以賽亞書 26章1節 到 26章21節   背景資料  上一筆  下一筆
Chit章是另外一首o-ló ê詩歌,koh一pái teh表白上帝子民心內ê意念,mā ē-sái講是teh向上帝告白,in全心信靠上帝。Chit首詩歌kah第廿五章1到5節ê詩歌真接近,lóng是teh表明看見上帝審判了後,所帶來ê赦免kah拯救ê恩典。Tùi chit首詩歌mā thang看tio̍h上帝ê子民忠心地仰望kah óa靠上帝保守、帶領。

第1節,詩人一開始就o-ló上帝會成做「猶大地」ê守護者,有上帝同在ê城池,必定會非常「堅固」。

第2節,tī上帝看守ê城池歡迎所有「正義ê國家」、「忠信ê人民」進入城內。換句話講,tī上帝ê國度裡是充滿「正義ê」,ná國ê人民mā是「忠信」可靠ê。因為「正義」kah「忠信」lóng是上帝ê特徵。

第3節,chit節提起「完全ê平安」,teh表示「滿足」、「豐富」、「安康」等意思。上帝會賞賜chit種平安hō͘「意志堅強ê人」,mā就是無論tī甚麼境遇下,堅決bē改變心志,全心「信靠」上帝ê人。

第4節,先知以賽亞tī chia講出真正信心,並m̄是一時、瞬間ê時刻,卻是一生ê大事,是「永遠」ê態度。只有tī chit條件之下,才能享受上帝「時刻保護」ê果子。

第5節,相對tī頭前四節所提起ê,óa靠上帝、忠實tī上帝ê人,就是chiah-ê驕傲ê人。上帝使用ê方式,就是kā in自認真「堅固ê城」hō͘ in「摧毀」,並且hō͘ in認為「堅固ê城牆成做廢墟」,chit時chūn,驕傲者chiah會發見家己ê能力是jōa-ni̍h-á有限、軟弱,無法度抵擋上帝ê手懲罰所帶來了後果。

第6節,kah第5節tú好呈現對照;tī第5節,上帝懲罰hiah-ê驕傲者。當上帝摧毀驕傲者所建造起來ê城池了後,過去hiah-ê被欺負、「壓迫ê人」,kah hiah-ê「窮苦ê人」,in tio̍h用腳「踐踏」tī chiah-ê廢墟之上。

tī先知以賽亞ê信息中,壓迫人ê終會被侮辱,chit種信息是一再出現,thang參考第四十九章24到26節、第五十一章22到23節。這說明上帝確實是一位會報應ê上帝,祂一定會為受迫害者伸冤。

第7節,kui本聖經所紹介ê上帝是一個「公義ê上主」,因為án-ne,祂揀選ê奴僕一定tio̍h mā是án-ne(參考創世記十八:19),án-ne才能顯示上帝公義ê特性。Á「公平ê人」、「正直ê人」,lóng是上帝一定會照顧、保護ê對象。

第8節,chia ê「thèng候」、「願望」等lóng teh表明心中ê祈願。一個真實追隨上帝ê人,無論環境jōa-ni̍h-á劣,伊iáu是祈求照上帝ê旨意而行。

第9節,chia只譯出「瞑間」,《現代中文譯本》kah中文《和合本》都無kā「清早」mā譯出來,tī天主教《思高聖經學會版本》則清楚譯出:「阮ê心靈tī夜間渴望你,阮ê心神tī清早chhōe你。」而《呂振中》教授ê譯本mā有「瞑間」kah「早起」。Án-ne koh khah清楚,tùi「瞑間」到「清早」,這說明kui工、kui工、全天ê意思。一個忠心ê上帝子民,必定是隨時lóng渴慕上帝ê旨意成全,mā願意一生lóng tòe-tiâu上帝ê旨意而行。而且當上帝ê子民看tio̍h上帝teh進行審判ê時,就會發見上帝確實是公義ê審判者。

第10節,chit節指出邪惡者永遠學bē甚麼是「仁慈」,mā拒絕學習。因為in ê心中存驕傲,無認為上帝會審判,mā m̄相信上帝有能力ē-tàng審判in,chiah膽敢tī上帝ê土地頂面「為非作pháiⁿ」。

第11節,chit節講出審判來臨ê時,chiah-ê驕傲ê作惡者,會看tio̍h遵行上帝旨意ê子民得tio̍h恩典,kah in ê落場差別真大。

第12到15節,chit段詩歌lóng談起上帝拯救ê恩典。上帝ê恩典是豐富ê,而且是hō͘ in夠額ê性命力。因為有上帝ê疼kah拯救,因為án-ne,就算是tī伊人「轄制」之下,mā bē孤獨,因為知影真正ē-tàng óa靠ê是上帝,並且相信公義ê上帝,一定會「懲罰」、「消滅」hiah-ê眼中無上帝ê人、社會、國家,hō͘ in「無法度復生」,永遠沉淪tī深淵中。Án-ne,所有óa靠上帝救助ê人、國家、族群,就會到四界傳頌上帝ê名。

第16到18節,chit段詩歌提起過去hō͘上帝懲罰ê經驗,m̄-nā國勢不振,人ê性命力mā lian去,包括無koh活ê期待。In所體驗tio̍h ê痛苦,ná親像產婦臨盆ê痛苦仝款,只有ē-tàng用「呼叫」、「haiⁿ-haiⁿ叫」來表示性命痛苦至極之態。

詩人tī chia特別提起chit句「無造福別人」,原本上帝ê揀選,是為tio̍h beh hō͘萬國萬民因為上帝子民ê緣故蒙福(參考創世記十二:1—3)。Á棄sak上帝ê子民,無法度為別人帶來福氣,因為in本身會受tio̍h上帝嚴厲ê懲罰。

第19節,chit節ê經文thang參考以西結書第三十七章1到14節,以及但以理書第十二章2節所提起ê koh活信息。性命ê ǹg望是tī「koh活」,這ē-sái講是基督教信仰siōng重要ê內含。苦難固然帶來性命ê死亡,m̄-koh上帝有大能力,會因為祂拯救ê恩典,hō͘已死ê性命,重新koh再造。

第20到21節,chit兩節是chit首詩歌ê結尾,談起最後ê審判,是tùi上帝來ê審判,這審判是非常嚴厲ê。Ná親像當年出埃及chìn前ê Pôaⁿ過節情景,上帝ê天使pôaⁿ過了以色列人民ê厝,in一定tio̍h進入厝內,而且關密了門(參考出埃及記十二:22—23)。因為上帝嚴厲ê審判就beh來到。大家tī厝內停留到「上帝ê受氣消失」,因為上帝bē永懷忿怒。Koh講,tio̍h趁chit-ê機會真心悔改,上帝就會改變本來tio̍h執行ê懲罰之計畫。若不如此,當上帝懲罰來臨ê時,無任何人ē-tàng隱藏所犯ê過錯,一切lóng會暴露出來,像希伯來書第四章13節作者所講ê,每一個人lóng tio̍h「赤the̍h-the̍h暴露」tī上帝目睭前,接受上帝ê審判。

重新查詢 專卷研經 以賽亞書系列
錯誤回報,請聯繫