以賽亞書 16章1節 到 16章14節   背景資料  上一筆  下一筆
Chit章是繼續第十五章談及摩押tú-tio̍h災難ê問題。特別ê所在,是先知以賽亞tī chit章ê經文中講連上帝lóng為摩押ê遭遇表示哀傷(參考第9、11節),chit種語句一般真少出現tī先知ê信息中。

第1到2節,「西拉」,chit位詞有「石磐」ê意思。這是設tī死海以南,有一工然地形作屏障ê城市,是以東人ê首府。逃難ê摩押人「送一隻小羊hō͘耶路撒冷當權ê人做禮物」,表示摩押chit-má需要向猶大國進貢,mā tùi chia thang知影摩押人民驚惶失措、惶恐不安ê款。

「亞嫩河」,這是南北往來ê交通要道,tùi chit種形容mā thang看出四界逃難ê摩押人民心中有真嚴重ê操心,ná親像「被趕出了巢窩ê鳥á」非常不安。因為in已經無家可歸,mā無所在thang去。

第3到4節,chiah-ê逃難者來要求猶大保護in。In會來走chhōe猶大ê庇護,表示當時ê猶大國勢尚且強盛,因為án-ne,in請求猶大國收留in,就是請求m̄-thang驅ta̍k in離開,而hō͘ in成做「無家可歸」ê人。所謂「脫離毀滅者ê手」,意思指不beh hō͘ in被「引渡」tńg去,免得遇tio̍h殺害。

第5節,chit節koh一pái重述第十一章1節、10節所提起ê「耶西ê根」tio̍h重新發出「嫩芽」、興起「一位新王」來統治上帝ê子民。Á這新王ê統治會以「信實無變ê疼」來管理人民,這mā是第九章7節、第十一章2到5節所提起ê君王特點。

第6節,chit節是猶大國接tio̍h摩押人來走chhōe庇護ê時ê回答,意思是in拒絕提供給摩押人必要ê幫助。原因是in真「驕傲」、「狂妄自大」,chit種人到最後即使想beh走chhōe上帝ê庇護mā oh得得tio̍h回應。

第7節,互相比較過去ê輝煌日子,taⁿ摩押人ê境遇是悽慘無比。作者用「啼哭」、「哭」、「悲傷絕望」等名詞來說明,摩押人民因為國家遭難陷入悲傷痛苦ê中間ê情況。

「吉珥‧哈列設城」ê「佳餚好料」,因為hi̍t 所在區以出產葡萄出名,因為án-ne hit-ê城ê葡萄餅是遠近出名。這「哈列設」ê字意有含「phah碎陶器ê碎片」,因為án-ne,「吉珥‧哈列設」ê意思,就是「成做碎片ê城市」。先知以賽亞就是teh指出,若是不聽從上帝ê話,其結果就會親像「粉碎了陶器」仝款成做廢物,hō͘人棄sak。

第8節,「西比瑪」,可能tī希實本以西大約五公里遠ê所在。Chia ê記載lóng提起葡萄,表示摩押地區盛產葡萄而且kek酒業非常發達。Mā因為án-ne「bat hō͘各國ê統治者醉倒了」,表示過去摩押對附近地區ê影響力,m̄-nā是外交ê,而且是充滿商業利益,m̄-koh taⁿ情況是完全改變了。

第9到12節,lóng是上帝為摩押ê毀滅表示惋惜、悲哀。

「雅謝」,chit-ê地設tī死海ê北pêng地方。有可能就是今á日ê「雅紀爾」(Jazzir)城。

「西比瑪」、「雅謝」、「希實本kah以利亞利」等地區,lóng是呂便kah迦得支派所在ê區域,mā就是約旦河東岸(參考約書亞記十三:15—28,《現代中文》譯本聖經舊約264頁地圖)。

過去葡萄豐收ê時,hiah-ê人會tī「踹葡萄」kek酒ê時會唱出歡樂ê歌聲,taⁿ lóng無koh存在。chit-má所聽tio̍h ê,lóng是「哭」、「哀哭」、「目屎如雨下」,以及tī傷痛中ê haiⁿ-haiⁿ叫聲音。因為亡國了後,人民會hō͘掠到他國去做奴隸,所累積起來ê財富lóng淪為他國ê戰利品,被搜刮、掠奪殆盡。

第12節講出幾個重要ê意義,一是摩押人tī遭遇患難ê時chūn,一直teh祈求in ê神明來協助,m̄-koh都無得tio̍h任何回應。二是mā說明虛假ê神明,tī患難ê日對受難ê人民並無幫助。三是siōng重要ê一個信仰觀念:若是平時不聽從上帝ê話,一再做違背上帝旨意ê事,只有面臨死亡關頭ê時,chiah想tio̍h beh向上帝祈求幫助,án-ne是無可能得tio̍h拯救ê。Ná親像先知以賽亞傳出ê信息所講,chit種祈禱,上帝lóng bē聽(參考以賽亞書一:15),甚至上帝mā會阻止祂ê奴僕為chit種人祈禱(參考耶利米書七:16—20)。

第13到14節,chia提起摩押ê遭遇teh beh tī「三年」後koh khah徹底,連恢復ê機會mā無,tio̍h完全毀滅。雖然有殘存ê「少數人民」,mā會是「十分衰弱」。

重新查詢 專卷研經 以賽亞書系列
錯誤回報,請聯繫