以賽亞書 22章15節 到 22章25節   背景資料  上一筆  下一筆
Chit段經文mā是討論到有關耶路撒冷teh beh tú-tio̍h毀滅ê事,m̄-koh卻以兩個人來做預言ê材料。Tùi第15到19節,這是用宮廷大臣舍伯那,第20到25節,是用以利亞敬作題材。

第15節,「宮廷內務大臣舍伯那」,這官職真大,等於是宰相ê位階治理國政,是國王之下ê大主管。Tī第三十六章3節記載,tī希西家王時代,舍伯he是擔任王室ê書記。

第16節,「你是甚麼人」,chit句話有指責ê意思,表示舍伯那做超越伊ê職權ê事。理由是舍伯那「竟然敢tī山邊石磐中為家己挖墳」,這是teh指王室ê墳穴,只有王室家族ê人chiah擁有chit份殊榮。顯然地,舍伯he是利用家己ê權位,竟然敢tī王室ê墓穴中私自為家己預先佔有墳地。作者用chit種方式teh表示舍伯那有貪婪ê行為。

第17到19節,舍伯那 ê問題在tī自認重要,m̄-koh tī上帝眼中,伊卻tio̍h因為án-ne而丟官。Chia講舍伯án-ne beh死tī「伊一向引認為榮ê戰車邊á」,意思是teh指伊ná顯示tio̍h榮耀ê社會地位之súi座車,kā kah伊同齊被掠到外國(大國)去,成做他國ê俘虜kah戰利品。Á chit種預言mā teh kā舍伯那講伊往生ê所在,根本就免得墳墓,會死tī異鄉之地。Á受掠ê人就無甚麼地位thang講,chia用「捏成一團」來表示。

第20到22節,chia提起「以利亞敬」,伊mā是當時希西家王時代ê王室總管,kah舍伯那、國史大臣亞薩ê kiáⁿ約亞等三人,teh代表耶路撒冷去kah亞述ê西拿基立談判(參考以賽亞書三十六:3、11)。先知以賽亞講,以利亞敬是上帝ê「奴僕」,teh表示上帝看中、揀選。因為án-ne,伊kā取代舍伯那 ê位置。上帝beh用以利亞敬來協助國王治理猶大王國。Tī chia用「朝服」、「腰帶」,kah「鎖匙」等來表示官職ê階級。

第23節,表示以利亞敬會帶hō͘猶大國ê穩定,像用「釘子釘牢仝款」ê穩固。相對tī舍伯那所帶來ê是動盪不安。因為以利亞敬被揀選出來治理國政,為tio̍h án-ne,in家族ê人lóng因為án-ne而享受榮耀。

第24到25節,chit兩節有可能是後代加筆添上。Á chit節講出以利亞敬原本ē-tàng好好á治國,m̄-koh卻因為「伊ê厝內人kah親屬tio̍h成做伊ê重擔」,原因是chiah-ê家屬kah親人bē記得一件非常重要ê認知:m̄是以利亞敬有甚麼能力,卻是上帝揀選。原來以利亞敬ê家族認為ē-tàng想beh án怎to̍h án怎,利用伊ê名採行特權,圖利家己。結果反成做以利亞敬ê「重擔」。結果就喪失繼續統治ê機會。

重新查詢 專卷研經 以賽亞書系列
錯誤回報,請聯繫