以賽亞書 19章1節 到 19章15節   背景資料  上一筆  下一筆
第十九到二十章,thang參考耶利米書第四十六章,以及以西結書第廿九到三十二章,內容lóng是有關埃及teh beh受tio̍h上帝懲罰ê事。無仝ê所在是先知耶利米kah以西結lóng是主前第六世紀ê先知,in所講關係埃及ê信息,其實lóng是kah巴比倫帝國有關。

第十九章mā是延續第十八章提起ê「古實」,就是埃及ê第廿五代王朝,論到上帝會伸出祂ê赦免kah憐憫悔改認罪歸向上帝ê埃及人民。

Chit章thang分做兩部分,一是tùi第1到15節,chit部分是用詩歌ê方式寫做ê,提起上帝teh-beh重重懲罰埃及。二是tùi第16到25節,chit部分講埃及人悔改,並承認而且接納上帝是in ê主宰。因為án-ne,上帝mā改變過去對付埃及ê作法,接納埃及人mā成做祂ê子民。先知以賽亞已經講出一個非常重要ê信息:m̄是只有以色列民族chiah是上帝ê子民,上帝mā m̄是只有揀選以色列人民為祂唯一ê民族,卻是任何民族、國家lóng有可能成做上帝所kah意ê子民,只要願意悔改歸向上帝,lóng有可能成做上帝所歡喜ê子民。

Tī chit段經文中,先知以賽亞描述埃及tī政治ê混亂,社會動盪不安,進有「內戰」發生,出現「暴君」ê統治,增加人民ê痛苦。Á上帝ê懲罰是hō͘尼羅河嚴重缺水,致使埃及全國乾旱難耐。當尼羅河發生乾涸現象ê時,mā就是埃及大災難來臨ê時,chit時chūn,人就tio̍h清楚明白,無論甚麼人當君王,都無用。因為上帝不降雨水hō͘農作物成長,光擁有財富mā是枉然。

第1節,chit節講上帝來臨是「駕tio̍h快速ê雲朵」。聖經作者ài用「密雲」、「雲」、「雲彩」等詞,來描述上帝就tī雲彩ê中間(參考出埃及記十九:16、18、三十四:5、四十:34—38,撒母耳記下廿二:12,詩篇十八:11、九十七:2)。Á當上帝來臨進行審判ê時,「埃及ê偶像tī伊面前phi̍h-phi̍h-chhoah」,因為chiah-ê偶像,lóng是虛假ê。

第2到4節,chit節提起上帝懲罰ê方式,就是hō͘埃及國內發生分裂,包括「兄弟phah兄弟,厝邊phah厝邊,城kah城作戰,王kah王爭權」等,án-ne,埃及就會失去對外ê戰鬥力。Chia特別提起當災難、紛爭來臨ê時,無論hiah-ê人向甚麼人求就都無用,chia指出埃及人向「偶像」、「巫師」、「算命ê先生」,以及「鬼魂」等求助都無用,因為chiah-ê lóng m̄是真正神。Tī chit種動盪ê世代,只有「一個暴君、一個殘酷ê王」,才能終止內亂,m̄-koh mā可能為國家帶來koh khah chē ê殘暴內戰kah動盪。

第5到10節,當埃及人民作為óa靠而且kā它供奉為神ê尼羅河,上帝ê懲罰是hō͘伊河水低落,致使「水流乾涸」,而且是嚴重到「因乾涸而發出臭味」,就thang理解河裡差不多是無水而見底了。Mā因為嚴重乾旱帶來ê影響,除了漁業、水產物,iáu有埃及siōng出名ê紡織工業,mā因為尼羅河無水無法度供應到成麻紗ê植物成長,致使「紡織工人」、「師傅」lóng tùi án-ne失業,工廠關閉,人民「紛紛破產」。

第11到15節,「瑣安城」,這是設tī尼羅河三角洲東北區ê一個大城,以色列人民對這城一點mā不生份(參考民數記十三:22,詩篇七十八:12、43)。Chit-ê城tī古實王朝時代,bat是首都,非常繁榮。chit-má講連「瑣安城」裡「siōng聰明ê人mā無甚麼好主意」,因為災難是tùi上帝來ê懲罰根本無法度化解。

「孟斐斯」,這是希臘文ê名稱,原本希伯來文kā它稱做「挪弗」(《和合本》用這名),是設tī尼羅河三角洲以南廿四公里所在ê一個重要城市,kúi-nā pái為埃及ê首都。

先知以賽亞tī chia講這兩城ê首領lóng「真笨」,因為in ê首領「糊塗」來致使kui個國家像「lim醉了酒ê人」仝款khiā bē穩,「滑跌tī家己吐出來ê穢物上」,chit時,國家將面臨被侵入,人民不分貧賤富貴,lóng kā hông掠去做奴隸。

重新查詢 專卷研經 以賽亞書系列
錯誤回報,請聯繫