以賽亞書 36章13節 到 36章22節   背景資料  上一筆  下一筆
Chit段經文是描述chit位亞述大將第二pái對所有耶路撒冷城內守軍kah人民公開講ê話。內容lóng是ài城內人民m̄-thang躊躇,投降是唯一hō͘ in ē-tàng生存ê途徑。Koh khah重要ê,chit位大將tī chia kā耶和華上帝kah其他民族ê神明來比較khah,這tú好是十誡siōng禁忌ê事—崇拜其他kah耶和華上帝對立ê神(參考出埃及記二十:5)。因為án-ne,chit位大將所講ê話,就是teh褻瀆上帝ê神聖。

第13節,tùi chit節到第20節,lóng是chit位亞述大將用希伯來語講ê話。伊用「大聲叫」ê方式,ài in聽「亞述皇帝ê諭旨」,不要理會希西家王所講ê寫phoe去靠上帝。

第14到16節,Tī chit段經文中,chit位大將一再強調「希西家ê欺騙,希西家無法度救」猶大人民脫離亞述攻打了後所帶來ê災難。伊會án-ne講,就是beh煽動城內ê猶大人民,背叛希西家王。M̄-koh伊bē記得並m̄是希西家有能力救伊ê人民,卻是希西家所óa靠ê上帝。伊ài城內ê猶大人民只要出來投降,就ē-tàng有得食、lim,甚至「有餅和美酒」。Chia所謂「照舊食家己ê葡萄、家己ê無花果,lim家己井裡ê水」,意思就是hō͘ in保有原本ê產業,m̄-koh條件就是ài in「出來投降」。

第17節,m̄-koh chit節soah講出伊tī第16節所講ê應允是白賊,因為chit句「遷到另一個所在,kah lín ê本土略約仝款」,已經真清楚洩露了真相,mā就是當猶大人民投降了後,就會hō͘ in俘虜送到外地去,in必定會放棄現有ê產業。Kah頭前第16節所講ê「照舊食家己ê葡萄、家己ê無花果,lim家己井裡ê水」,是完全無仝款。當伊講「略約仝款」chit句話ê時,已經忽略當年上帝應允hō͘以色列人民ê chit片迦南地,乃是siōng肥、流奶kah蜜之地,無別ê所在thang比並。

第18到20節,chit三節清楚看tio̍h chit位亞述大將所講ê話,已經kā耶和華上帝kah其他ê神明khǹg tī仝一個平台頂看待,這mā是褻瀆上帝ê神聖。Chit位亞述大將kā皇帝西拿基立當做「至高」ê神明看待。伊teh kā猶大人民講,in所信靠ê耶和華上帝,mā仝款無能力救in脫離亞述ê攻擊,ná親像當年亞述人ê祖先攻落撒馬利亞城ê時,上帝mā無伸手救助是仝款ê。

Chia提起「哈馬ê神」,這是設tī所羅門王統治區內siōng北pêng ê城鎮(參考歷代志下八:3—4)。「亞珥拔」,是靠近「哈馬」ê一座城市,以上兩座城市,lóng tī主前717年chìn前,被亞述帝國所佔領。「西法瓦音」ê詳細地點chit-má已經無清楚了。Chit位亞述大將提起頭前chiah-ê神明ê事,主要teh強調亞述帝國ê大軍,ē-tàng摧毀所有國家ê神明,包括耶路撒冷ê猶大人民所敬拜ê耶和華上帝。

第21節,「人民lóng m̄作聲」,因為in lóng「遵照希西家王ê命令」。這mā顯示了chit三位外交使節代表已經無言thang對,chit對外交官員來講是非常痛苦ê一件事。

第22節,chit節講chit三位代表「悲痛地拆裂衫褲」,真痛苦地「tńg去kā kā亞述大將ê話向希西家報告」,並kā皇帝西拿基立所寫ê信帶tńg來hō͘希西家王看。


重新查詢 專卷研經 以賽亞書系列
錯誤回報,請聯繫