以賽亞書 3章1節 到 3章26節   背景資料  上一筆  下一筆
Chit章真清楚談起上帝嚴厲ê審判,會hō͘ hiah-ê用各種無妥當手段累積大量財富ê眾貴族,tī一夕之間lóng會因為上帝ê審判來臨,完全消失匿跡。原因是chiah-ê社會眾領袖原本是上帝揀選來替祂管理子民,維護社會正義ê。M̄-koh chiah-ê社會領袖卻m̄是án-ne,卻是藉這欺壓上帝ê子民,這是上帝siōng無法度忍受ê事。因為án-ne,上帝決定採取懲罰ê行動。Chiah-ê懲罰m̄-nā tī社會領導階層中,mā kā波及in厝裡ê婦女,理由是in過去mā óa靠丈夫ê權勢,奪取別人ê財富,享受富貴奢華ê生活。Taⁿ in會hō͘侮辱到無顏見人,只有ē-tàng坐tī塵土中嚎啕大哭。因為in taⁿ會失去過去ê一切,甚至連beh遮身軀siōng基本ê衫褲mā無ā。

第1節,「人民日常生活所需要ê一切lóng the̍h走」,chit句話中ê「一切」,m̄-nā是生活用品而已,mā包括維護社會秩序ê氣力。Chia特別指出the̍h走in ê「食物kah水」,這兩項ē-sái講是維護每日生活,mā是每一個人性命存活siōng基本ê要件。當上帝決定kā chit兩項物件the̍h走ê時,mā就teh表示上帝beh用「死亡」來懲罰猶大人民。

第2到5節,chit段經文thang清楚看出tī一個動盪不安ê社會裡必然會有ê現象,就是無好ê領導者,連基本ê倫理道德lóng酥腰落去,而chiah-ê就是上帝對悖逆子民ê懲罰之方式。

第6到7節,「tī he日子」,tī第二到四章中一再重複出現,說明這審判ê日子必定會來臨。Chia講tio̍h tī siōng艱困ê日子裡,無人會想beh出來做領導者,因為連家己lóng三餐不繼,根本無法度koh再為其他iau餓ê人chhōe食物。

第8到9節,「耶路撒冷會倒à!猶大會酥腰落去!」Chiah-ê預言lóng tī主前586年應驗ā。原因是in違背上帝ê命令,去做無應該做ê事,這等於是「公然侮辱上帝」仝款。結果會親像「所多瑪」城被上帝毀滅,城婦人人民被上帝所棄。因為「所多瑪」城內ê人已經亂到無法無天,連上帝ê特使mā想beh侮辱(參考創世記十九:5)。Á tī chia,猶大人民則根本就無kā上帝khǹg tī眼內。

第10到11節,chit兩節是相對句話。「行為正直ê人kā有喜樂,事事順利」,相對tī「作惡ê人卻會受災」,表示上帝ê賞罰分明。

第12節,「我ê子民」,這是一種呼喊ê聲音,chit種呼喊是帶有警告ê意味tī其中。Á「我ê子民toh」則感嘆句。「被孩童欺壓,被婦女管轄」,chit句話是種扼腕吐氣ê意思。因為「孩童」表示無成熟、幼稚,而「婦女」teh表示懦弱、無力。當上帝ê選民被án-ne軟弱ê人欺負,豈m̄是真好笑ê事?會有chit種情形出現,是因為tī猶大人民中已經chhōe bē-tio̍h好ê領導者帶領in。

第13到15節,chit段經文說明上帝beh審判猶大人民中ê「長老kah領袖」,前者teh代表部落ê大老;後者代表統治階層ê君王、貴族,mā包括先知kah祭司在內,chiah-ê lóng是社會ê意見領袖kah領導階層。Chia講chiah-ê領導者「破壞了葡萄園」,表示in就是tùi sàn-chhiah人ê厝內掠奪財物而富有,taⁿ chiah-ê財物tú好就是上帝審判in ê證據。Chit種譴責語句mā出現tī先知ê信息中(參考阿摩司書三:10、五:11,彌迦書二:1—2、六:10—12,西番雅書一:9)。

第16到24節,chit段經文lóng是teh描述上帝ài怎樣懲罰猶大ê貴婦,原因是in驕傲到已經完全無kā上帝khǹg tī in心中,in只知影裝飾打扮得非常華麗。當上帝懲罰來臨ê時,chiah-ê顯(hiáⁿ)目ê裝扮m̄-nā會消失殆盡,上帝甚至iáu koh khah「剃掉in ê頭毛,顯露in ê下體」,甚至「身軀發出臭味」,kah in現有ê景況完全顛倒,而且是koh khah惡化,用chit種方式hō͘ in tú-tio̍h到嚴重ê侮辱。

Chia所謂「顯露in ê下體」,意思是teh指in會為tio̍h生存,而淪落為娼妓。

第25到26節,chia真清楚談起上帝懲罰ê方式,就是用戰爭來嚴懲猶大人民。若是出tī上帝ê旨意,就算siōng強壯ê勇士,mā是難逃戰死戰場ê結果。城池會變成廢墟一般,ná親像赤裸裸ê婦女hit種,hō͘人不堪入目。

重新查詢 專卷研經 以賽亞書系列
錯誤回報,請聯繫