以賽亞書 25章1節 到 25章13節   背景資料  上一筆  下一筆
Chit章siōng主要是用一首歌頌上帝救恩ê詩歌為主軸,然後講述以色列人民心中對耶路撒冷ê期待。若是kā第廿四章14到16節a句對照第廿五章1到9節ê詩歌,就會koh khah清楚知影,chit群劫後餘生ê子民為甚麼會歡欣快樂ê歌頌上帝ê救恩。Tī所有先知ê文獻中,siōng強調ê信仰態度,就是「忠信誠實」,chit點mā ē-sái講是kui本聖經ê教導。就親像上帝揀選亞伯拉罕,ài伊「主持公道、伸張正義」仝款(參考創世記十八:19)。這是成做上帝子民siōng基本而且應該有ê態度,mā只有tī chit種前提下,才能成做上帝所歡喜ê子民(參考詩篇廿四:3—5)。

第1節,第1到5節真清楚是一首teh歌頌上帝ê詩歌。詩歌ê開始就講「上主ah,你是我ê上帝」,chit句話講出以色列人民對上帝ê信仰告白,表明上帝就是性命ê主宰。注意chia ê「實現」一詞,原本是teh指「信實」,表示上帝遵守原本kah人所立ê約,照約所講ê「實現」所應允ê一切計畫,上帝用祂奇妙ê手救助in脫離苦難。

第2節,chit節thang參考以賽亞書第廿四章10節所提起ê城市混亂之情況。

詩人講一個城市若是會失去上帝,chit種城市會ná親像廢墟一般,因為城裡ê人民無法度tùi性命中發出ê聲音,以及tùi生存中顯示出力量。

第3節,chia ê「剛強」、「強國」等詞,lóng是teh表示只有tī上帝ê庇護下,chiah有真正剛強,mā只有tī上帝ê看顧下,國家chiah有強壯thang講。

第4到5節,上帝m̄-nā是賜福hō͘強大國家ê子民,mā是beh用chiah-ê國家kah子民來為祂看顧「孤苦伶仃」kah「困苦」ê人民。換句話講,上帝賜福一個人,á是一個國家,hō͘伊剛強、壯大,主要ê目的是ài in照顧弱小貧困者,卻m̄是ài in去欺壓別人。因為án-ne,若有人利用上帝ê恩賜去欺負別人,伊會受tio̍h上帝嚴厲ê懲罰。因為上帝是貧困人「躲避風暴」ê所在,ná親像詩篇第四十六篇詩人所講ê,上帝是困苦者ê「避難所kah力量」。同時,上帝mā會kā強猛、驕傲者ê「弓」at斷,並且會phah碎in ê盾牌。詩人所講ê「弓」表示力量、武器。

第6到8節,chia雖然講豐富ê筵席是tī「錫安山」,m̄-koh卻是為「天下萬國預備」ê,並m̄是只有以色列民族獨享。因為án-ne所謂「錫安山」,它所象徵ê意義贏過實際理所在,tùi án-ne「錫安山」thang講是「上帝khiā起之地」。因為是上帝ê筵席,所以是歡喜、感恩ê喜宴,參加ê人lóng bē戴tio̍h「悲傷ê面罩」,頭殼頂mā bē罩tiâu tio̍h「愁雲」,hiah-ê人kah上帝ê關係已經和好,無koh有性命死亡ê威脅,因為tī上帝ê救恩中,永遠無死亡。

第9節,chit節mā反映出第6到7節所提起ê,tī he歡喜ê筵席中,人人lóng kā o-ló上帝ê救恩。Tī這所有o-ló中,siōng重要ê就是koh一pái告白講:上帝是性命ê救主。這是hiah-ê人經歷過性命ê苦難,並且tùi死亡ê邊緣行出來ê時,chiah醒悟過來,chiah明白真正救主,就是chit位賞賜性命、創造宇宙萬物ê主,祂chiah是koh真koh活ê神。

第10到13節,上帝beh「保護錫安山」,這是因為「錫安山」tī以色列人民ê心中所代表ê是上帝之山,上帝為tio̍h beh維護祂本身ê榮耀,一定會伸手保護。相對ê,欺負以色列人民ê摩押人會遭遇上帝遺棄,ná親像無用ê「麥楷」仝款hông棄sak。即使in「伸出手來,kah-ná tio̍h 泅水」,呼求上帝ê拯救,上帝mā bē救助,原因是in太驕傲。

重新查詢 專卷研經 以賽亞書系列
錯誤回報,請聯繫