Chit章經文是針對古實chit-ê民族提出ê信息。古實，這是teh指大約tī主前715到714年間，tī古代埃及南部ê衣索匹亞，由一位「邊克衣」族人（Piankhi）名叫「沙巴卡」（Shabaka）所帶領，伊領導族人統治埃及，建立埃及ê第廿五個王朝。因為埃及加入敘利亞kah以色列ê聯盟，因為án-ne，特別差派使節團到猶大去遊說in加入聯盟。結果埃及m̄-nā無因為án-ne保全家己ê國家，反tńg受tio̍h連累，家己mā就會領受亞述帝國ê掠奪。M̄-koh另外有一種可能，就是in派出ê代表是去亞述走chhōe和解，結果是hō͘拒絕ê。因為亞述帝國已經清楚知影，tio̍h攻落埃及並無困難。何況chìn前埃及是參與敘利亞kah以色列聯盟策略來反抗亞述ê。有可能因為發見亞述帝國並無接受，就án-ne in開始轉向，走chhōe猶大ê協助。

第1到2節，這是tī主前703年左右，埃及派出使者前往猶大見希西家王（主前715—687年），ài伊趕緊加入聯盟抵擋亞述。埃及使者並且帶國王ê訊息去，tio̍h大力hō͘ in猶大協助。M̄-koh先知以賽亞ê看法一直是維持一貫ê信念：tio̍h óa靠上帝chiah是正確，óa靠人ê氣力，kan-taⁿ會帶來koh khah大ê災難，chit點tī以賽亞書第三十章有koh khah詳細ê說明。先知以賽亞提出明確警告，說明kah埃及訂立協防條約是無任何作用ê。

「翼股振動ê響聲」，chit句話表示kui個社會忙亂ê情景，ná親像真chē飛蛾á是其它昆蟲四界忙亂舞動翼股ê時發出ê聲音（參考申命記廿八：42），表示tú-tio̍h困境、危急ê時ê反應。Chia是用chit種方式teh描述，來往tī古實kah耶路撒冷ê 使節團非常無閒，in想出所有ê辦法tio̍h遊說希西家王加入聯盟。

「蘆葦造ê船」，這是古代社會tāi先進ê航運船隻，航行速度真緊。Chit種船隻因為快速，通常lóng是用來當做通訊á是輕便物件ê運輸工具，m̄-koh並無適合運送軍隊，因為船ê體型真小。

M̄-koh先知以賽亞傳出ê信息，是beh chiah-ê 使節團趕快tńg去，m̄-thang koh再去遊說希西家王。因為若無趕緊tńg去，恐驚上帝會受氣懲罰，hō͘尼羅河ê河水降低，甚至河道乾涸（參考二十：5），而斷了in tńg去厝裡ê路。

第3節，chit段經文講出亞述帝國會怎樣懲罰古實，甚至連參與策劃kah古實聯盟ê人mā會遇tio̍h仝款懲罰。

先知以賽亞呼籲當時ê領導者tio̍h注意「聽pah」，而且是beh「注意聽號角ê響聲」因為上帝會pûn號筒，呼叫祂ê子民。

第4到6節，chit三節是上帝hō͘先知以賽亞ê信息。

上帝「tùi天頂俯視」地上ê一切行動，祂非常清楚所有ê一切。M̄-koh上帝lóng照ê計畫teh進行，祂ê命令一出來，一切就按tio̍h祂ê吩咐進行。因為án-ne，人類看起來kah-ná混亂ê現象，tī上帝眼中，卻是非常清晰，因為tī祂眼中一切ná親像攤tī「熱天照耀ê陽光下」，mā像秋季收割ê時ê「露水」般tùi葉áê尾溜往地上滴仝款。這mā表示上帝teh進行ê工作，有時是安靜得hō͘人感受bē出有任何一點跡象，m̄-koh上帝奇妙ê旨意卻tī靜靜靜中間teh運行tio̍h。先知以賽亞用chit種句話teh形容亞述tio̍h摧毀古實（埃及），ná親像農家準備ài採收葡萄仝款，所有採收ê工具lóng準備好勢了。古實ê結局是悲慘ê，in ê眾兵丁會曝屍tī荒郊野外無法度埋葬，成做「飛禽行獸」ê食物。

第7節，thang參考歷代志下第三十二章23節。當上帝拯救耶路撒冷脫離亞述帝國皇帝西拿基立ê侵犯後，有真chē附近民族lóng紛紛派出代表到耶路撒冷來向伊恭賀。Tī以賽亞書第四十五章14節，甚至預言古實（埃及）mā 會成做以色列國ê臣民。