以賽亞書 12章1節 到 12章6節   背景資料  上一筆  下一筆
Chit首詩歌是用兩首詩歌合併而成ê,這兩首詩歌lóng是歌頌、o-ló ê詩歌。第一首就是1到3節,第二首tī 4到6節。Kā chit一首續落去tī第十一章ǹg望ê詩歌了後,tī編輯上thang講非常適當。如果講第十一章是「新ê出埃及」,án-ne,第十二章就是以色列民族teh回應上帝拯救ê疼ê詩歌,ná親像以色列人出埃及過紅海了後,摩西所寫記載tī出埃及記第十五章1到18節ê歌頌詩歌仝款。

第1節,chit節講chit-má上帝「息了受氣」,而且iáu發出「安慰」,因為知影祂ê子民已經受盡被掠到外國去做奴隸ê苦難。Ná親像早年in ê祖先tī埃及受奴役之苦難仝款。Chia ê「安慰」一詞,有引chhōa、保護ê意思。

第2節,thang參考出埃及記第十五章2節;詩篇第一一八篇14節。

Tī chit節詩歌中,提起得tio̍h拯救ê以色列人民會表現出四種態度:一是全心信靠上帝;二是性命中無koh有驚惶;三是明明確知影性命ê泉源就tī上帝;四是確信賞賜能力ê是上帝。因為有chit種認bat,人chiah m̄敢驕傲,卻是知影一切lóng是有上帝teh牽引、帶領。

第3節,chit節thang對照以賽亞書第四十一章17到18節。

Chia用「清水」、「乾渴」等詞,講出出埃及進入曠野漂流期間ê歷史經歷,上帝hō͘石磐湧出泉水,(hō͘以色列人民tī he無水而乾渴ê日子,得tio̍h清涼ê泉水thang lim,m̄-nā是解除了性命ê危機,mā為性命帶來一股活力。Ná親像詩人所講ê,上帝hō͘以色列人民lim ná「喜樂ê泉水」仝款(參考詩篇三十六:8—9)。用chit種方式teh表明kah上帝連結,性命就bē受tio̍h「乾渴」ê威脅,卻是會充滿ná親像飲用「清水」般ê歡喜。

第4節,chit節講出就會領受上帝救恩ê人,應該有ê使命,就是知影怎樣「向萬國」、「向萬民」傳揚、宣告上帝奇妙ê恩典,而siōng好ê方法,就是kā上帝ê救恩直接向人敘述出來。

第5節,chit節繼續tī第4節所講ê,beh向萬國、萬民傳揚ê,就是上帝「成就了大事」。Tī聖經中每pái提起「上帝ê大事」,lóng是teh指上帝進行拯救ê工作,特別是teh指帶領以色列人民出埃及,過紅海,以及hō͘石磐出泉水,kah tùi天頂降落嗎哪等神跡奇事。

第6節,chit節指出所有體驗tio̍h上帝同在ê人,lóng tio̍h「歡呼歌唱」上帝,講述上帝奇妙救恩ê偉大。


重新查詢 專卷研經 以賽亞書系列
錯誤回報,請聯繫