以賽亞書 28章1節 到 28章13節   背景資料  上一筆  下一筆
Tùi chit章開始一直到第三十五章止,chit段經文是用賽亞書真重要ê一個段落。因為Tī chit段經文中,探討一個真重要ê主題:當敵國亞述繼續強大,威脅tio̍h猶大國ê時,猶大國ê領導者到底tio̍h óa靠上帝?Á是是beh óa靠他國強大ê武力kah政治力量?若是beh óa靠上帝,伊就一定tio̍h tńg來到聖經ê教導,全心全意信靠上帝。其實,chit種問題m̄是只針對南國猶大,卻是針對所有以色列人民。

Chit段經文有一個重要ê歷史背景,就是tī亞述帝國皇帝西拿基立執政時代,國勢非常強盛,所以當西拿基立派兵攻打耶路撒冷城ê時,伊ê大將以非常狂妄囂張ê姿態對猶大國惹事(參考以賽亞書第三十六章)。其實,tī希西家王ê時代,宮廷中就有真chē參謀認為ē-tàng óa靠埃及ê軍事援助,避免被亞述帝國併吞。希西家王聽從了chiah-ê參謀ê建言,結果反來致使真chē城鎮被亞述帝國佔領,最後危kah首都耶路撒冷(參考以賽亞書三十六:1—2)。先知以賽亞就是Tī chit段經文中,責備當時宮廷幕僚主張去投靠埃及ê想法是錯誤ê。Á先知以賽亞則強烈建議希西家王一定tio̍h真心óa靠上帝ê帶領,才能擺脫亞述ê侵犯(參考以賽亞書三十七章)。

Chit段經文是針對北國以色列所提出ê警告。先知以賽亞透過預言北國以色列ê滅亡,來警告南國猶大ê人民,beh tùi北國以色列所tú-tio̍h ê災難,得tio̍h警誡,kah早悔改歸向上帝。Tī chit段信息中mā同時清楚指出chiah-ê宗教眾領袖ê低俗、bē-tàng,就ná親像現代ê「神棍」一般,kan-taⁿ會欺騙人民,m̄知án怎忠實tī上帝ê話語,koh khah bē真實傳達上帝ê信息。

第1節,chia提起第一個「受災」ê預言。「光榮」、「花冠」、「香水」等用詞是描述北國以色列首都撒馬利亞chit-ê城市過去輝煌ê景況。然後用「lim得爛醉倒tī土腳」chit句話說明北國以色列ê領導者會失去明智ê心靈,致使kui個國家失去秩序,無法度khiā穩腳步。因為án-ne,chia用「倒tī土腳」,其實tú好teh表示國家將會滅亡。

第2到4節,chit段經文表明上帝ê忿怒,ná親像「強風」、「暴雨」、「猛烈ê大水」,chiah-ê大自然ê氣力lóng是人無法度抵擋ê,in ê威力會大到hō͘人膽戰心驚。國家會面臨chit種結果,是因為領導者ná親像「lim醉了酒」仝款,思路不清,意識霧霧無清了。Chit種領導者只會hō͘敵人輕視,甚至hō͘人以對待奴隸ê輕蔑態度,逼in kah外族通婚(參考列王記下十七:5—6、十七:24)。

第5到6節,先知文獻ê特色,就是描寫上帝有懲罰,m̄-koh mā有救恩,而上帝ê救恩總會跟tòe上帝懲罰來到。Chit兩節講出chit種信息,kah頭前第1到4節呈現出完全無仝ê結果。Chia出現「劫後餘生ê子民」,表示chiah-ê人lóng是對上帝忠實,無去拜其他偶像神明ê子民,即使tī siōng艱困ê環境下,in iáu-koh堅守tio̍h kah上帝之間ê純潔關係。上帝會kā祂ê榮耀ná親像花冠般,koh一pái「戴tī劫後餘生ê子民」,恢復in原本屬tī上帝揀選ê kiáⁿ民應該擁有ê榮耀。Koh講,上帝mā會賞賜公義ê社會kah生活環境hō͘「劫後餘生ê子民」。

第7到8節,「先知kah祭司」,前者是teh指上帝ê代言者(參考列王記上廿一:14);後者是teh指帶領人民透過獻祭敬拜上帝ê宗教師。Chia指出chit兩種宗教領袖,mā是仝款「醉得東倒西歪」,表示in根本就「bē明白上帝kā in賜福ê異象」。看bē-tio̍h上帝hō͘ in ê「異象」,mā無能力thang「辨別是非」。Tùi第8節就thang看出kui個社會混亂ê狀況。

第9到10節,chit兩節講出人民對chiah-ê宗教領袖傳達ê信息不滿。因為m̄知in到底「teh教kóa甚麼」,只有ē-tàng親像對嬰á講話仝款,用siōng簡單ê語詞。Chia用「一課一課、一陣一陣、一個字一個字地教導」,來形容眾先知就是kā人民lóng當做甚麼lóng m̄-bat、lóng bē ê孩童,mā反映出chiah-ê眾先知根本就無認真看待上帝ê信息。

第11到13節,chit段經文已經講出上帝ê審判,如果in iáu是「m̄聽」上帝ê話,上帝ê審判就是會「打發外國人,用奇異ê語言來教導」in,這明白指出:拒絕聽從上帝ê話語,等於自chhōe滅亡。因為chiah-ê外國人所講ê話in完全聽m̄-bat(參考以賽亞書三十三:19),tú好ē-tàng用來懲罰in悖逆上帝ê心。In會親像幼兒tú學行路仝款,每「行一步」,就會「摔一跤」。

重新查詢 專卷研經 以賽亞書系列
錯誤回報,請聯繫