以賽亞書 4章1節 到 4章6節   背景資料  上一筆  下一筆
Tī頭前已經提起過ê,第四章2到6節是kah第二章2到5節、第九章1到7節等等三段經文,是第二到十二章中三篇屬tī美好信息ê預言,先知講出上帝beh hō͘ in猶大人民一個新ê ǹg望—上帝ê拯救。這拯救所帶來ê,是一個全新ê性命,m̄-nā是猶大人民,耶路撒冷城mā kā koh一pái成做閃耀ê城市,是萬民共同敬拜、歌頌上帝ê所在。

而tio̍h注意ê是,chit種全新性命是徹底洗盪心靈ê污穢了後chiah會產生,ná親像當年出埃及進入曠野,經過四十年徹底洗盪了後,才能hō͘以色列人民以一個全新ê性命生活tī上帝所應允ê土地—迦南地。Koh講,chit章經文tú好kah前一章所講ê完全顛倒,mā thang講,tī上帝ê嚴厲懲罰了後,祂ê恩典koh一pái施tī祂ê子民身上,因為in teh經歷過嚴厲懲罰ê苦難了後,已經有懺悔、認罪ê心,koh一pái tńg來到上帝ê面前。

第1節,chit節若併tī第三章26節後面來讀會比較khah順。

Chia講tī上帝審判日子來臨ê時,「七個cha-bó͘人beh giú-tiâu一個cha-po͘人」,表示大多數ê cha-po͘人已經戰死戰場(參考第25節),寡婦chē到無法度生存,in為求ē-tàng生存落去,只好共同óa靠一個cha-po͘人。Chia所講ê「嫁bē出去ê侮辱」,有一個含意是teh指因戰爭遇tio̍h敵軍ê強暴致使有娠,因為án-ne,一定tio̍h趕緊chhōe-tio̍h婚姻ê對象,thang hō͘生落來ê kiáⁿ,bē致使成做孤兒。Cha-bó͘人成做寡婦已經真可憐了,若koh再hō͘子女成做孤兒,性命koh khah悲慘。

第2到6節,這是一首希望ê詩歌。

Tùi第二章開始,就一再出現「時chūn快到」Chit-ê詞,表示上帝審判時刻一定會來到。每pái談起上帝審判來臨,通常lóng有兩種意義:一表示對違背上帝旨意ê人,kā進行嚴厲ê懲罰。二是對hiah-ê堅守kah上帝之約ê子民,上帝ê恩典kā是豐富滿溢。

Chit首詩歌講過去上帝忿怒ê時,所摧毀ê一切果園,taⁿ lóng kā重新發出新芽,而且生長茁壯,ē-tàng結出累累ê果子。Á存活落來ê子民,lóng是經過上帝挑選出來ê,chiah-ê子民lóng kā koh一pái被上帝看做是聖潔ê子民,kah過去大大無仝。M̄-nā án-ne,已經被摧毀而成廢墟ê城市,特別是錫安ê耶路撒冷城,會重現過去ê榮耀,上帝beh kah chit-ê城同在,ná親像當年上帝帶領以色列人民ê祖先離開埃及進入曠野ê時仝款,「日時頭tio̍h用雲彩遮蓋in,tī暗時,tio̍h用煙火照耀in」。

重新查詢 專卷研經 以賽亞書系列
錯誤回報,請聯繫