,當以色列人民被掠到外邦去做奴隸ê時,悽慘ê景象是連想beh「走chhōe水lim」mā bē-tàng得,chit時會「嚨喉乾渴」,真痛苦,如同在陰間一般(參考路加福音十六:23—24),chit段經文是詩人用上帝當年帶領以色列人ê祖先出埃及,進入曠野ê時ê背景來描述。上帝tī沙漠曠野地帶,hō͘石磐湧出泉水(參考出埃及記十七:5—6)。而且顯示奇異ê神跡,hō͘沙漠生出「香柏樹kah金合歡樹」、「松樹、杉樹,kah黃楊樹」、「石榴樹kah橄欖樹」等非常珍貴ê建材。以色列人民後來用頂面所講chiah-ê樹木當建造聖所kah約櫃ê材料(參考出埃及記廿五:5、10、13)。Chiah-ê lóng teh顯示上帝ê神能,大家一看就「會明白」。

重新查詢 專卷研經 以賽亞書系列
錯誤回報,請聯繫