以賽亞書 33章1節 到 33章24節   背景資料  上一筆  下一筆
Chit章延續tio̍h前一章所提起上帝ê審判,而會受嚴厲審判ê,就是óa靠戰車、戰馬等軍事武力而囂張ê亞述帝國。Tī歷史上非常有名ê一件事,就是主前701年西拿基立率軍圍攻耶路撒冷城,因為猶大希西家王óa靠上帝,因為án-ne,西拿基立王ê軍隊tī一夕之間hō͘上帝所差遣ê天使刣死,死亡ê軍兵chē kah十八萬五千人,逼kah伊趕緊撤兵tńg來尼尼微城(參考以賽亞書三十七:36—37),解除了耶路撒冷被圍困ê危機。

第1節,「咱ê敵人有災禍à」。這是第六pái講tio̍h「受災」,而對象則是teh指猶大ê敵人亞述帝國。

先知以賽亞tī chia指出,過去亞述怎樣凌辱小國、欺詐弱小民族ê事,都無人敢對in怎樣,m̄-koh chit-má上帝beh審判,祂beh建立公平、公道ê新世界,絕對不允准有chit種惡質大國存在。因為án-ne,上帝伸手kā in ê角色調換,過去亞述真霸道,chit-má「in就beh被別人搶奪欺詐了」。

第2到6節,chit節開始到第9節,是一篇祈禱文。Teh請求上帝伸出祂ê膀臂來救助。Chit篇祈禱文中,先知以賽亞教導猶大人民懇求上帝ê「憐憫」,並清楚表示kā希望寄託上帝手中,án-ne敵人來攻擊ê時,上帝會出手庇護。有上帝當in ê主宰,耶路撒冷就會充滿tio̍h「正義公平」、「國家安定」,大家lóng清楚知影,「敬畏上主就是in siōng大ê財產」。

第7到9節,chit節koh一pái提起hiah-ê去走chhōe埃及援助ê外交使節團,所tú-tio̍h ê困境,遠比走chhōe上帝iáu koh khah困難。因為上帝就tī人ê身邊,祂是無所不在ê神,m̄-koh人卻往往捨近求遠,這是愚昧者ê作法。這mā說明猶大王國原本認為亞述帝國the̍h-tio̍h了勒索ê錢財就chiâⁿ實會撤軍,m̄-koh實際上並不如此,in反tńg增加兵力圍困耶路撒冷,因為án-ne,「人kah人hō͘ m̄信任」,mā因為戰爭頻繁,致使「土地荒蕪」,即使是siōng肥ê「沙崙ê山谷」mā會荒涼,因為上帝無降落甘霖。

「巴珊kah迦密山ê樹葉lóng掉光」,「巴珊」原本所代表ê是súi ê草原,肥ê土地,因為án-ne,畜牧業非常發達。Á「迦密山」則有「花園」、「果園」之稱,形容風光景色真美。M̄-koh chiah-ê taⁿ lóng改變à,kui個生態環境已經呈現死亡ê現象。這m̄是人ê能力造成,卻是因為上帝懲罰所帶來ê結果。

第10到13節,chia講出上帝審判ê情形,就是用火來燒毀一切,連「石頭」mā會hō͘燒毀成「火灰」一般,lóng無任何價值thang講。Chit時chūn,「遠方ê人」kah「近所在ê人」,lóng「ài beh看」、「tio̍h承認」上帝是「權能」ê神,祂決定一切,並且照計畫進行,m̄是用人ê知識、經驗所ē-tàng認bat、測知。

第14到16節,當上帝審判來臨ê時,些藐視上帝ê「錫安ê罪人」會膽戰心驚地講上帝ê審判像「永遠bē熄滅ê火」。這火,mā ē-tàng指地獄、陰間ê火。只有「行為端正」、「言語誠實」,ê人就「ē-tàng生存」。

第17到19節,chit段講tio̍h上帝拯救來臨ê時,猶大人民就會看見性命ê ǹg望,因為有一位帶「光輝」ê君王beh來統治,mā會看見上帝賞賜「廣大ê國土」,無koh看見「外國ê抽稅ê人」,mā bē「有傲慢ê外國人teh講lín聽m̄-bat ê話」, 表示國家是獨立自主ê。

第20節,耶路撒冷城一直是以色列民族慶祝重要節期ê中心城市,mā是tī chia tio̍h成做救贖ê中心。因為慶典tī chia舉行,所以來自世界各地ê朝聖客長途跋涉到chia。

第21到23節,就tī上帝管理、固守ê城市,就帶有祂ê光輝顯示出來。因為án-ne,無任何外國武力ê船艦ē-tàng靠近,即使靠近了,mā hō͘不上武力。因為這是上帝ê城市,無論是甚麼人來到chia,只有ē-tàng歌頌o-ló,m̄是掀起戰火á是爭端。Chiah-ê外來ê船隻,所載運ê貨品,m̄是用來戰備ê路用,卻是用來當做獻上感謝之祭。

第24節,先知以賽亞講出tī上帝管理ê城市,必定是一個非常理想ê所在,tī chia無koh有罪惡ê纏絆,mā bē痛苦。Ná親像啟示錄第廿一章1到4節作者所講ê新城仝款。

重新查詢 專卷研經 以賽亞書系列
錯誤回報,請聯繫