以賽亞書 22章1節 到 22章14節   背景資料  上一筆  下一筆
Chit章thang分做兩個部分,前一部分是第1到14節,用四個段落來說明有關耶路撒冷ê毀滅,會hō͘敵軍攻入城內,毀壞所有ê一切。第二部分是tùi第15到25節,論到宮廷大臣舍伯那會tú-tio̍h ê懲罰。M̄-koh無論是tùi第一部分á是第二部分來看,lóng thang看tio̍h一個中心信息:無聽從上帝ê話,趕緊悔改歸向上帝,就算有人間siōng堅強ê軍事武力作國防,mā是枉然。

Chit段經文主要是用耶路撒冷城發生被包圍ê背景為主。耶路撒冷城kúi-nā pái被敵軍所包圍,包括主前701年亞述皇帝西拿基立率軍進攻,m̄-koh並無成功。Á tī主前588到586年,被巴比倫圍城長到一年半,結果m̄免koh再攻打,城門就主動phah開。

有bē少學者認為chit章經文ê背景,應該tùi主前第六世紀588到586年ê背景來看,巴比倫王尼布甲尼撒率軍包圍耶路撒冷城長到一年半ê chit段時間,會koh khah貼近chit章經文所敘述ê內容。不過,mā有一個可能,就是先知以賽亞親目看tio̍h主前701年西拿基立率亞述大軍圍城所發生ê景況,已經講出若是猶大人民繼續án-ne「混」,拒絕聽從上帝ê話,其結果是án-ne ê慘狀會koh一pái重演。Á chiâⁿ實tī巴比倫帝國時代ê主前588年圍城事件發生。

第1節,「景象谷」,真可能是teh指耶路撒冷東邊ê汲淪溪。有可能先知以賽亞tú好行經chit所在ê時,得tio̍h上帝ê啟示,就tī chia傳出了上帝ê信息。先知以賽亞用giâu疑ê語句強調危險時刻已臨到目睭前,m̄-koh耶路撒冷城內ê人民kah-ná無警覺tio̍h,iáu teh「厝頂上慶祝」,因為án-ne,伊問到底是「發生甚麼事loh」。

第2到5節,chit段經文講出一個國家ê滅亡siōng大悲哀,就是人民根本m̄知敵人已經兵臨城下了,m̄-koh城內ê人民iáu渾然m̄知,「全城喧嚷」、「四界鬧興奮」,這kah-ná是teh慶祝一個重大節期ê款。因為án-ne,先知以賽亞chiah會講in並m̄是「死tī戰鬥」。M̄-koh當in中間有人發見無對tâng ê時,就趕緊逃走伊去,m̄-koh就算逃走mā無用,因為iáu是hō͘追了tńg來。先知以賽亞講出當時ê慘況,是「同胞lóng死去」,無死ê是「驚惶、失敗、混亂」,而且tī chit時chūn「城牆攻破了」,這是主前586年ê事。

第6到8節,chit時chūn「以攔ê騎兵」mā加入巴比倫ê軍隊抵擋亞述帝國。In ê「箭袋裡裝滿弓箭」,已經準備好勢tio̍h進攻耶路撒冷。Á「吉珥」族以步兵出名,in mā加入巴比倫軍隊ê行列。In lóng聚集tī「猶大肥ê山谷」,準備ài攻擊耶路撒冷城ê外國軍隊。戰爭所帶來ê就是田園荒廢,續落來是缺糧饑荒,chit種饑荒並m̄是因為天無降落甘霖雨水,卻是因為人禍造成。仝款ê,久長iau餓所帶來ê結果,就是瘟疫蔓延。Án-ne,即使猶大有防衛,mā仝款會「崩潰」。因為人民kah軍人無糧食,就會動亂,若無就是軍隊因iau餓而軟弱無力ē-tàng守衛。即使ē-tàng「tùi軍械庫the̍h出兵器」,mā無氣力使用。

第9到11節,chia提起耶路撒冷「城牆上有真chē缺口」,表示敵軍攻擊已經開始,m̄-koh iáu未攻入城內。因為án-ne,猶大指揮官派兵強拆人民ê房屋,the̍h來當做建材修補城牆缺口ê漏洞,mā the̍h來當做修築蓄水池ê需要。Koh講,為tio̍h beh修補城牆漏洞,以及修築蓄水池,koh得抽出一部分兵力來投入修築工事ê需要,真自然tek,守衛ê氣力就相對降低了。

第12到13節,chit節到第14節chit段經文kah第1到4節相通。「痛哭哀號,剃光頭毛,穿麻衣」,chiah-ê lóng是一種悲哀、侮辱ê樣式。M̄-koh chiah-ê lóng kan-taⁿ是外表ê哀痛,是m̄是真心悔改,án-ne chiah是重點。Tùi第13節來看,猶大人民顯然並m̄是真心悔改,若無,bē是「iáu teh嘻笑、狂歡」、「宰了牛羊,大食大lim」。In ê心態iáu-koh是「橫直明á載就beh死去」,連一點點á悔改ê心意mā無。

第14節,因為有第13節ê chit種心態,上帝ê忿怒就bē減低,卻是會增加,祂bē「赦免」Chit種罪惡。

重新查詢 專卷研經 以賽亞書系列
錯誤回報,請聯繫