以賽亞書 38章1節 到 38章22節   背景資料  上一筆  下一筆
以賽亞書第三十八章記載兩則資料,一是猶大希西家王破病後來得tio̍h上帝允准得tio̍h痊癒ê情形。另外一則資料,是講希西家王康復了後,寫一首詩歌歌頌上帝。有關希西家王患病kah得tio̍h痊癒ê記事,mā記載在列王紀下第二十章1到11節,以及歷代志下第三十二章24到26節。Thang看tio̍h ê是歷代志官方ê資料siōng簡單,而且加上評語,而列王記下ê資料,kah以賽亞書ê siōng大差異,是用賽亞書收集了一首希西家王寫ê詩歌。三本經冊lóng強調上帝醫希西家王ê時hō͘了伊一個兆頭,證明上帝一定會醫伊ê病。可惜三本經冊都無寫出患ê是甚麼病症,只講ná病hō͘希西家王面臨死亡ê威脅,m̄-koh上帝憐憫,hō͘伊chē活了十五年。Á歷代志下作者強調,希西家王bē記得家己ē-tàng復原,是因為上帝憐憫,反tńg驕傲起來,bē記得上帝。

第1節,chit句「約tī chit時chūn」,指ê大概是tī主前702年ê時刻,chit時,亞述ê西拿基立軍隊已經佔領拉吉城。Á希西家王「害病,差不多死去」。Chit時chūn先知以賽亞聽tio̍h上帝ê指示,去對國王希西家講上帝beh伊傳達ê話,ài希西家王kā「家務」處理好,來方便「準備後事」。

第2到3節,「希西家轉面向(ǹg)牆壁」,表示伊心中艱苦心、無法度接受chit-ê事實,同時向上帝祈禱。伊表示家己「一心一意事奉」上帝,懇求上帝ē-tàng記念伊。了後「禁不住號咷痛哭起來」。

第4到5節,就tī希西家王祈禱了後,上帝koh一pái命令先知以賽亞tńg去kah希西家王講話,內容kah頂pái完全無仝,伊表示上帝「已經聽tio̍h」希西家王ê「祈禱」,mā「看見」伊流了「目屎」。聖經作者一再用「上帝聽見」、「看見」Chit種連續用詞,來表是上帝一定會採取落來一步ê行動(參考出埃及記二:24—25、7、9)。果然,)上帝講beh hō͘希西家王「chē活十五年」。這是非常特別ê恩賜,表示性命是由上帝決定延長á是縮短(參考創世記六:3,路加福音十二:25)。

第6節,上帝除了beh hō͘希西家王加活15年外,iáu koh khah「tùi亞述皇帝手裡拯救耶路撒冷」,這是極大ê恩典,mā回應了第三十七章35節,表明上帝án-ne決定,是為tio̍h beh維護祂ê榮耀。

第21到22節,chit兩節原本編輯khǹg tī第20節詩歌後壁。《現代中文譯本》kā它改編khǹg tī續接第6節。Chit兩節可能m̄是本來ê資料。Chia提起上帝ài先知以賽亞轉告希西家王ê奴僕,治療伊破病ê方式,就是beh王ê奴僕the̍h帶「無花果膏」塗tī王ê瘡口上,án-ne就會「痊癒」。Á希西家王問先知以賽亞,有甚麼「預兆」thang來證明chit項恩典信息?

第7到8節,上帝會答應hō͘希西家王「一個預兆」,為tio̍h是beh堅定伊ê信心,thang hō͘伊知影上帝是一個「信守諾言」ê神。就án-ne先知以賽亞ài伊選擇,看是「beh日影前進十步,á是倒退十步」?希西家王則回答講:「日影前進十步容易,我beh它倒退十步!」果然,上帝hō͘「日影」tī「臺階上」倒退十步。表示上帝是萬物ê創造主,一切受造物lóng聽從上帝ê話。

    第9節,tùi chit節開始到第20節是希西家王tī病癒了後寫ê感謝、o-ló詩歌。Chit首詩篇後來常用tī聖殿禮拜中,特別是當有人重病得醫了後,就會到聖殿用chit首詩歌獻上感恩之祭。

第10到11節,希西家王講原本擔憂tī「如日中天ê年華」,會因破病來死去。因為hit時伊chiah 39歲。而且耶路撒冷iáu受tio̍h亞述ê圍困,國家正面臨生死存亡時刻hō͘伊無法度安心。另外一方面mā會感覺遺憾「無法度koh再見上主」,看見上帝奇妙ê作為。

第12節,希西家王用兩種譬喻說明伊ê性命teh-beh終止,ná親像織布機斷線,á是親像一座被拆下ê帳棚性命。

第13到15節,為tio̍h án-ne,伊痛到無法度忍受,「kah-ná蝨母咬斷」骨頭hit種痛苦。用粉鳥叫ê聲音來描述家己已經虛弱無比,ē-sái講是叫bē出聲音來。Chit時伊清楚知影只有上帝chiah有辦法幫助伊。伊認為家己會án-ne有重病纏身,是因為出tī上帝ê旨意。Á伊mā清楚,上帝用重病懲罰伊,是因為得罪了上帝。因為án-ne,用認罪ê語句表示「無法度講甚麼」。

第16節,chit節mā是一句下願ê話。希西家王講只有上帝ē-tàng醫伊ê病,因為án-ne若ē-tàng康復起來,tī伊活teh ê日子裡,lóng會為上帝而活。

第17節,chia ê「愁苦變成安寧」,表示希西家王ê重病已經得tio̍h痊癒。因為án-ne,伊講上帝「赦免」了伊ê罪。這tú好說明早期東方社會認為破病á是災難,lóng是kah罪有關係。

第18節,chit節thang參考詩篇第六章5節,另外詩篇第三十篇9節,詩人講:「我死去有甚麼好處?我進墳墓有甚麼好處?死人kám ē-tàng頌讚你?In kám ē-tàng宣揚你ê信實?」而類似chit種詩歌一再Tī聖經中出現,像詩篇第八十八篇10到11節、第一一五篇17節。

會有chit種詩歌出現,是因為以色列人民有一個認知:tī「陰間」是痛苦ê,bē有歌頌上帝ê聲音出現。因為「陰間」是犯罪ê人受懲罰ê所在,而且hit所在ê懲罰,是用永遠bē熄滅ê火一直teh燒tio̍h。

第19節,「只有活teh ê人chiah o-ló」上帝,是因為性命中非常重要ê一件事,因為性命是tùi上帝來,只要有性命ê,lóng應該tio̍h歌頌上帝ê榮耀kah聖名(參考詩篇六十三:3)。

第20節,chit節真清楚講上帝已經治癒了希西家王ê病,因為án-ne,伊tio̍h用「彈琴、唱歌o-ló」上帝ê恩典。Mā ài tī「有生之日」,tī「聖殿中o-ló」上帝


重新查詢 專卷研經 以賽亞書系列
錯誤回報,請聯繫